গুৱাহাটী: ভাৰত চৰকাৰৰ প্ৰতিৰক্ষা মন্ত্ৰালয়ৰ অধীনৰ সীমান্ত পথ সংগঠনৰ (বি আৰ অ’) পূব মণ্ডলৰ অতিৰিক্ত সঞ্চালকপ্ৰধান (এ ডি জি) হিচাপে গুৱাহাটীৰ লংকেশ্বৰস্থিত মুখ্য কাৰ্যালয়ত ১০ জুনত কাৰ্যভাৰ গ্ৰহণ কৰে দক্ষ অভিযন্তা হিচাপে কাম কৰাৰ সুনাম থকা জীতেন্দ্ৰ প্ৰসাদে । ইয়াৰ পূৰ্বে তেওঁ বাহিনীটোৰ নতুন দিল্লীস্থিত মুখ্য কাৰ্যালয়ত উপ-সঞ্চালকপ্ৰধান হিচাপে কাৰ্যনিৰ্বাহ কৰিছিল ।
উল্লেখ্য যে, পূব মণ্ডলৰ এ ডি জি হৰেন্দ্ৰ কুমাৰক নতুন দিল্লীৰ মুখ্য কাৰ্যালয়লৈ বদলিৰ নিৰ্দেশ দিয়া হৈছে । প্ৰতিৰক্ষা মন্ত্ৰালয়ে তেওঁক জ্যেষ্ঠতা, দক্ষতা আৰু অভিজ্ঞতাৰ ভিত্তিত বি আৰ অ’ৰ অতি গুৰুত্বপূৰ্ণ বুলি পৰিচিত পূব মণ্ডলৰ এ ডি জি হিচাপে নিযুক্তি দিছে ।
আনহাতে, ১৯৯০ বেটছৰ সীমান্ত পথ অভিযান্ত্ৰিক সেৱাৰ (BRES) বিষয়া জীতেন্দ্র প্ৰসাদে বিগত প্ৰায় ৩৫ বছৰত উত্তৰ-পূৰ্বাঞ্চলৰ অৰুণাচল প্ৰদেশ, তিব্বত আৰু মিজোৰাম-ম্যানমাৰ সীমান্তৰ অতি দুৰ্গম ঠাইৰ লগতে জম্মু-কাশ্মীৰ, উত্তৰাখণ্ড, ছিকিম সীমান্তৰ অতি দুৰ্গম অঞ্চলত পথ, দলং, সুৰংগ আদিৰ নিৰ্মাণকাৰ্যত জড়িত হৈ যাতায়াত ব্যৱস্থাৰ উন্নয়ন সাধন কৰাৰ দীৰ্ঘদিনীয়া অভিজ্ঞতা সঞ্চয় কৰিছে । যাৰ বাবে বিগত সময়ছোৱাত তেওঁ ভাৰতৰ ৰাষ্ট্ৰপতিৰ সন্মানীয় পদক হিচাপে পৰিগণিত হৈ অহা বিশিষ্ট সেৱা মেডেল (VSM) লাভ কৰিছিল ।
কাৰ্যভাৰ গ্ৰহণ কৰাৰ পাছতেই পূব মণ্ডল মুখ্য কাৰ্যালয়ৰ সভাগৃহত অভিযন্তা আৰু বিষয়াসকলৰ সৈতে এখন বৈঠকত মিলিত হৈ জীতেন্দ্ৰ প্ৰসাদে পূব মণ্ডলৰ অধীনত চলি থকা বিভিন্ন প্ৰকল্পৰ কাম-কাজসমূহৰ পৰ্যালোচনা কৰাৰ লগতে সকলো নিৰ্মাণকাৰ্য যাতে নিৰ্ধাৰিত সময়ৰ ভিতৰত সম্পন্ন হয় তাৰ ওপৰত গুৰুত্ব আৰোপ কৰে ।
উল্লেখ্য যে উত্তৰ প্ৰদেশৰ চুলতানপুৰৰ কে এন আই টিৰ পৰা চিভিল ইঞ্জিনীয়াৰিঙত সুখ্যাতিৰে বি. টেক ডিগ্ৰী লাভ কৰাৰ পাছত আই আই টি, বাৰাণসীৰ পৰা সুখ্যাতিৰে ষ্ট্ৰাকচাৰেল ইঞ্জিনিয়াৰিঙত তেওঁ মাষ্টাৰ ডিগ্ৰী লাভ কৰিছিল । আনকি হিমাচল প্ৰদেশৰ অটল টানেল আৰু বৰ্তমান মানালীত নিৰ্মাণৰত অৱস্থাত থকা শিংকাল টানেলৰ লগতো কাম কৰাৰ অভিজ্ঞতা থকা জীতেন্দ্ৰ প্ৰসাদ ২০১৯ চনৰ পৰা ২০২১ চনলৈ অসমৰ তিনিচুকীয়া জিলাৰ ডুমডুমাস্থিত বি আৰ অ’ৰ উদয়ক প্ৰকল্প আৰু হিমাচল প্ৰদেশৰ মানালীস্থিত যোজক প্ৰকল্পত ২০২১-২০২৩ চনলৈ মুখ্য অভিযন্তা হিচাপে কাৰ্যনিৰ্বাহ কৰিছিল ।
ইয়াৰ মাজতে তেওঁ ২০২১ চনত নেশ্যনেল ডিফেন্স কলেজত সন্মানীয় বুলি পৰিচিত এটা পাঠ্যক্ৰম উত্তীৰ্ণ হোৱাৰ লগতে উজবেকিস্তান আৰু শ্ৰীলংকা আদি দেশ ভ্ৰমণ কৰি তাত আন্তঃগাঁথনি উন্নয়নৰ বুজ লৈছিল ।
লগতে পঢ়ক: ২২ জুনৰ পৰা অম্বুবাচী মহাযোগ: ভক্তই কি কি কৰিব পাৰিব কি কি নোৱাৰিব ? - AMBUBACHI MELA 2025
