ভোগৰ উৎসৱ ভোগালী: পুৱাই গায়ন-বায়ন সহিতে খোল-তাল বজাই দাহ কৰা হ’ল মেজি

মাজুলী : আজি ভোগৰ উৎসৱ ভোগালী বিহু ৷ কালি উৰুকাৰ নিশা ভেলাঘৰত লগে-ভাগে এসাঁজ খাই চহা অসমীয়াই আজি পুৱাই অগ্নি পূজা কৰি দাহ কৰিছে মেজি ৷ অৱশ্যে আধুনিকতাৰ ধামখুমিয়াত বৰ্তমান সময়ত ভেলাঘৰৰ পৰিৱৰ্তে আপোনজনৰ সৈতে ঘৰৰ চোতালতে এসাঁজ ৰান্ধি সকলোৱে প্ৰীতিভোজ খোৱা দেখা গৈছে ৷

উজনিৰ পৰা নামনিলৈ মাঘৰ এই জাৰকো আওকাণ কৰি পুৱাই সকলো নিত্য-কৰ্ম কৰি মেজিৰ কাষত অগ্নি দেৱতাক সেৱা কৰা দৃশ্য দেখা গৈছে ৷ বাদ পৰি ৰোৱা নাই সত্ৰনগৰী মাজুলীও ৷ ৰাজ্যৰ আন প্ৰান্তৰ লেখিয়াকৈ সত্ৰ নগৰী মাজুলীটো ভোগৰ এই বিহুটিক লৈ এক উখল-মাখল পৰিৱেশে বিৰাজ কৰা দেখা গৈছে ।

মাজুলীৰ বিভিন্ন প্ৰান্তৰ লগতে ঐতিহাসিক দাক্ষিণপাট সত্ৰটো পুৱাই মেজি জ্বলোৱা হয় ৷ ঐতিহাসিক সত্ৰখনৰ সত্ৰাধিকাৰগৰাকীৰ উপস্থিতিত বৰবায়ন, বৰগায়নসকলে খোল-তাল বজাই ভকত বৈষ্ণৱসকলে মেজি প্ৰদক্ষিণ কৰি এক আধ্যাত্মিক পৰিৱেশৰ মাজেৰে মেজিত অগ্নিসংযোগ কৰে ।

ঐতিহাসিক সত্ৰখনৰ সত্ৰাধিকাৰ ননীগোপাল দেৱ গোস্বামীয়ে অসমবাসীলৈ মাঘ বিহুৰ শুভেচ্ছা জ্ঞাপন কৰি কয়, ‘‘মাঘৰ বিহু উপলক্ষে সকলোলৈ বিহুৰ শুভেচ্ছা আৰু শুভকামনা যাছিলো ৷ ভোগালীৰ এই অগ্নি পূজন, ইয়াৰ পূজনৰ মাধ্যমেৰে সকলোৰে অশান্তি দূৰ হওক ৷ সকলোৰে মনত শান্তি প্ৰতিষ্ঠা হৈ এখন সুস্থ-সবল সমাজ গঢ় লওক - তাকে আমি কামনা কৰিছো ৷’’

‘‘ভোগালীৰ ভোগৰ লগতে অগ্নি পূজনৰ এটা মহান পৰম্পৰা আছে ৷ অগ্নিৰ মাধ্যমেৰে আমাৰ সনাতন পৰম্পৰাই হওক, হিন্দু সমাজৰ জাতিত্ব গঠনেই হওক - অগ্নিৰ বাহিৰে একো সম্ভৱ নহয় ৷ সেইকাৰণে অগ্নি পূজাৰ মাধ্যমেৰে মানৱে খেতি আদি সম্পাদন কৰাৰ পিচত এনেদৰে অগ্নি পূজা কৰে ৷ এই অগ্নিয়ে সকলো অশান্তি দূৰ কৰক, তাৰেই পুনৰবাৰ কামনা কৰিলো ৷’’ ননীগোপাল দেৱ গোস্বামীয়ে কয় ৷