গুৱাহাটী: ভৱেশ কলিতাৰ নাম মন্ত্ৰিত্বৰ বাবে চৰ্চালৈ অহা প্ৰসংগত সাংবাদিকৰ প্ৰশ্নত মুখ্যমন্ত্ৰীৰ স্পষ্ট মন্তব্য, “মইতো দূৰ দুৰলৈ ক’তো শুনা নাই । একেবাৰে দূৰ-দূৰণিলৈকে চালেও শুনা নাই ৷ আমাৰ বিধানসভা নিৰ্বাচনৰ আগলৈকে কোনো মন্ত্ৰীসভা সম্প্ৰসাৰণৰ সম্ভাৱনা নাই ।”
আকৌ মন্ত্ৰী হ’ব বিজেপিৰ সদ্যবিদায়ী ৰাজ্যিক সভাপতি ভৱেশ কলিতা ! বৃহস্পতিবাৰে এই বিষয়টোৱে ব্যাপক চৰ্চা লাভ কৰাৰ মাজতে গুৱাহাটীত মুখ্যমন্ত্ৰী হিমন্ত বিশ্ব শৰ্মাৰ ঘোষণা বিধানসভা নিৰ্বাচনৰ পূৰ্বে মন্ত্ৰীসভা সম্প্ৰসাৰণৰ সম্ভাৱনা নাই । লগে লগে চেঁচা পানী পৰিল ভৱেশ কলিতাৰ মন্ত্ৰিত্ব লাভৰ সম্ভাৱনাত ।
শেহতীয়াভাৱে ৰাজ্যিক সভাপতিৰ দায়িত্বৰ পৰা ভৱেশ কলিতাই অব্যাহতি লোৱাৰ পিছত প্ৰশ্ন উঠিছিল বিজেপি বা মুখ্যমন্ত্ৰী হিমন্ত বিশ্ব শৰ্মাই ক’ত সংস্থাপিত কৰিব ভৱেশ কলিতাক ? তেতিয়াই চৰ্চা হৈছিল পুনৰ মন্ত্ৰিত্ব লাভ কৰিব ভৱেশ কলিতাই ৷ যোৱা ডিচেম্বৰ মাহত মুখ্যমন্ত্ৰী হিমন্ত বিশ্ব শৰ্মাই মন্ত্ৰীসভাৰ সম্প্ৰসাৰণ ঘটাইছিল । চাৰিগৰাকীকৈ নতুন মন্ত্ৰী অন্তৰ্ভুক্ত কৰিছিল । তাৰ কিছুদিনৰ পিছতেই বিজেপিৰ নতুন ৰাজ্যিক সভাপতি ৰূপে দায়িত্ব প্ৰদান কৰা হয় সাংসদ দিলীপ শইকীয়াক ৷ এক কথাত সভাপতি পদৰ পৰা অব্যাহতি পোৱাৰ পিছত দলত সাধাৰণ সদস্য হৈ পৰিল ভৱেশ কলিতা । সেয়ে, ২০২৬ৰ বিধানসভা নিৰ্বাচনৰ প্ৰাকক্ষণত ভৱেশ কলিতাক সংস্থাপন কৰাটো প্ৰাসংগিক হৈ পৰিছিল ।
মন্ত্ৰীসভাত কিমান মন্ত্ৰী থাকিব পাৰে ? এতিয়াও খালী এটা পদ:
নীতি অনুসৰি বিধানসভাৰ মুঠ সদস্য সংখ্যাৰ ১৫ শতাংশহে চৰকাৰৰ মন্ত্ৰীসভাৰ সদস্য থাকিব পাৰে । সেই অনুসৰি বিধিগত হিচাবে অসম চৰকাৰৰ মন্ত্ৰীসভাত মুঠ ১৯ গৰাকী সদস্য থাকিব পাৰে । মুখ্যমন্ত্ৰীকে ধৰি বৰ্তমান অসম চৰকাৰৰ মন্ত্ৰীসভাৰ সদস্যৰ সংখ্যা হ’ল ১৮ গৰাকী । এতিয়াও এটি মন্ত্ৰী পদ খালী হৈ আছে হিমন্ত বিশ্ব শৰ্মা মন্ত্ৰীসভাত ৷ সেয়ে ভৱেশ কলিতাক খালী থকা অৱশিষ্ট মন্ত্ৰী পদটোত সংস্থাপিত কৰাৰ কথা ব্যাপক চৰ্চিত হৈছিল । আনকি ৰাজহ বিভাগৰ মন্ত্ৰীৰ দায়িত্ব ভৱেশ কলিতাক অৰ্পণ কৰিব বুলিও চৰ্চা লাভ কৰিছিল ।
উল্লেখ্য যে, ২০২১ত গঠিত হোৱা হিমন্ত বিশ্ব শৰ্মা মন্ত্ৰী সভাত স্থান লাভ কৰা নাছিল ভৱেশ কলিতাই । ২০২১ত দলটোৰ ৰাজ্যিক সভাপতি ৰূপে কলিতাক দায়িত্ব অৰ্পণ কৰা হয় ৷ ২০২১ চনৰ পৰা অসম বিজেপিৰ ৰাজ্যিক সভাপতিৰূপে ২০২৪ৰ ডিচেম্বৰলৈ কাৰ্যনিৰ্বাহ কৰিছিল ভৱেশ কলিতাই । ২০১৬ চনত প্ৰথমবাৰৰ বাবে তেওঁ অসম বিধানসভালৈ ৰঙিয়া সমষ্টিৰ পৰা জয়লাভ কৰে । ২০১৬ চনৰ পৰা ২০২১ চনলৈকে তেওঁ জলসিঞ্চন বিভাগৰ ৰাজ্যিক মন্ত্ৰীৰ দায়িত্বৰ লগতে শিক্ষা বিভাগৰ ৰাজ্যিক মন্ত্ৰীৰ দায়িত্বও বহন কৰিছিল ৷ আনহাতে অহা ১৭ ফেব্ৰুৱাৰীৰ পৰা অসম বিধানসভাৰ বাজেট অধিৱেশন । তাৰ পূৰ্বে মন্ত্ৰীসভাৰ সঁচাকৈ সালসলনি ঘটাবনে মুখ্যমন্ত্ৰীয়ে ? এই সকলো চৰ্চাৰ সমাপ্তি ঘটাই অৱশেষত মুখ্যমন্ত্ৰী হিমন্ত বিশ্ব শৰ্মাই ঘোষণা কৰে যে বিধানসভা নিৰ্বাচনৰ পূৰ্বে মন্ত্ৰীসভা সম্প্ৰসাৰণৰ সম্ভাৱনা নাই । ২০২৬ৰ বিধানসভা নিৰ্বাচনলৈকে দ্বিতীয়বাৰৰ মন্ত্ৰী হোৱাৰ পথ ৰুদ্ধ হ’ল ভৱেশ কলিতাৰ । ভৱেশ কলিতাই অপেক্ষা কৰিব লাগিব ২০২৬ত নিজে পুনৰ বিধায়ক হৈ অহালৈ ৷
লগতে পঢ়ক: পূজাৰ আগতেই বড়োভূমিৰ নিৰ্বাচন; নিৰ্বাচনমুখী বি টি আৰত ব্যস্ত মুখ্যমন্ত্ৰীৰ ঘোষণা
