বিশ্ব ঐতিহ্য সমিতিৰ সন্মিলন : চৰাইদেউ মৈদামৰ বাবে আহিব পাৰে ভাল খবৰ - Charaideo Maidam

মৰাণ, ১৩ জুলাই: ২১ জুলাইৰ পৰা ৩১ জুলাইলৈকে নতুন দিল্লীত অনুষ্ঠিত হ'ব ইউনেস্কোৰ বিশ্ব ঐতিহ্য সমিতিৰ ৪৬ সংখ্যক সন্মিলন । এই সন্মিলনৰ পূৰ্বে শনিবাৰে হঠাতে চৰাইদেউ মৈদামত উপস্থিত হয় মন্ত্ৰী নন্দিতা গাৰ্লোচা । এই পৰিদৰ্শনে বিশ্ব ঐতিহ্য ক্ষেত্ৰৰ স্বীকৃতি লাভৰ দিশত চৰাইদেউ মৈদামে আৰু এখোজ আগবাঢ়ি যোৱাৰ ইংগিত বহন কৰিছে । কোনো আসোঁৱাহ নথকাকৈ ইতিমধ্যে মৈদামৰ মনোনয়ন ইউনেস্ক'ত গ্ৰহণ কৰাৰ পাচতেই বিশ্ব ঐতিহ্য ক্ষেত্ৰৰ নাম তালিকাত স্থান পোৱাৰ দিশে আগবাঢ়িছে আহোমৰ ৬০০ বছৰীয়া সোণালী ইতিহাস বহন কৰা চৰাইদেউ মৈদামস্থলী ।

চৰাইদেউ মৈদাম ক্ষেত্ৰ পৰিদৰ্শনৰ সময়ত মন্ত্ৰীগৰাকীৰ সৈতে সোণাৰি সমষ্টিৰ বিধায়ক ধৰ্মেশ্বৰ কোঁৱৰ, অসম প্ৰত্নতত্ব বিভাগৰ সঞ্চালক দীপিৰেখা কুলিৰ লগতে বিভাগীয় বিষয়াসকল উপস্থিত থাকে ।

উল্লেখ্য যে এই সন্মিলনত বিশ্ব ঐতিহ্য ক্ষেত্ৰৰ বাবে মনোনয়ন প্ৰেৰণ কৰা স্থানসমূহৰ বিষয়ে আলোচনা কৰা হ'ব । ইয়াৰ পৰিপ্ৰেক্ষিতত ২৭ জুলাইত ভাৰতৰ একমাত্ৰ মনোনয়ন লাভ কৰা চৰাইদেউ মৈদামেও এই স্বীকৃতি লাভৰ সম্ভাৱনা আছে । তেনে সময়তে আজি মন্ত্ৰী নন্দিতা গাৰ্লোচাই চৰাইদেউ মৈদাম ক্ষেত্ৰ পৰিদৰ্শন কৰা কাৰ্যই তাৎপৰ্য বহন কৰিছে ।

আনহাতে ,সোণাৰি সমষ্টিৰ বিধায়ক ধৰ্মেশ্বৰ কোঁৱৰে ইউনেস্কোৰ বিশ্ব ঐতিহ্য সমিতিৰ ৪৬ সংখ্যক সন্মিলনৰ পৰা চৰাইদেউ মৈদামৰ বাবে ভাল খবৰ আহিব বুলি আশাবদী বুলি মন্তব্য় কৰে ।