লখিমপুৰ বাণিজ্য মহাবিদ্যালয়ত হ’ব জাপানী ভাষাৰ শিক্ষাদান

লখিমপুৰ : উচ্চশিক্ষা গ্ৰহণ কৰি বিদেশত গৈ এটা চাকৰি কৰাৰ বাবে বহুতৰ হাবিয়াস থাকে । কিন্তু বিভিন্ন কাৰণত ভবা মতে নহয় গৈ । খুউব কম সংখ্যককহে এনে সৌভাগ্যই লগ দিয়ে । পিছে এইবাৰ ওলাইছে এক সুবৰ্ণ সুযোগ । জাপানত চাকৰি কৰাৰ বাবে এক সুযোগ সৃষ্টি হৈছে । জাপানৰ বিভিন্ন ক্ষেত্ৰত নিয়োগৰ এক সুযোগ সৃষ্টি হৈছে । তাৰ বাবে কিন্তু প্ৰথমে শিকি ল’ব লাগিব জাপানী ভাষা । তাৰো ব্যৱস্থা কৰা হৈছে ।

মিৰাই (MIRAI) জাপানীজ লাৰ্ণিং চেন্টাৰে তাৰ ব্যৱস্থা কৰিছে ৷ বিভিন্ন মহাবিদ্যালয়ৰ সৈতে চুক্তিবদ্ধ হৈ এবছৰীয়া জাপানী ভাষা শিক্ষণ কাৰ্যক্ৰম আৰম্ভ কৰিছে ৷ এবছৰীয়া জাপানী ভাষাৰ পাঠ্যক্ৰম সফলতাৰে উত্তীৰ্ণ হোৱা সকলক জাপানী বিভিন্ন কোম্পানীৰ সৈতে নিয়োগৰ ব্যৱস্থা, পাৰপত্ৰ, ভিছা আদিৰ সকলো ব্যৱস্থা কৰি দিব মিৰাই-জাপানীজ লাৰ্ণিং চেন্টাৰে ।

ৰাজ্যত ২০১৭ চনৰ পৰা জাপানী ভাষাৰ শিক্ষাদান আৰম্ভ কৰা এই কেন্দ্ৰই ইতিমধ্যে ৰাজ্যৰ পাঁচখন মহাবিদ্যালয়ৰ সৈতে চুক্তিবদ্ধ হৈ জাপানী ভাষা শিক্ষাৰ ব্যৱস্থা কৰিছে । শেহতীয়াকৈ মঙলবাৰে লখিমপুৰ বাণিজ্য মহাবিদ্যালয়ৰ সৈতে চুক্তিবদ্ধ হয় ।

কেন্দ্ৰটোৰ সঞ্চালক হেমন্ত মজুমদাৰ আৰু মহাবিদ্যালয়ৰ অধ্যক্ষ ড৹ লোহিত হাজৰিকাই এই চুক্তিপত্ৰত স্বাক্ষৰ কৰে । সঞ্চালকজনে জনোৱা মতে, ইতিমধ্যে জাপানী ভাষা শিকি দক্ষ হোৱা অসমৰ কিছু শিক্ষকৰ লগতে জাপানৰ পৰা শিক্ষকেও পাঠদান কৰিব । অধ্যক্ষ ড৹ লোহিত হাজৰিকাই মহাবিদ্যালয়খনত এই ভাষাৰ শিক্ষাৰ প্ৰচলনে লখিমপুৰৰ দাতি কাষৰীয়া জিলা কেইখনৰ লগতে অৰুণাচল প্ৰদেশৰ ছাত্ৰ-ছাত্ৰী উপকৃত কৰিব বুলি কয় ।

লখিমপুৰ বাণিজ্য মহাবিদ্যালয় (ETV Bharat)

উল্লেখ্য যে, এনেদৰে জাপানী ভাষা শিকাৰ লগে লগে কৰ্মসংস্থাপনৰো নিশ্চিতি দিয়া হৈছে । নিবনুৱা সমস্যাৰে ভাৰাক্ৰান্ত কৰা ৰাজ্যখনত এতিয়া এনে ভাষাৰ শিক্ষা লৈ সংস্থাপনৰ নিশ্চিতিয়ে বহুতৰ বাবে আশাৰ সঞ্চাৰ কৰিব ।

লক্ষণীয় যে জাপানী ভাষা শিক্ষা লোৱাৰ পাছত জাপানলৈ নোযোৱাকৈয়ো দেশৰ ভিতৰতে থকা জাপানৰ কোম্পানীতো ইচ্ছুক সকলে চাকৰি কৰিব পাৰিব । মেৰাই-জাপানীজ লাৰ্ণিং চেন্টাৰৰ তৰফৰ পৰা এই কথা সদৰী কৰিছে ৷