শিলচৰ, 12 ছেপ্টেম্বৰ : ক্ৰমাৎ অধিক হিংসাত্মক হৈ পৰিছে মণিপুৰৰ পৰিস্থিতি । ইম্ফলৰ পাচত এইবাৰ পুনৰ এক বিক্ষোভ মণিপুৰৰ জিৰিবাম জিলাত ৷ এই বিক্ষোভ সমদলক কেন্দ্ৰ কৰি উত্তপ্ত হৈ পৰিছে চুবুৰীয়া মণিপুৰৰ জিৰিবাম জিলা । জনজাতীয় অধিকাৰ তথা পাহাৰীয়া অধিকাৰৰ দাবীত জিৰিবাম জিলাৰ জাকুৰাডহৰত বাহিৰ কৰা হয় এক প্ৰতিবাদী সমদল ৷
বৃহস্পতিবাৰে পুৱাই অঞ্চলটোৰ নেতাজী মাধ্যমিক বিদ্যালয়ৰ পৰা কুকি আৰু মাৰসহ বিভিন্ন জনজাতিৰ লোকে বাহিৰ কৰা এই সমদলত প্ৰায় তিনি হাজাৰ লোকে অংশগ্ৰহণ কৰে । হাতত বিভিন্ন প্লে’কাৰ্ড লৈ ওলাই অহা এই সমদলটো কিছু দূৰ যোৱাৰ পাচত মণিপুৰ আৰক্ষীয়ে বাধা প্ৰদান কৰে । ইয়াকে কেন্দ্ৰ কৰি এক উত্তপ্ত পৰিস্থিতিৰ সৃষ্টি হয় ।
আনকি আৰক্ষী আৰু প্ৰতিবাদকাৰী লোকসকলৰ মাজত আৰম্ভ হয় খণ্ডযুদ্ধৰ । প্ৰতিবাদকাৰীসকলে আৰক্ষীৰ বেৰিকেড ভাঙি সমদল আগবঢ়াই নিবলৈ চেষ্টা কৰে ৷ উপায়ন্তৰ হৈ পৰিস্থিতি নিয়ন্ত্ৰণৰ বাবে আৰক্ষীয়ে শূন্যলৈ কেইবা ৰাউণ্ড গুলীচালনা কৰাৰ লগতে কন্দুৱা গেছ নিক্ষেপ কৰে । ফলত সমদলত অংশগ্ৰহণ কৰা লোকসকলে ছত্ৰভংগ দিয়া পৰিলক্ষিত হয় । ঘটনাক কেন্দ্ৰ কৰি জাকুৰাডহৰ অঞ্চলত এক উত্তপ্ত পৰিস্থিতিৰ সৃষ্টি হয় ।
লগতে পঢ়ক : মণিপুৰ হিংসা সন্দৰ্ভত কেন্দ্ৰক তীব্ৰ সমালোচনা কংগ্ৰেছৰ, প্ৰেৰণ কৰিব প্ৰতিনিধি দল - Manipur Violence
ইপিনে প্ৰতিবাদকাৰী কুকি লোকসকলে কেমেৰাৰ সম্মুখত কয় যে জিৰিবামক পাৰ্বত্য অঞ্চল ঘোষণা নকৰিলে এই আন্দোলনে আৰু এক ভয়াৱহ ৰূপ ধাৰণ কৰিব ৷ এগৰাকী প্ৰতিবাদকাৰীয়ে কয়, ‘‘1948 চনতে আমাৰ ৰাষ্ট্ৰপতিয়ে পাহাৰীয়া জিলা হিচাবে ঘোষণা কৰিছিল ৷ 2017 পৰ্যন্ত আমি পাহাৰীয়া ঘৰৰ কৰ (Hill house tax) পৰিশোধ কৰিলো ৷ আমি জিৰিবামত বহু পাহাৰীয়া সা-সুবিধা গ্ৰহণ কৰি আনন্দিতও হৈছিলো ৷’’
তেওঁ আৰু কয়, ‘‘কিন্তু 2017 ৰ পৰা মণিপুৰ চৰকাৰে আমাক জিলাখনক ভংগ কৰি দিয়ে ৷ ফলত আমাৰ কিছু প-পত্ৰ, যেনে- আধাৰ কাৰ্ড, বিভিন্ন প্ৰমাণপত্ৰ উলিওৱাত বহু অসুবিধাৰ সন্মুখিন হ’ব লগা হৈছে ৷ সেয়ে যদিহে চৰকাৰে আমাৰ এই দাবী মানি নলয়, তেন্তে অনাগত সময়ত জংগী আন্দোলন কৰিবলৈ বাধ্য হ’ব ৷’’
লগতে পঢ়ক : মণিপুৰৰ হিংসাত আমেৰিকা-চীনৰ দৰে তৃতীয় শক্তি জড়িত নেকি ? - Manipur crisis
