ডিগবৈত ৰহস্যজনক গুলীচালনাত আহত এজন

তিনিচুকীয়া : তিনিচুকীয়া জিলাৰ ডিগবৈ থানাৰ অন্তৰ্গত নাজিৰাটিং অঞ্চলত দেওবাৰে এক গুলীচালনাৰ ঘটনা সংঘটিত হয় । এই ঘটনাক কেন্দ্ৰ কৰি অঞ্চলটোত সৃষ্টি হয় তীব্ৰ চাঞ্চল্যৰ । উক্ত ঘটনাত গুলীবিদ্ধ হয় ডিগবৈ ৰামনগৰৰ হেমন্ত শইকীয়া (৩৭) নামৰ এজন যুৱক ।

ঘটনা সন্দৰ্ভত হেমন্ত শইকীয়া আৰু তেওঁৰ পত্নীয়ে সদৰী কৰা অনুসৰি, এখন হুণ্ডাই গাড়ীৰে এগৰাকী সতীৰ্থৰ সৈতে হেমন্ত শইকীয়া নাজিৰাটিং অঞ্চলত উপস্থিত হয় । কিন্তু সতীৰ্থৰ সৈতে বাক-বিতণ্ডাত লিপ্ত হৈ কাজিয়াৰ সৃষ্টি হয় । তেনেতে হেমন্তক অস্ত্ৰৰে মূৰ, ভৰি আৰু হাতত উপৰ্যুপৰি আঘাত কৰে সতীৰ্থজনে । লগতে সতীৰ্থজনে হেমন্তৰ বুকুত গুলীওৱাৰ ফলত তেওঁ গুৰুতৰভাৱে আহত হয় আৰু সতীৰ্থজন ঘটনাস্থলীৰ পৰা পলায়ন কৰে ।

পৰৱৰ্তী সময়ত হেমন্তক ডিগবৈ অসামৰিক চিকিৎসালয়লৈ নিয়া হয় যদিও সংকটজনক অৱস্থাত উন্নত চিকিৎসাৰ বাবে ডিব্ৰুগড় আদিত্য নাৰ্চিং হোমলৈ প্ৰেৰণ কৰা হয় । বৰ্তমান চিকিৎসাধীন হেমন্ত শইকীয়া । হেমন্ত শইকীয়া পেছাত এগৰাকী ব্যৱসায়ী । কিন্তু কি কাৰণত কাজিয়াৰ সূত্ৰপাত হৈ গুলীচালনাৰ ঘটনা সংঘটিত হ’ল সেয়া ৰহস্যজনক ।

উক্ত ঘটনাক লৈ তিনিচুকীয়া জিলাৰ অতিৰিক্ত আৰক্ষী অধীক্ষক (ক্ৰাইম), মাৰ্ঘেৰিটা সমজিলাৰ আৰক্ষী বিষয়া ডিগবৈ আৰক্ষী থানাত উপস্থিত হোৱাৰ লগতে এটা দল ডিব্ৰুগড়ৰ আদিত্য নাৰ্ছিং হোমত উপস্থিত হৈ গুলীবিদ্ধ হেমন্ত শইকীয়াক সোধা-পোছা কৰে । আনহাতে, উক্ত ঘটনাৰ স’তে জড়িতৰ সন্দেহত ইতিমধ্যে এগৰাকী যুৱকক ডিগবৈ আৰক্ষীয়ে আটক কৰি ক্ষিপ্ৰ গতিত তদন্ত অব্যাহত ৰাখিছে ।

ইফালে ঘটনাটোক কেন্দ্ৰ কৰি সমগ্ৰ অঞ্চলজুৰি তীব্ৰ চাঞ্চল্যৰ সৃষ্টি হৈছে । উল্লেখ্য, হেমন্তৰ সৈতে কাজিয়াত লিপ্ত আটাইকেইজন সতীৰ্থই পলায়ন কৰিছে আৰু তেওঁলোককো হেমন্তই দাৰে ঘপিয়াই আঘাতপ্ৰাপ্ত কৰে বুলি নিজমুখে স্বীকাৰ কৰে যদিও ক’ত চিকিৎসাধীন হৈ আছে সেই তথ্য পোহৰলৈ অহা নাই ।