নীলকণ্ঠেশ্বৰ মন্দিৰত ভক্তৰ লানি নিছিগা ভিৰ

লখিমপুৰ ৯ মাৰ্চ: আজি মহা শিৱৰাত্ৰীৰ দ্বিতীয়টো দিন । সমগ্র ৰাজ্যজুৰি শিৱ বন্দনাত মূখৰিত হৈ পৰিছে আকাশ-বতাহ । দেৱাদিদেৱ মহাদেৱৰ অকণমান আশীর্বাদ বিচাৰি ভক্তসকল উবুৰি খাই পৰিছে শিৱ মন্দিৰ, থান আদিত । সকলোৱে নৈবেদ্য আগবঢ়ায় মহাদেৱৰ পৰা কৃপা দৃষ্টি কামনা কৰিছে ।

ৰাজ্যৰ আন ঠাইৰ দৰে লখিমপুৰতো সৃষ্টি হৈছে একেই পৰিৱেশৰ । নগৰ তথা ইয়াৰ উপকন্ঠৰ সকলো শিৱ মন্দিৰতে ভক্তৰ ভিৰ দেখিবলৈ পোৱা গৈছে । সৰ্বাধিক ভিৰ পৰিলক্ষিত হয় নগৰৰ খেলমাটিত থকা নীলকণ্ঠেশ্বৰ মন্দিৰত । মন্দিৰটোত ভক্তৰ ভিৰত বিৰ দি বাট নোপোৱা অৱস্থা ।

ভক্তৰ ভিৰ নিয়ন্ত্রণ কৰিবলৈ আৰক্ষী, অৰ্ধসামৰিক বাহিনী নিয়োগ কৰিবলগীয়া হৈছে মন্দিৰটোত । সকলোৱে ধূপ-দ্বীপ-নৈবেদ্য আগবঢ়াই মহাদেৱৰ কৃপা প্ৰাৰ্থনা কৰিবলৈ মন্দিৰ প্ৰাংগনত ভিৰ কৰিছে । উল্লেখ্য যে, মন্দিৰটোত কালিৰে পৰা দুদিনীয়াকৈ শিৱৰাত্ৰীৰ পূজা অৰ্চনা কৰা হৈছে । কালি নিশা দুই বজা পৰ্যন্ত ভক্তৰ সমাগমে মন্দিৰটোৰ পৰিবেশ প্ৰাণৱন্ত কৰি তুলিছে ।

শনিবাৰৰ পুৱা ছয় বজাৰ পৰা পুনৰ ভক্তৰ বাবে মন্দিৰৰ দ্বাৰ খুলি দিয়া হয় । উল্লেখ কৰা প্ৰয়োজন যে, কেৱল মহা শিৱৰাত্ৰীৰ পূজা অৰ্চনাই নহয় । এই মন্দিৰটোত মহামৃত্যুঞ্জয় যজ্ঞৰো আয়োজন কৰা হৈছে । পুৱাৰ পৰা আৰম্ভ হোৱা মহামৃত্যুঞ্জয় যজ্ঞত বিয়লি পূৰ্ণাহুতি প্ৰদান কৰা হ’ব ।

মন্দিৰটোত ভক্তৰ ভিৰ দেখি মন্দিৰ পৰিচালনা সমিতি তথা ৰাইজে সন্তোষ প্রকাশ কৰিছে । মহাদেৱৰ কৃপা লাভ কৰি সকলোৱে এখন শান্তিৰ সমাজ গঢ় দি স্নেহ ভৰা পৰিৱেশ সৃষ্টি কৰিব বুলি আশা প্ৰকাশ কৰিছে উদ্যোক্তা সমিতিয়ে ।

লগতে পঢ়ক: তিনিচুকীয়া-শিৱসাগৰত মহা শিৱৰাত্ৰিত ভক্তৰ লানি নিছিগা ভিৰ