মাছে নিয়ন্ত্ৰণ কৰিব মহৰ বংশবৃদ্ধি, স্বাস্থ্য বিভাগৰ তৎপৰতাত গ্ৰহণ পদক্ষেপ

বঙাইগাঁও : বাৰিষাৰ আগমনৰ লগে লগে ক্ৰমাৎ বৃদ্ধি হ’বলৈ ধৰে মহৰ বংশ । উৎকট গৰমৰ সমানে সমানে এই সময়ছোৱাত দেখা দিয়া মহৰ উপদ্ৰৱে কঢ়িয়াই আনে বিভিন্ন বেমাৰৰ বীজাণু ৷ যাৰ বাবে গৰমৰ দিনকেইটাত জাপানীজ এনকেফেলাইটিজ, মেলেৰীয়া আদি ৰোগৰ প্ৰাদুৰ্ভাৱ বহু পৰিমাণে বাঢ়ে ৷

মহৰ উপদ্ৰৱ নিয়ন্ত্ৰণ আৰু ইহঁতৰ বংশবৃদ্ধি ৰোধ কৰাৰ ক্ষেত্ৰত ফলপ্ৰসূ হিচাপে পৰিচিত হৈছে এবিধ বিশেষ মাছ ৷ অসমীয়া সমাজ জীৱনত সততে পোৱা থলুৱা মাছৰ কথা আমি কোৱা নাই ৷ মহৰ বংশবৃদ্ধি ৰোধ কৰাৰ ক্ষেত্ৰত উপযোগী হিচাপে চিহ্নিত হোৱা আলংকৰিক মাছবিধ হৈছে গাপী মাছ ৷

বৰ্ধিত মহৰ সংখ্যা হ্ৰাস কৰিবলৈ বঙাইগাঁৱত মঙলবাৰে এৰি দিয়া হয় এইবিধ আলংকৰিক মাছ ৷

কি এই গাপী মাছ (GUPPY FISH) ?

গাপী মাছ মূলতঃ এবিধ আলংকাৰিক মাছ ৷ সাধাৰণতে এইবিধ মাছক একুৱাৰিয়ামত ৰখা হয় যদিও এই বিশেষ প্ৰজাতিৰ মাছবিধৰ প্ৰিয় খাদ্য হৈছে মহৰ পলু ৷ এটি গাপী মাছে ২৪ ঘণ্টাত ২০ ৰ পৰা ৮০ টালৈকে মহৰ পলু খাদ্য হিচাপে গ্ৰহণ কৰে । গাপী মাছ অথবা মহভক্ষী মাছৰ বংশবৃদ্ধিৰ ক্ষমতাও অইন সাধাৰণ মাছতকৈ বহু পৰিমাণে বেছি ৷

আলংকৰিক গাপী মাছ (ETV Bharat Assam)

কিহৰ বাবে প্ৰয়োজন গাপী মাছৰ ?

এনোফিলিছ, এডিছ ইজিপ্তাই, কিউলেক্স ইত্যাদি মহে অসমৰ প্ৰাকৃতিক ভাৰসাম্যৰ সৈতে খাপ খাই বাৰিষা সময়ত বহু পৰিমাণে বংশ বৃদ্ধি কৰাৰ ফলত বিভিন্ন ৰোগৰ প্ৰাদুৰ্ভাৱ ঘটে ৷ শেহতীয়াকৈ ৰাজ্যৰ বিভিন্ন প্ৰান্তত মহৰ কামোৰৰ বাবে ডেংগু, জাপানীজ এনকেফেলাইটিছ, মেলেৰিয়া আদিৰ দৰে ৰোগত আক্ৰান্ত ৰোগীৰ সংখ্যা বৃদ্ধি পাবলৈ ধৰিছে ৷ তাৰ মাজতে দুই-এজন লোকে প্ৰাণ হেৰুৱাবলগীয়াও হৈছে ৷

আচলতে বাৰিষাৰ সময়ছোৱাত খাল, ডোং আৰু নলাবোৰত জমা হৈ থকা পানীত মহে কণী পাৰি পোৱালি জগায় ৷ তাৰ বাবেই বঙাইগাঁৱত লোৱা হৈছে এক উল্লেখনীয় পদক্ষেপ ৷ মহৰ উৎপাতৰ পৰা হাত সাৰিবলৈ জিলাখনৰ নলাবোৰত এৰি দিয়া হৈছে এই আলংকৰিক গাপী মাছ ৷

এই কাৰ্যসূচীত উপস্থিত আছিল বঙাইগাঁৱৰ সহকাৰী আয়ুক্ত গোলাম সাৰোৱাৰ হুছেইন (ETV Bharat Assam)

বঙাইগাঁও জিলা স্বাস্থ্য বিভাগৰ তৎপৰতাত এই পদক্ষেপ গ্ৰহণ

চহৰখনৰ মাজমজিয়াত থকা বিভিন্ন খাল আৰু নলাত সহকাৰী আয়ুক্ত গোলাম সাৰোৱাৰ হুছেইনৰ উপস্থিতিত স্বাস্থ্য বিভাগৰ কৰ্মীসকলে এৰি দিয়ে এই মহভক্ষী গাপী মাছবোৰ ৷

মহৰ বংশবৃদ্ধি ৰোধ কৰাৰ উদ্দেশ্যে গ্ৰহণ এই পদক্ষেপ (ETV Bharat Assam)

এই সন্দৰ্ভত বঙাইগাঁৱৰ সহকাৰী আয়ুক্ত গোলাম সাৰোৱাৰ হুছেইনে কয়, ‘‘বাৰিষাৰ কালছোৱা আমাৰ অসমত মহৰ বংশবৃদ্ধিৰ সময় ৷ এই মহে কামোৰাৰ ফলতেই জাপানীজ এনকেফেলাইটিছ, ডেংগু, মেলেৰিয়া ইত্যাদি ৰোগ বৃদ্ধি পায় । ৰাজ্য চৰকাৰে এই মহৰ বংশবৃদ্ধি ৰোধ কৰাৰ বাবেই যোগান ধৰা এই বিশেষ মাছবিধ আজি বঙাইগাঁৱৰ খাল, নলা ইত্যাদিত এৰি দিয়া হয় ৷ ইয়াৰ জৰিয়তে মহৰ উপদ্ৰৱ কিছু হ্ৰাস পাব বুলি আশা কৰিব পাৰি ৷’’

লগতে পঢ়ক: নোহোৱা হ’ল ঘোঁৰাগাড়ী; গৰাকীবিহীন ঘোঁৰাই অনাই-বনাই চৰিছে জোনাইৰ চিমেন চাপৰিত