মাজুলী: বিগত ৪৫ বছৰেই ম'হৰ শিঙৰ পেঁপা প্ৰস্তুত কৰি আহিছে এগৰাকী শিল্পীয়ে । ঢকুৱাখনাৰ ফাট বিহুত বিগত এটা দশকৰো অধিক সময় শ্ৰেষ্ঠত্ব প্ৰতিপন্ন কৰি আহিছে এইগৰাকী শিল্পীয়ে । দেশৰ ৰাজধানী চহৰ দিল্লীতো ম'হৰ শিঙৰ পেঁপা বজাই সুনাম অৰ্জন কৰিবলৈ সক্ষম হৈছে তেওঁ ।
ৰঙালী বিহু আহিলেই এইগৰাকী শিল্পী ব্য়স্ত হৈ পৰে পেঁপা প্ৰস্তুত কৰাত । কাৰণ তেওঁ প্ৰস্তুত কৰা পেঁপাৰে বিহু মাৰিবলৈ অপেক্ষা কৰি থাকে বহুতো হুচৰি দল । তেওঁ কোন জানেনে ?
ব'হাগ বুলিলেই ব্যস্ততা বাঢ়ে সকলোৰে । ৰঙালী বিহু মানেই ম'হৰ শিঙৰ পেঁপাৰ মাত । গোণা ম'হৰ পেঁপাৰ মাতত কঁকাল ভাঙি নাচিবলৈ জাকি মাৰি ওলাই আহে নাচনী । বিহু যিমানেই ওচৰ চাপিছে, সিমানেই ব্যস্ততা বাঢ়িছে মাজুলীৰ ডেকা শেনচোৱা গাঁৱৰ মোলান দাস নামৰ শিল্পীগৰাকীৰ । কাৰণ তেওঁ প্ৰস্তুত কৰা পেঁপাৰে বিহুৰ আখৰা কৰিবলৈ অপেক্ষা কৰি আছে বহুতেই ।
৪৫ বছৰ ধৰি পেঁপা প্ৰস্তুত কৰিছে মোলান দাসে
মোলান দাসে বিগত কেইবাবছৰ ধৰি ম'হৰ শিঙৰ পেঁপা প্ৰস্তুত কৰি আহিছে । মোলান দাসে প্ৰস্তুত কৰা ম'হৰ শিঙৰ পেঁপা মাজুলীৰ লগতে অসমৰ বিভিন্ন প্ৰান্তত আছে আদৰ ।
ম'হৰ শিঙৰ পেঁপা প্ৰস্তুত কৰি ব'হাগ বিহুৰ সময়ত প্ৰতি বছৰে প্রায় ৫০-৬০ হাজাৰ টকাৰ পৰা এক লাখ টকা লাভ কৰে বুলি উল্লেখ কৰি তেওঁ কয়, "বিগত ৪৫ বছৰ ধৰি পেঁপা প্ৰস্তুত কৰি আহিছো । মাজুলীৰ বিভিন্ন প্ৰান্তত পেঁপা বজাই বহুতো পুৰস্কাৰ লাভ কৰিছো । ঢকুৱাখনাৰ ফাট বিহুত ১৫-২০ বছৰ ধৰি মই পুৰস্কাৰ লাভ কৰি আহিছো । দিল্লীতো পেঁপা পৰিৱেশন কৰিছো" ।
নাকেৰেও বজাব পাৰে পেঁপা
বিভিন্ন ম'হৰ খুটিৰ পৰা তেওঁ ম'হৰ শিং গোটাই অনাৰ লগতে বিভিন্নজনে আনিও দিয়ে । তেওঁ উল্লেখ কৰা মতে, মাজুলীৰ লগতে অসমৰ বিভিন্ন প্ৰান্তলৈ ম'হৰ শিঙৰ পেঁপা নিছে । ম'হৰ শিঙৰ পেঁপা প্ৰস্তুত কৰাৰ লগতে তেওঁ পেঁপা বজোৱাতো পাৰ্গত । মাজুলীৰ লগতে অসমৰ বিভিন্ন প্ৰান্তত পেঁপা বজাই ৰাইজৰ মৰম বুটলিবলৈ সক্ষম হৈছে এইগৰাকী শিল্পীয়ে । মোলান দাসে ইতিমধ্যে মুখৰ লগতে নাকেৰেও পেঁপা বজাই সকলোৰে দৃষ্টি আকৰ্ষণ কৰিবলৈ সক্ষম হৈছে ।
