গুৱাহাটী : মুখ্যমন্ত্ৰী হিমন্ত বিশ্ব শৰ্মাৰ নিৰ্দেশমৰ্মে অসম আৰক্ষীয়ে অব্যাহত ৰাখিছে দুৰ্নীতিৰ বিৰুদ্ধে অভিযান । এইবাৰ ‘‘অপাৰেশ্যন ঘোষ্ট ছিম’’ (Operation Ghost SIM) অধীনত ভুৱা ছিমকাৰ্ডৰ বেহা চলোৱা চক্ৰৰ মূল অভিযুক্তক বিশেষ টাক্স ফʼৰ্চৰ দ্বাৰা গ্ৰেপ্তাৰ কৰা হৈছে ৷ বিশেষ টাক্স ফʼৰ্চে গ্ৰেপ্তাৰ কৰা লোকজন হৈছে ধুবুৰীৰ গোলকগঞ্জৰ মুস্তাফা ৰহমান (২৯) ৷ ধুবুৰী আৰক্ষীৰ সহযোগত টাক্স ফʼৰ্চে শনিবাৰে নিশা ধুবুৰীত অভিযান চলাই অভিযুক্ত ৰহমানক গ্ৰেপ্তাৰ কৰিবলৈ সক্ষম হয় ।
টাক্স ফʼৰ্চৰ অভিযানকাৰী দলটোৱে ধৃত ৰহমানৰ পৰা এটা লেপটপ, দুটা ম’বাইল ফোন, ৩ টা ক্ষুদ্ৰ এ টি এম মেচিন, এটা বায়’মেট্ৰিক ডিভাইচ, ৬ খনকৈ এ টি এম কাৰ্ড, ১১ খন ভোটাৰ আই ডি আৰু এখন পেন আৰু এখন আধাৰকাৰ্ড জব্দ কৰিছে ৷ এই কথা প্ৰেছ বিবৃতিযোগে সদৰী কৰিছে অসম আৰক্ষীয়ে । অসম আৰক্ষীয়ে উল্লেখ কৰা অনুসৰি অপাৰেশ্যন ঘোষ্ট ছিমৰ অধীনত বিশেষ টাক্স ফʼৰ্চে এই পৰ্যন্ত মুঠ ১১ জন লোকক গ্ৰেপ্তাৰ কৰিছে ।
উল্লেখ্য যে, ভাৰতীয় সেনাৰ গজৰাজ কৰ্প’ছৰ চোৰাংচোৱাৰ খবৰৰ আধাৰত বিশেষ শাখা আৰু বিশেষ টাক্স ফʼৰ্চে অপাৰেশ্যন ঘোষ্ট ছিম (GHOST SIM) নামেৰে ভুৱা ছিমকাৰ্ডৰ বেহা চলোৱা চক্ৰৰ বিৰুদ্ধে আৰম্ভ কৰিছিল অভিযান ।
বিগত ১৪ মে'ত এছ টি এফ ৬১(২)/১৪৭/১৪৮/৬২ BNS, ধাৰা ১৮ UA(P) আইন আৰু IT Act-ৰ ৬৬ ধাৰাৰ অধীনত ২/২০২৫ নম্বৰত এটি গোচৰ ৰুজু কৰি ১৬ মে’ৰ পৰা অপাৰেশ্যন ঘোষ্ট ছিম অভিযান আৰম্ভ কৰে । ভাৰতৰ ৰাজস্থান, তেলেংগানা আৰু অসমৰ ধুবুৰীত এই অভিযান চলাই আৰক্ষীয়ে বৰ্তমানলৈ ১১ জন লোকক গ্ৰেপ্তাৰ কৰিবলৈ সক্ষম হৈছে ৷
লগতে পঢ়ক: অসম আৰক্ষীৰ অপাৰেশ্যন 'ঘোষ্ট ছীম'ত জালত পৰিল ৭ - ASSAM POLICE OPERATION GHOST SIM
