সকলোকে মন্ত্ৰমুগ্ধ কৰি একেলগে তিনি সহস্ৰ বিহুৱা-নাচনীয়ে কঁপালে অসমৰ এক ঐতিহাসিক ঠাই
গোসাঁই বিহুৰ দিনাই নলবাৰীত তিনি হাজাৰ নাচনীয়ে নাচিলে বিহু । নলবাৰীৰ গৰ্ডন খেলপথাৰত বিহুনাচে মুহিলে অতিথি, ৰাইজক ।
Published : April 16, 2025 at 4:33 PM IST
নলবাৰী : সমগ্ৰ ৰাজ্যতে এতিয়া ৰঙালীৰ ৰং । ঢোলৰ গুমগুমনি, পেঁপাৰ তিহিটি, টকা-গগণাৰ কলৰৱত মুখৰিত হৈ আছে আকাশ-বতাহ । বিহুৱা-নাচনীৰ গাত তৎ নাইকিয়া, যেন উজুতিত ছিঙিব যঁতৰ । ৰঙালী বিহুৰ আনন্দত উৎসৱমুখ ৰাজ্যৰ চৌদিশ । ৰজনজনাই আছে বিহুতলিসমূহ ।
আজি ব'হাগৰ ২ তাৰিখ । দ্বিতীয় ব'হাগত পালন কৰা হয় গোসাঁই বিহু । ইয়াৰ মাজতেই বুধবাৰে নলবাৰীত একেলগে বিহু নাচিলে তিনি সহস্ৰাধিক বিহুৱতীয়ে । তিনি সহস্ৰাধিক বিহুৱতীৰ বিহুনাচত কঁপি উঠিল নলবাৰীৰ গৰ্ডন উচ্চতৰ মাধ্যমিক বিদ্যালয়ৰ খেলপথাৰ ।
নলবাৰী মহকুমা বিহু সন্মিলনৰ উদ্যোগত বুধবাৰে দিনৰ ১১ বজাত প্ৰদৰ্শন কৰা হয় এই মুকলি বিহু । প্ৰায় তিনিদিনৰ আখৰাৰ অন্তত বুধবাৰে গৰ্ডন খেলপথাৰত এনেদৰে তিনি হাজাৰোধিক নাচনী আৰু বিহুৱাই নাচিলে বিহু । আনহাতে, প্ৰথমবাৰৰ বাবে এক বিৰল মুহূৰ্তৰ সাক্ষী হ'ল অধীৰ আগ্ৰহেৰে ৰৈ থকা নলবাৰীবাসীৰ লগতে মন্ত্ৰী জয়ন্ত মল্লবৰুৱা, আমন্ত্ৰিত অতিথি আৰু বিহুবলীয়া ৰাইজ ।
আনহাতে, গৰ্ডন উচ্চতৰ মাধ্যমিক বিদ্যালয়ৰ খেলপথাৰত এই প্ৰদৰ্শনৰ পৰাই অহাবাৰলৈ ৫ হাজাৰ নাচনীক নচুওৱাৰ সংকল্প মন্ত্ৰী জয়ন্ত মল্লবৰুৱা আৰু উদ্যোক্তা সমিতিৰ । অহা বছৰ ৫ হাজাৰ নাচনীক ফ্লাড লাইটৰ তলত এইখন খেলপথাৰতেই নচুৱাব বুলি উল্লেখ কৰি নাচনীসকলক মানপত্ৰ প্ৰদান কৰে মন্ত্ৰী জয়ন্ত মল্লবৰুৱাই ।
অনুষ্ঠান সন্দৰ্ভত মন্ত্ৰীগৰাকীয়ে কয়, "সঁচাকৈয়ে আমাৰ কাৰণে এটা গৌৰৱৰ দিন যে নলবাৰীৰ দৰে এখন সৰু জিলাত একেলগে তিনি হাজাৰ নাচনীয়ে গৰ্ডন খেলপথাৰত বিহুনৃত্য কৰি সকলোৱে ইতিহাসৰ সাক্ষী হ'ল । নলবাৰীৰ দৰে জিলাখনত একেলগে তিনি হাজাৰ নাচনীয়ে নচাটো আগতে কেতিয়াও হোৱা নাছিল । আৰু মই যিধৰণৰ উৎসাহ এইকেইটাদিন দেখিলোঁ আৰু যোৱাকেইটা দিন ৰিহাৰ্চেলৰ পৰা সকলো সময়তে নাচনী, ঢুলীয়াৰ যি উৎসাহ, এই উৎসাহে নিশ্চয়কৈ প্ৰতীয়মান কৰিছে যে প্ৰত্যেকজন যুৱক-যুৱতীয়ে অসমীয়া সংস্কৃতিৰ লগত, অসমীয়া গীত-নৃত্যৰ লগত নিজকে জড়িত কৰাব বিচাৰে । মই আশা ৰাখিছোঁ যে অহাবাৰ ইয়াৰ সংখ্যা বৃদ্ধি হ'ব । আজি সকলোৱে কৈছে যে অহাবাৰ ৫ হাজাৰ যুৱক-যুৱতীৰে ইয়াত নৃত্য প্ৰদৰ্শন কৰিম । আৰু অহাবাৰ আণি ফ্লাড লাইটৰ তলত কৰিম ।"
