ৰিদুলে সাজি উলিয়ালে এনে এক দলং যিয়ে সমন্বয় সাধিলে দুখন গাঁৱৰেই নহয়, ধৰ্মৰ মাজতো
সম্প্ৰীতিৰ এখন দলং । চৰকাৰে কৰিব নোৱৰা কাম কৰি দেখুৱালে এজন যুৱকে ।
Published : May 16, 2025 at 1:00 PM IST
|Updated : May 16, 2025 at 1:28 PM IST
আমগুৰি: সম্প্ৰীতিৰ নিদৰ্শন দাঙি ধৰা এখন দলং । জোনাব আৰু নামঘৰীয়াই হাতে হাত ধৰি ফিটা কাটি উদ্বোধন কৰিলে এখন দলং । এইখন অসমৰে এইখন দলঙে দাঙি ধৰিছে ঐক্য-সম্প্ৰীতি আৰু সমন্বয়ৰ বাৰ্তা । শিৱসাগৰ জিলাৰ নামতিৰ টিঙিৰিপাম-কেতেকীবাৰী সংযোগী নামদাং নদীৰ ওপৰত এখন দলং নথকাৰ বাবে বৃহত্তৰ দুটা অঞ্চলৰ ৰাইজৰ মাজত যাতায়াত ব্যাহত হৈ আছিল ।
কাষতে দুখন গাঁও । এখন নাজিৰা সমষ্টিৰ আৰু আনখন শিৱসাগৰ সমষ্টিৰ । হিন্দু আৰু মুছলমানৰ বসতিস্থল গাঁও দুখন নামদাং নদীয়ে দুভাগ কৰিছে । পুৰুষাণুক্ৰমে গাঁও দুখনৰ ৰাইজে এডাল সাঁকো আৰু বাঁহৰ দলঙে যাতায়াত কৰি আহিছিল যদিও যোৱা বহু বছৰ ধৰি গাঁও দুখন সংযোগহীন হৈ আছিল ।
নামতিৰ স্থানীয় যুৱক চাবেৰ আহমেদ বৰা ওৰফে ৰিদুলৰ প্ৰচেষ্টাত নামদাং নদীত এখন বাঁহ-কাঠৰ দলং নিৰ্মাণৰ যো-জা চলিল। কোনোৱে যদি বাঁহ দহডাল দিছে কোনোৱে আকৌ ঘৰৰ গছ এজোপাকে দিছে । এনেদৰে অঞ্চলবাসীয়ে নদীৰ ওপৰত প্ৰায় এমাহজোৰা প্ৰচেষ্টাৰ অন্তত স্থানীয় যুৱকসকলৰ সহযোগত নিৰ্মাণকাৰ্য সম্পূৰ্ণ হৈ উঠে ।
চৰকাৰক বহুবাৰ দলংখন নিৰ্মাণ কৰিবলৈ স্থানীয় ৰাইজে আবেদন জনাইছিল যদিও কোনো কোমত অহা নাছিল । ফলত চৰকাৰলৈ বাট নাচাই অঞ্চলবাসীয়ে ৰিদুলৰ ঐকান্তিক প্ৰচেষ্টাৰ ফলত বাঁহ-কাঠৰ সুন্দৰ এখন দলঙৰ নিৰ্মাণকাৰ্য সম্পূৰ্ণ হৈ উঠে । উল্লেখ্য যে নামতিৰ টিঙিৰিপাম-কেতেকীবাৰী সংযোগী নামদাং নদীৰ ওপৰত দলং সাজি মুকলি কৰাত স্থানীয় লোকসকলে সন্তুষ্টি প্ৰকাশ কৰিছে ।
দীৰ্ঘদিনীয়া সমস্যা সমাধান কৰি নামঘৰীয়া অৰুণ শইকীয়া আৰু জোনাৱ চৈয়দ অদুদুল হকে আনুষ্ঠানিকভাৱে ফিটা কাটি দলংখন যাতায়াতৰ কাৰণে মুকলি কৰে । শিৱসাগৰ আৰু নাজিৰা সমষ্টিক সংযোগ কৰা দলংখনে কোঁৱামৰা, জতকীয়া, মাদুৰী, অভয়পুৰীয়া, গোঁহাইগাঁৱকে ধৰি অৰ্ধ-শতাধিক গাঁৱৰ ৰাইজক উপকৃত কৰিব । চৰকাৰৰ আঁচনিলৈ বাট নাচাই হাতে-কামে লাগি পকেটৰ টকা খৰচ কৰি এনেদৰে স্থানীয় লোকসকলে মহানুভৱতাৰ নিদৰ্শন দাঙি ধৰিবলৈ সক্ষম হয় ।
