জিলা আয়ুক্তৰ বৃহৎ সিদ্ধান্ত : একেদিনাই ১৪৬ লাট মণ্ডলক বদলি
নগাঁও জিলা আয়ুক্ত দেৱাশীষ শৰ্মাৰ গুৰুত্বপূৰ্ণ সিদ্ধান্ত । দুৰ্নীতি নিৰ্মূলৰ স্বাৰ্থত একাংশ লাট মণ্ডলক ৰদ-বদল ।
Published : August 3, 2025 at 7:00 PM IST
নগাঁও : নগাঁও জিলাত দুৰ্নীতিৰ বিৰুদ্ধে কঠোৰ পদক্ষেপ গ্ৰহণ কৰিছে জিলা আয়ুক্ত দেৱাশীষ শৰ্মাই । জিলাখনৰ চক্ৰ বিষয়াৰ কাৰ্যালয়সমূহত দীৰ্ঘদিন ধৰি চলি অহা দুৰ্নীতিৰ অভিযোগৰ পৰিপ্ৰেক্ষিতত এক অভূতপূৰ্ব সিদ্ধান্ত গ্ৰহণ কৰিছে নগাঁৱৰ জিলা আয়ুক্তগৰাকীয়ে ।
জিলাৰ আটাইকেইটা চক্ৰ বিষয়া কাৰ্যালয়ৰ ১৪৬ গৰাকী লাট মণ্ডলৰ উপৰিও ৪ গৰাকী কানানগোকো একেদিনাই বদলি কৰাৰ নিৰ্দেশ জাৰি কৰা হৈছে । এই সিদ্ধান্ত নগাঁও জিলাৰ প্ৰশাসনিক ইতিহাসত এক বৃহৎ পদক্ষেপ হিচাপে চর্চা আৰম্ভ হৈছে ।
উল্লেখ্য যে, একাংশ লাট মণ্ডলৰ বিৰুদ্ধে দীৰ্ঘদিন ধৰি একেটা কাৰ্যালয়তে থাকি দুৰ্নীতিৰ সাম্ৰাজ্য গঢ়ি তোলাৰ গুৰুতৰ অভিযোগ উত্থাপিত হৈ আহিছিল । আনকি একাংশ লাট মণ্ডলৰ বিৰুদ্ধে ২৮ বছৰ পৰ্যন্ত একেটা কাৰ্যালয়ত থাকি নিজৰ পদৰ অপব্যৱহাৰ কৰি দুৰ্নীতিৰ সাম্ৰাজ্য গঢ়ি তোলাৰো আছে অভিযোগ । এনে অভিযোগৰ পৰিপ্ৰেক্ষিতত জিলাৰ সাধাৰণ জনতাৰ মাজতো তীব্ৰ অসন্তোষৰ সৃষ্টি হৈছিল ।
জনসাধাৰণৰ মাজত প্ৰশাসনৰ প্ৰতি আস্থা পুনৰুদ্ধাৰৰ লক্ষ্যৰে জিলা আয়ুক্ত দেৱাশীষ শৰ্মাই অৱশেষত আটাইকেইগৰাকী মণ্ডলক ৰদ বদলৰ দৰে এই কঠোৰ সিদ্ধান্ত গ্ৰহণ কৰিছে । ইফালে মৰিগাঁও জিলাৰ আয়ুক্ত হিচাপে দায়িত্ব লোৱাৰ পিছতে দেৱাশীষ শৰ্মাই জিলাখনৰ প্ৰশাসনক স্বচ্ছ আৰু দুৰ্নীতিমুক্ত কৰাৰ প্ৰতিশ্ৰুতি প্ৰদান কৰিছিল । তাৰ অংশ হিচাপেই জিলাখনৰ সকলো চক্ৰ বিষয়া কাৰ্যালয়ৰ লাট মণ্ডলক ৰদ-বদল কৰি একপ্ৰকাৰ সকলোৰে দৃষ্টি আকৰ্ষণ কৰিছে ।
দীৰ্ঘদিন ধৰি একেটা কাৰ্যালয়ত থকা লাট মণ্ডলৰ বিৰুদ্ধে দুৰ্নীতিৰ অভিযোগ লাভ কৰাৰ পৰিপ্ৰেক্ষিতত তেওঁলোকক বদলি কৰি কাম-কাজত স্বচ্ছতা আৰু দক্ষতা অনাৰ উদ্দেশ্যেই এই সিদ্ধান্ত গ্ৰহণ কৰা বুলি উল্লেখ কৰে জিলা আয়ুক্ত দেৱাশীষ শৰ্মাই ।
জিলা আয়ুক্তই গ্ৰহণ কৰা এই সিদ্ধান্তক নগাঁও জিলাৰ জনসাধাৰণেও ব্যাপক আদৰণি জনাইছে । নগাঁৱৰ জনতাৰ মতে এই ৰদ-বদলৰ ফলত প্ৰশাসনৰ স্বচ্ছতা বৃদ্ধি পাব আৰু দুৰ্নীতিৰ বিৰুদ্ধে এক শক্তিশালী বাৰ্তা প্ৰেৰণ হ'ব । স্থানীয় লোকসকলে এই পদক্ষেপক জিলাৰ প্ৰশাসনিক ব্যৱস্থাৰ সংস্কাৰৰ এক গুৰুত্বপূৰ্ণ পদক্ষেপ হিচাপে গণ্য কৰিছে ।
সোমবাৰৰ পৰা ৰাজহ চক্ৰ বিষয়াৰ কাৰ্যালয়ৰ বিৰুদ্ধে থকা ৰাইজৰ অভিযোগৰ শুনানি গ্ৰহণৰ ব্যৱস্থা কৰাৰ কথাও উল্লেখ কৰে জিলা আয়ুক্ত দেৱাশীষ শৰ্মাই । বিষয়া, কৰ্মচাৰীৰ গাফিলতিৰ বাবে সাধাৰণ ৰাইজে যাতে কোনো হাৰাশাস্তিৰ সন্মুখীন হ'ব নালাগে তাৰ ব্যৱস্থা গ্ৰহণৰ কথাও জানিবলৈ দিয়ে জিলা আয়ুক্ত দেৱাশীষ শৰ্মাই ।
এই সন্দৰ্ভত তেওঁ কয়, "নগাঁও জিলাখনত আমি যোৱা ডেৰ মাহে বহুতো তেনে অভিযোগ পাইছো যে এজন সাধাৰণ নাগৰিক যেনে বৃদ্ধ-বিধৱা মহিলা পৰ্যন্ত সাধাৰণ মাটিৰ কামত দালাল চক্ৰ সোমাই যায় বা কেতিয়াবা কিবা কাৰণবশতঃ তেওঁলোকৰ কাম নহয় । সোমবাৰৰ পৰা পুৱা ১০ বজাৰ পৰা গধূলি ৮ বজালৈ মই শুনানি লম । মই এটা আহ্বান জনাম যদি নগাঁও জিলাত কোনো লোকে মাটিৰ কামত আহি কিবা অসুবিধা পাইছে, হাৰাশাস্তি পাইছে আমাৰ ওচৰলৈ আহিব । আমাৰ চেম্বাৰত বহি থাকিম আৰু তেওঁলোকৰ শুনানি লম...। বিধিগত কাম যদি কিবা আছে সোনকালে কৰি দিয়াৰ ব্যৱস্থা কৰিম ।"
লগতে পঢ়ক :সম্পন্ন হ'ল উচ্ছেদ অভিযান, উন্মোচিত হ'ল অপৰাধৰ এক তথ্য় - URIAMGHAT EVICTION
