গুৱাহাটী: পৰাগ কুমাৰ দাস সতীৰ্থ মঞ্চই এইবাৰ 'পৰাগ কুমাৰ দাস সাংবাদিকতা বঁটা' আগবঢ়াইছে ৰাজ্যৰ বিশিষ্ট চিন্তাবিদ, ইতিহাসবিদ তথা অধ্যাপক উদয়াদিত্য ভৰালীলৈ । পৰাগ কুমাৰ দাস সতীৰ্থ মঞ্চই এই সন্দৰ্ভত এক বিবৃতিত কয়, “কটন মহাবিদ্যালয়ৰ অৱসৰপ্ৰাপ্ত অধ্যক্ষ ভৰালীয়ে কেইবা দশক ধৰি অসমৰ কেইবাখনো আগশাৰীৰ বাতৰি কাকতত নিয়মীয়াকৈ লেখা-মেলা কৰি আহিছে ৷ 'অসমীয়া প্ৰতিদিন'ৰ আৰম্ভণিতে 'পৃষ্ঠভূমিৰ চিনাকি' শিৰোনামেৰে বিভিন্ন দেশৰ বিষয়ে লিখি আলোড়নৰ সৃষ্টি কৰিছিল ভৰালীয়ে ৷ পৰৱৰ্তী কালত প্ৰতিদিনতে ’প্ৰাসংগিক পাণ্ডুলিপি’ শিতানৰে জাতীয় জীৱনৰ বহু গুৰুত্বপূৰ্ণ বিষয় তথ্যসহ যুক্তিনিষ্ঠ বিশ্লেষণৰে চিন্তাৰ নতুন বাট মোকলাইছিল ৷”
পৰাগ কুমাৰ দাস সতীৰ্থ মঞ্চই উল্লেখ কৰে, “এগৰাকী সফল গল্পকাৰ হিচাপেও অসমীয়া সাহিত্যক সমৃদ্ধ কৰিছে অধ্যাপকগৰাকীয়ে । এগৰাকী ক্ৰীড়া সংগঠক, ক্ৰীড়া বিষয়ক ব্যতিক্ৰমী লেখক হিচাপেও সুকীয়া পৰিচয় দাঙি ধৰিছে ভৰালী ডাঙৰীয়াই ৷ বিশেষকৈ ইতিহাস চৰ্চাৰ ক্ষেত্ৰত ভৰালীয়ে অসমত এক নতুন দিশৰ সন্ধান দিছে ৷ পৰাগ কুমাৰ দাসৰ মৃত্যুৰ পিছত তেওঁৰ স্মৃতিত বিগত ২৫ বছৰ ধৰি আয়োজন কৰা তৰ্ক প্ৰতিযোগিতাৰ উদয়াদিত্য ভৰালী আছিল এগৰাকী অন্যতম গুৰি ধৰোঁতা ৷ পৰাগ কুমাৰ দাস সম্পাদিত ’বুধবাৰ ’ আৰু ’আগান’তো প্ৰবন্ধ যুগুতাই জাতীয় জীৱনলৈ গুৰুত্বপূৰ্ণ বৰঙণি আগবঢ়াইছিল ভৰালীয়ে ৷”
উল্লেখ্য যে, যোৱা কেইবছৰো ধৰি শাৰীৰিকভাৱে অসুস্থ হৈ আছে বিশিষ্ট চিন্তাবিদগৰাকী ৷ তাৰ মাজতে ২০২২ চনৰ ছেপ্টেম্বৰত তেখেতৰ শেহতীয়া গল্প সংকলন ‘ধলফাট’, প্ৰবন্ধ সংকলন ‘জাতি সমস্যাৰ প্ৰশ্ন আৰু অন্যান্য’ আৰু অভিনন্দন গ্ৰন্থ ‘জাগ্ৰত বিবেক উদয়াদিত্য ভৰালী’ প্ৰকাশ পাইছে । স্মৰ্তব্য যে পৰাগ কুমাৰ দাস সাংবাদিকতা সন্মান ২০২৪ বৰ্ষত বিশিষ্ট বুদ্ধিজীৱী ড৹ হীৰেন গোহাঁইলৈ আগবঢ়োৱা হৈছিল ৷ এইবাৰ ড৹ হীৰেন গোহাঁইয়ে বিশিষ্ট চিন্তাবিদ, লেখক উদয়াদিত্য ভৰালীক তেওঁৰ বাসগৃহত অহা ১৮ মে’, দেওবাৰে পৰাগ কুমাৰ দাস সাংবাদিকতা বঁটা প্ৰদান কৰিব ৷ স্বাস্থ্যজনিত কাৰণতে ১৭ মে’ত পৰাগ কুমাৰ দাসৰ স্মৃতি দিৱসত প্ৰদান কৰিবলগীয়া বঁটাটি ১৮ মে’ দেওবাৰে দিনৰ ১১:৩০ বজাত প্ৰদান কৰা হ’ব ৷
থোৰতে উদয়াদিত্য ভৰালীৰ বিষয়ে:
১৯৪৭ চনত মৰাণত জন্মগ্ৰহণ কৰা উদয়াদিত্য ভৰালী বৰ্তমান গুৱাহাটীৰ দক্ষিণ শৰণীয়া নিবাসী । কৰ্মসূত্ৰে পিতৃৰ সঘন বদলিৰ ফলত মঙলদৈ, ওদালগুৰি, মাজবাট, গহপুৰ, শিৱসাগৰ, গুৱাহাটী, বৰমা, নলবাৰী আৰু বৰপেটাত বুনিয়াদী আৰু হাইস্কুলীয়া শিক্ষাগ্ৰহণ কৰিছিল ভৰালীয়ে । তেতিয়াৰ কটন কলেজত কলেজীয়া শিক্ষা সাং কৰি তেওঁ গুৱাহাটী বিশ্ববিদ্যালয়ৰ পৰা ইতিহাস বিষয়ত স্বৰ্ণপদকসহ স্নাতকোত্তৰ ডিগ্ৰী লাভ কৰে ।
কৰ্মজীৱন:
১৯৬৮ চনৰ ১৪ নৱেম্বৰৰ পৰা ২০০৩ চনৰ ৩১ আগষ্টলৈ কটন কলেজৰ অধ্যাপক হিচাপে কৰ্মজীৱন আগুৱাই ২০০২-২০০৩ চনলৈ ইতিহাস বিভাগৰ মুৰব্বী হিচাপে তেওঁ সেৱা আগবঢ়ায় । ইফালে ২০০৩ চনত কটন কলেজৰ অধ্যক্ষ হিচাপে দায়িত্ব গ্ৰহণ কৰা বিশিষ্ট চিন্তাবিদগৰাকীয়ে ২০০৬ চনত অৱসৰ গ্ৰহণ কৰে ।
লাভ কৰা বঁটাসমূহ:
'বেইমানৰ ঠিকনা' শীৰ্ষক গল্প সংকলনৰ বাবে ১৯৯৬ চনত উদয়াদিত্য ভৰালীয়ে লাভ কৰে অসম সাহিত্য সভাৰ 'বিষ্ণু্প্ৰসাদ ৰাভা বঁটা' ।
সামাজিক জীৱনলৈ অৱদান:
- সহযোগী সম্পাদক The Political History of Assam, Vol-I
- Chief Editior: Dr. Heramba Kanta Barpujari, 1977. (Published by: Government of Assam.)
- 'Hundred Years : History of Cotton College, 1901-2001, (2001) Published by The Centenary Celebration Committee, Cotton College.
- জাতি সমস্যাৰ প্রশ্নত (আগষ্ট ১৯৮১), সাম্প্রতিক প্রকাশন, গুৱাহাটী।
- কার্যকৰী সভাপতি : জ্যোতি প্রসাদ জন্ম শতবর্ষ উদ্যাপন সমিতি, অসম-২০০২।
- কার্যকৰী সভাপতি : জননেতা ভীমবৰ দেউৰী জন্ম শতবর্ষ উদযাপন সমিতি, অসম ২০০৩।
- কার্যকৰী সভাপতি: বিষ্ণুপ্রসাদ ৰাভা জন্মশতবর্ষ উদযাপন সমিতি, অসম-২০০৭।
- অসম সাহিত্য সভাৰ বুৰঞ্জী অধিৱেশনৰ সঞ্চালক-২০০৪।
- বাতৰি কাকতৰ পূৰ্বৰ নিয়মীয়া স্তম্ভ:
- 'সময়ৰ জলঙাৰে'- (সাদিন)
- খ) 'পৃষ্ঠভূমিৰ চিনাকি' (অসমীয়া প্রতিদিন)
- 'বিবিধ টোকা' (অসমবাণী)
- 'প্রাসংগিক পাণ্ডুলিপি'- (অসমীয়া প্রতিদিন)
