সাৱধান ! পথৰ কাষৰ এই বিষাক্ত উদ্ভিদে মাতিব পাৰে জীৱনলৈ বিপদ
লমালমে বগাকৈ ফুলি থকা ফুলে বিপদ মাতিব পাৰে আপোনাৰ জীৱনলৈ ! ৰাজ্যত ছানি ধৰিছে বিষাক্ত পাৰ্থেনিয়ামে । শংকিত ৰাইজ ।
Published : June 10, 2025 at 9:36 PM IST
যোৰহাট : সাৱধান, ফুল দেখি ভোল নাযাব ! লমালমে বগাকৈ ফুলি থকা ফুলবোৰে বিপদ মাতিব পাৰে আপোনাৰ জীৱনলৈ ! দেখাত ধুনীয়া এবিধ বিষাক্ত ফুলে মৃত্যুমুখলৈ ঠেলি দিব পাৰে আপোনাক !
পাৰ্থেনিয়াম নামৰ এইবিধ বিষাক্ত উদ্ভিদে ছানি ধৰিছে ৰাজ্য ভিন্ন প্ৰান্তৰ লগতে যোৰহাটৰ তিতাবৰতে । তিতাবৰৰ মেলামাটি বিৰিণাশায়েকৰ মধ্য ইংৰাজী বিদ্যালয়ৰ চৌহদত ভয়ানকভাৱে বৃদ্ধি পাইছে পাৰ্থেনিয়াম । বিদ্যালয়ৰ ছাত্ৰ-ছাত্ৰীৰ লগতে জনস্বাস্থ্যৰ প্ৰতি এইবিধ বিষাক্ত উদ্ভিদে কঢ়িয়াই আনিছে ভাবুকি ।
এইজোপা বিষাক্ত উদ্ভিদনো কেনেকুৱা, কিমান ভয়ংকৰ হ'ব পাৰে, সকলোতে কেনেদৰে আধিপত্য বিস্তাৰ কৰে এই উদ্ভিদে এই বিষয়বোৰক লৈ মঙলবাৰে তিতাবৰৰ এখন বিদ্যালয় চৌহদত স্থানীয় সচেতন ব্যক্তিৰ উদ্যোগত ছাত্ৰ-ছাত্ৰীৰ মাজত সজাগতা সৃষ্টি কৰাৰ লগতে বিষাক্ত উদ্ভিদবোৰ ঔষধ দি ধ্বংস কৰাৰ কাম আৰম্ভ কৰে ।
এই সন্দৰ্ভত সচেতন ব্যক্তিয়ে কয়, "সাধাৰণতে পথৰ দাঁতিৰ লগতে বিভিন্ন ঠাইত লহপহকৈ বগা ফুলেৰে মন উন্মনা কৰিব পৰা এইবিধ গছ মানুহ বা পক্ষীকুলৰ বাবে অতিকৈ ভয়াৱহ । বৰ্তমান অসমৰ বিভিন্ন ঠাইত প্ৰসাৰিত হৈ পৰা এই উদ্ভিদবিধৰ বৈজ্ঞানিক নাম হৈছে Parthenium hysterophorus । এই বিষাক্ত উদ্ভিদ সাধাৰণতে ১-১.৫ মিটাৰ ওখ হয় ।"
তেওঁলোকে লগতে কয়, "সাধাৰণতে পাৰ্থেনিয়ামবোৰ দেখাত হাইব্ৰিড ধানৰ গছৰ দৰে । পথৰ কাষে কাষে বা বিদ্যালয়, খেলপথাৰ আদি ঠাইত মনোমুগ্ধ ৰূপত ফুলি থাকে এই উদ্ভিদবোৰ । আধিপত্যবাদী এই উদ্ভিদে এলাৰ্জীৰ সৃষ্টি কৰে । পাৰ্থেনিয়াম অপতৃণ হাতেৰে স্পৰ্শ কৰিলে বা থেতেলিয়াই দিলে সৰুৰ পৰা ডাঙৰ ৰোগ হোৱাৰ লগতে মানুহৰ শৰীৰত হাঁপানী, ব্ৰংকাইটিছ, হাওঁফাওঁৰ কৰ্কট ৰোগকে ধৰি বিভিন্ন ৰোগে ক্ৰিয়া কৰাৰ সম্ভাৱনা থাকে । পাৰ্থেনিয়ামে মহৰ বংশবৃদ্ধি কৰাত সহায় কৰে ।"
সেয়ে এই বিষাক্ত পাৰ্থেনিয়াম ধংস কৰাৰ ক্ষেত্ৰত স্বাস্থ্য বিভাগক ব্যৱস্থা গ্ৰহণৰ আহ্বান জনায় সচেতন ৰাইজে ।
