পহিলা নৱেম্বৰৰ পৰা হাতীৰ পিঠিত উঠি কাজিৰঙা ফুৰিব পাৰিব পৰ্যটকে

কাজিৰঙা : পৰম্পৰাগত হস্তী পূজাৰে অহা ১ নৱেম্বৰৰ পৰা মুকলি হ'ব কাজিৰঙাৰ অতিকৈ আকৰ্ষণীয় হাতী ছাফাৰী ৷ পুৱাৰ কোমল ৰ’দজাক লগত লৈ কাজিৰঙাৰ এবুকু পৰিষ্কাৰ বতাহ প্ৰাণ ভৰি গ্ৰহণ কৰাৰ উদ্দেশ্যে হাতী ছাফাৰী কৰিবলৈ পুনৰ আহিব দেশী-বিদেশী পৰ্যটক ৷ এইবাৰ কাজিৰঙাৰ হাতী ছাফাৰীৰ নেতৃত্ব দিব অত্যন্ত সাহসী হাতী লক্ষীমায়ে ৷

তদুপৰি প্ৰদুম্ন্য, বীৰ, বিষ্ণু, কৰ্ণ, পাহি, পূৰ্ণিমা আদিকে ধৰি দহটা হাতীয়ে দেশী-বিদেশী পৰ্যটকক পিঠিত তুলি ১ নৱেম্বৰৰ পৰা ছমাহৰ বাবে চফৰ কৰাব ৰাষ্ট্ৰীয় উদ্যানৰ অন্তৰ্ভাগত ৷ হাতী মাউত কিৰণ ৰাভা আৰু কাছেম আলীয়ে জনায় যে ইতিমধ্যে বিভাগীয় হাতীসমূহৰ স্বাস্থ্য পৰীক্ষা সম্পন্ন হৈছে ৷ লগতে পৰ্যটক বহিবলৈ হাওদাসমূহো অতি সুন্দৰকৈ সাজু কৰা হৈছে ৷

দুয়োগৰাকী হাতী মাউতে জনায় যে আন আন বছৰৰ দৰেই নৱেম্বৰৰ ১ তাৰিখে পুৱা পৰম্পৰাগত হস্তী পূজা আৰু ফিটা কাটি কাজিৰঙাৰ মিহিমুখৰ পৰা আৰম্ভ হ'ব হাতী ছাফাৰী ৷ আনহাতে, পুৱা ৫ বজাত আৰু পুৱা ৬ বজাত মুঠতে দুটা খেপত চলিব এই হাতী ছাফাৰী ৷ এই দুটা খেপত দহটা বিভাগীয় হাতীত মুঠ ৪৪ গৰাকী পৰ্যটক উদ্যানলৈ প্ৰৱেশ কৰিব পাৰিব ৷

তেওঁলোকে আৰু কয় যে পৰ্যটকসকল কহঁৰা বনাঞ্চলৰ মুখ্য প্ৰৱেশ দ্বাৰ মিহিমুখৰ পৰা আৰম্ভ হ'ব হাতী ছাফাৰী আৰু সমাপ্ত হ'ব ৰাষ্ট্ৰীয় উদ্যানৰ কাঠপৰা এলেকাত থকা দ্বিতীয় ৰাইডিং পইণ্টত ৷ আনহাতে, বিমল শৰ্মা, ৰুবুল বৰা, ফটিক বৰা, দীপক গঞ্জু, নিপন শৰ্মা আদি কেইবাগৰাকীও কাজিৰঙাৰ ব্যক্তিৰ নেতৃত্বত বাগৰি বনাঞ্চলৰ বাবেও সাজু কৰা হৈছে ব্যক্তিগত হাতী ৷

ইতিমধ্যে বাগৰি বনাঞ্চলৰ হাতীসমূহৰো স্বাস্থ্য পৰীক্ষা, মাইক্ৰ'চিপ পৰীক্ষা আদি সমাপ্ত হৈছে ৷ আনহাতে, যোৱা ১ অক্টোবৰৰ পৰা আৰম্ভ হোৱা কাজিৰঙাৰ জীপ ছাফাৰীয়ে পৰ্যটকৰ যথেষ্ট সহাঁৰি লাভ কৰিছে বুলি সংবাদ মাধ্যমৰ আগত সদৰী কৰে ৰাষ্ট্ৰীয় উদ্যানৰ কৰ্তৃপক্ষই ৷