কালৰূপী ডাম্পাৰ, প্ৰাণ ল'লে ছাত্ৰৰ
দুই ছাত্রৰ বাইক ওপৰৰে চলিল দ্ৰুতবেগী ডাম্পাৰ । মৃত্যুক আকোঁৱালি ল'লে বিজ্ঞান আৰু প্ৰযুক্তিবিদ্যা প্ৰতিষ্ঠানৰ ছাত্ৰই ।
Published : April 27, 2025 at 3:01 PM IST
যোৰহাট: ডাম্পাৰ দৌৰাত্ম্য বিষয়ে বুজি উঠি মুখ্যমন্ত্ৰী ড৹ হিমন্ত বিশ্ব শৰ্মাই অভিযান আৰম্ভ কৰিবলৈ বিভাগীয় বিভাগক নিৰ্দেশ দিছিল আৰু তাৰ পিছতেই ৰাজ্যজুৰি ডাম্পাৰ বিৰোধী অভিযান আৰম্ভ হৈছিল । কিন্তু তথাপিও কমা নাছিল ডাম্পাৰ অতপালি, ফলত এখন ঘাটক ডাম্পাৰ খুন্দাতে কলিতে মৰহি গ'ল এটি ভৱিষ্যত সম্ভাৱনা । যোৰহাটৰ 37নং ৰাষ্ট্ৰীয় ঘাইপথতৰ অজন্তা বাইপাছত শনিবাৰে সংঘটিত হয় এক শোকাবহ পথ দুৰ্ঘটনা ।
দুজন মহাবিদ্যালয়ৰ ছাত্ৰই চলাই যোৱা এখন বাইক মহটিয়াই নিয়ে দ্ৰুতবেগী এখন ডাম্পাৰে । ফলত দ্ৰুতবেগী ডাম্পাৰ খুন্দাত যোৰহাট বিজ্ঞান আৰু প্ৰযুক্তিবিদ্যা প্ৰতিষ্ঠান চমুকৈ JISTৰ এজন ছাত্ৰয়ে ঘটনাস্থলীতে প্ৰাণ হেৰুৱায় ৷ আনহাতে গুৰুতৰভাৱে আঘাতপ্ৰাপ্ত হয় আন এজন ছাত্ৰ । বিজ্ঞান আৰু প্ৰযুক্তিবিদ্যা প্ৰতিষ্ঠানৰ মৃগাংক শইকীয়া নামৰ এজন ছাত্ৰৰ ঘটনাস্থলীতে মৃত্যু হয় আৰু অন্য এজন ছাত্ৰ আহত হয় ।
মৃত ছাত্ৰজনৰ ঘৰ ডিব্ৰুগড়ত আৰু আঘাতপ্ৰাপ্ত ছাত্ৰ জনৰ ঘৰ নগাঁৱত বুলি জানিব পৰা গৈছে । এখন মটৰ চাইকেলত ছাত্ৰ দুজন গুৱাহাটী অভিমুখে গৈ থকা অৱস্থাত AS-04-8552 নম্বৰৰ এখন দ্ৰুতবেগী ডাম্পাখনে মহটিয়াই নিয়ে । দুৰ্ঘটনাৰ শিহৰণকাৰী সমগ্ৰ দৃশ্য বন্দী হৈছে চিচিটিভি কেমেৰাত । আনহাতে দুৰ্ঘটনা সংঘটিত কৰিয়েই ঘটনাস্থলীৰ পৰা পলায়ন কৰা ডাম্পাৰখন খেদি খেদি জব্দ কৰে স্থানীয় ৰাইজে । উল্লেখযোগ্য যে কিছুদিন পূৰ্বে উক্ত স্থানতেই এখন দ্ৰুতবেগী ডাম্পাৰে প্ৰাণ লৈছিল এজন স্কুটাৰ আৰোহীক । ৰাজপথত তাণ্ডৱ চলোৱা ঘাটকৰূপী ডাম্পাৰ বিৰুদ্ধে কঠোৰ ব্যৱস্থা গ্ৰহণ কৰিবলৈ দাবী জনাই সচেতন ৰাইজে ।
সমগ্ৰ ঘটনা সন্দৰ্ভত এগৰাকী প্ৰত্যক্ষদৰ্শীয়ে কয়, "ইয়াতে ৰৈ থাকোতেই দেখিলোঁ যে দুৰ্ঘটনাটো হ'ল । কেইজনমান মানুহে ক'লে ডাম্পাৰখন গৈ আছে বুলি । পিছা কৰি গৈ আমি ভিডিঅ'টো লৈ আহিলোঁ । দুৰ্ঘটনাত পতিত এজন ডিব্ৰুগড়ৰ বুলি কৈছে আৰু এজন নগাঁৱৰ বুলি কৈছে ।"
