হাফলং: সোমবাৰে নতুন দিল্লীৰ ৰাষ্ট্ৰপতি ভৱনত দুগৰাকীকৈ গৌৰৱী অসমীয়াই লাভ কৰিলে দেশৰ তৃতীয় সৰ্বোচ্চ অসামৰিক সন্মান পদ্মশ্ৰী বঁটা ৷ ৰাজধানী চহৰখনত অনুষ্ঠিত এক গাম্ভীৰ্যপূৰ্ণ অনুষ্ঠানত দুগৰাকীকে অসমীয়াক এই বঁটা প্ৰদান কৰে ৰাষ্ট্ৰপতি দ্ৰৌপদী মুৰ্মুৱে ৷
চলিত বৰ্ষৰ পদ্মশ্ৰী বঁটা লাভ কৰা দুয়োগৰাকী অসমীয়া হৈছে ক্ৰমে- ডিমা হাছাওৰ জয়নাচৰণ বাথাৰী আৰু বড়ো কবি তথা লোককথাবিদ, অধ্যাপক অনিল কুমাৰ বড়ো ৷ দুয়োগৰাকী বিশিষ্ট ব্যক্তিৰ সফলতাত গদগদ হৈ পৰিছে প্ৰতিগৰাকী অসমীয়াৰ বুকু ৷
বাথাৰীৰ দক্ষতা
কলা আৰু লোক সংগীতত বিশেষ অৱদান আগবঢ়োৱাৰ বাবে জয়নাচৰণ বাথাৰীয়ে লাভ কৰে পদ্মশ্ৰী বঁটা । ৮৪ বছৰীয়া জ্যেষ্ঠ নাগৰিক তথা ডিমাছা জনগোষ্ঠীৰ ধ্বজাবাহক জয়নাচৰণ বাথাৰীৰ জন্ম হৈছিল মাহুৰৰ জোৰাই বাথাৰী গাঁৱত । ডিমাছা জনজাতীয় লোক সংগীতৰ পৰম্পৰাগত শিল্পৰ পৰা আৰম্ভ কৰি উত্তৰ-পূৱ ভাৰতৰ ডিমাছা জনগোষ্ঠীয় সম্প্ৰদায়ৰ চহকী সাংস্কৃতিক প্ৰকাশৰ বাবে পৰিচিত এইগৰাকী ব্যক্তি ৷
President Droupadi Murmu presents Padma Shri in the field of Art to Shri Joynacharan Bathari. He is well-known for traditional folk music in Dima Hasao. He has a passion to promote the folk music and traditional instruments of Dimasa Community. He has been invited to perform… pic.twitter.com/Y3Ry7zWG37
— President of India (@rashtrapatibhvn) April 28, 2025
তেখেত ডিমাছা লোক সংগীত আৰু বাদ্যযন্ত্ৰ (খৰ্ম মানে ড্ৰাম আৰু মুৰি মানে বাঁহী) বজোৱাতো দক্ষ । জয়নাচৰণ বাথাৰীয়ে বান্দৰ আৰু কাছৰ গল্পটোত নতুনৰ ৰং ঢালি পুনৰ সৃষ্টি কৰিছিল । বান্দৰ আৰু কাছৰ কাহিনীটোত তেওঁ কৰা অভিনয়ে এই শিল্পক ৰাজ্যৰ বিভিন্ন প্ৰান্তত জনপ্ৰিয় কৰি তুলিছিল ।
আন এগৰাকী বঁটাপ্ৰাপক অনিল কুমাৰ বড়ো
বড়ো কবি আৰু লোককথাবিদ, অধ্যাপক অনিল কুমাৰ বড়ো হৈছে বৰ্তমান গুৱাহাটী বিশ্ববিদ্যালয়ৰ লোককথা গৱেষণা বিভাগৰ মুৰব্বী ৷ অধ্যাপক বড়োক সোমবাৰে ৰাষ্ট্ৰপতি ভৱনত অনুষ্ঠিত এক অনুষ্ঠানত পদ্মশ্ৰী বঁটাৰে সন্মানিত কৰা হৈছে ।
সাহিত্যলৈ অৱদান
বড়ো সাহিত্যৰ লোককথাক বিশ্ব মঞ্চলৈ অনাত অনিল কুমাৰ বড়োৱে অৰিহণা যোগাইছে । বৰ্তমানলৈকে কবিতা, সাহিত্য, সমালোচনা, উপন্যাস, শিশু সাহিত্য, ভ্ৰমণ কাহিনী, লোককথা অধ্যয়নকে ধৰি তেখেতৰ প্ৰায় ৩০ খনতকৈও অধিক গ্ৰন্থ প্ৰকাশ পাইছে ।
বড়োৰ ল্যাণ্ডমাৰ্ক গ্ৰন্থ যেনে- ফক লিটাৰেচাৰ অৱ দ্য বডোছ: এণ ইনট্ৰডাকচন, এ হিষ্ট্ৰী অৱ বডো লিটাৰেচাৰ, দ্য ফ্লুট এণ্ড দ্য হাৰ্প, ডেলফিনি অনথাই ম্ৱদাই আৰৱ গুহুন ক্ৰুবুন খোন্থাই আদিয়ে আধুনিক বড়ো সাহিত্যিক এক সুনিৰ্দিষ্ট ৰূপত গঢ় দিয়াত সহায় কৰিছে ।
President Droupadi Murmu presents Padma Shri in the field of Literature and Education to Prof. Anil Kumar Boro. He is an eminent poet, academician and literary critic. He has made significant contributions to the growth and development of Bodo literature, folklore and culture.… pic.twitter.com/RU1FMfaukr
— President of India (@rashtrapatibhvn) April 28, 2025
সম্পাদক হিচাপে তেওঁ দ্য বডো কোৱাৰ্টাৰলি, জাৰ্ণেল অৱ ফ’ক’ৰিষ্টছ আৰু অনুবাদমূলক অনলাইন আলোচনী থুনছলাইকে ধৰি উল্লেখযোগ্য সাহিত্য সংকলন আৰু আলোচনীসমূহৰ পৰিচালনাত পালন কৰিছে গুৰুত্বপূৰ্ণ ভূমিকা ।
কবি আৰু লোককথাবিদ হোৱাৰ উপৰিও অনিল কুমাৰ বড়ো এজন বিশিষ্ট অনুবাদক, শিক্ষাবিদ আৰু সাহিত্য সমালোচক, যিয়ে বড়ো সাহিত্যৰ শ্ৰীবৃদ্ধি আৰু বিকাশত উল্লেখযোগ্য অৱদান আগবঢ়াইছে ।
শিক্ষাগত অৰ্হতা আৰু ব্যক্তিগত জীৱন
১৯৬১ চনৰ ৯ ডিচেম্বৰত বাক্সা জিলাৰ মানস ৰাষ্ট্ৰীয় উদ্যানৰ সমীপৰ কাছিতামাত জন্মগ্ৰহণ কৰা বড়োৱে গুৱাহাটী বিশ্ববিদ্যালয়ৰ ইংৰাজী বিভাগৰ পৰা স্নাতকোত্তৰ ডিগ্ৰী সম্পূৰ্ণ কৰে ৷ ইয়াৰ পিছতে তেখেতে লোককথা গৱেষণা বিভাগৰ পৰা লাভ কৰে পি এইচ ডি ডিগ্ৰী ।
সম্প্ৰতি গুৱাহাটীৰ বাসিন্দা অনিল কুমাৰ বড়োৰ সৈতে পৰৱৰ্তী সময়ত বিবাহপাশত আৱদ্ধ হয় অঞ্জলি বড়ো ৷ দুগৰাকী কন্যা ক্ৰমে মৃদুস্মিতা বড়ো আৰু কাবেৰী বড়োৰ সৈতে তেওঁলোকৰ এতিয়া সুখৰ সংসাৰ ৷
কৰ্মজীৱন
১৯৮৮ চনত ডিমৰিয়া কলেজত ইংৰাজী বিষয়ৰ প্ৰবক্তা হিচাপে কৰ্মজীৱন আৰম্ভ কৰাৰ পিছত অনিল কুমাৰ বড়োৱে ২০০০ চনত গুৱাহাটী বিশ্ববিদ্যালয়ৰ লোককথা গৱেষণা বিভাগৰ মুৰব্বী হিচাপে যোগদান কৰে ।
সাহিত্যত অৱদানৰ বাহিৰেও অধ্যাপক বড়োৱে মাতৃভাষা শিক্ষাৰ প্ৰসাৰ আৰু বড়োলেণ্ডত ৰাষ্ট্ৰীয় শিক্ষা নীতি (এন ই পি) ২০২০ ৰূপায়ণৰ বাবে ব্যাপকভাৱে কাম কৰি আহিছে ।
সামাজিক জীৱন
বড়ো সাহিত্য সভাকে ধৰি সাহিত্য সংগঠনসমূহত সক্ৰিয় অৱদান আগবঢ়োৱাৰ লগতে ২০২১ চনৰ পৰা কোকৰাঝাৰ সাহিত্য মহোৎসৱৰ আয়োজনত যথেষ্ট অৰিহণা যোগাই আহিছে এইগৰাকী ব্যক্তিয়ে ।
ৰাষ্ট্ৰীয় আৰু আন্তঃৰাষ্ট্ৰীয় সন্মিলনত তেওঁৰ অংশগ্ৰহণে বড়ো সাহিত্য আৰু লোককথাক বিশ্বব্যাপী মঞ্চত চিনাকী কৰাই দিয়াত সহায় কৰিছে ৷ তদুপৰি তেওঁ গ্ৰীচ, ইটালী, লিথুৱেনিয়া, ডেনমাৰ্ক আৰু চীনৰ শৈক্ষিক আৰু সাহিত্য মঞ্চত ভাৰতক প্ৰতিনিধিত্ব কৰিছে । বিভিন্ন ৰাষ্ট্ৰীয়, আন্তঃৰাষ্ট্ৰীয় কাৰ্যসূচী আৰু সন্মিলনতো কৰিছে অংশগ্ৰহণ ।
বিভিন্ন বঁটা-সন্মান
বড়ো সাহিত্য আৰু লোককথালৈ আগবঢ়োৱা অৱদানৰ বাবে অধ্যাপক বড়োক সন্মানীয় সাহিত্য অকাডেমী বঁটা (২০১২), ৰংছাৰ সাহিত্য বঁটা আৰু সাহিত্য সাধনা বঁটা (২০২৪)ৰে সন্মানিত কৰা হৈছে ।
উল্লেখ্য যে, ২০২৫ চনৰ বাবে ৰাষ্ট্ৰপতিয়ে ১৩৯ টা পদ্ম বঁটা ঘোষণা কৰিছিল ৷ এই তালিকাত আছে ৭ টা পদ্ম বিভূষণ, ১৯ টা পদ্মভূষণ আৰু ১১৩ টা পদ্মশ্ৰী বঁটা । (এ এন আই ইনপুটৰ সৈতে)
লগতে পঢ়ক: ফুলৰে মেলাতে... নীৰৱে পুষ্প বিপ্লৱত মগ্ন এগৰাকী মহিলা, দেখুৱাইছে স্বনিয়োজনৰ পথ
