মৰাণ : অসমীয়াৰ পদূলিত হেঁপাহৰ ব'হাগ । প্ৰকৃতিয়ে ন-সাজেৰে দিলেহি ব’হাগৰ বতৰা । ঢোল-পেঁপাৰ শব্দত ৰজনজনাইছে ৰাজ্য । অসমীয়াৰ বাপতি সাহোন ৰঙালীক আদৰিবলৈ এতিয়া সকলোতে চলিছে ব্যাপক প্ৰস্তুতি । ৰাজ্যৰ বিভিন্ন প্ৰান্তত কপৌ-কেতেকী, মাধৈমালতী ফুলে ব’হাগৰ বতৰা লৈ বসন্তৰ সুবাস বিলাইছে । তাঁতশালত শিপিনীৰ ব্যস্ততাৰ অন্ত নোহোৱাৰ লগতে ঢুলীয়াই বতৰ চাই টানিছে ঢোলৰ বৰটি ।
ৰাজ্যৰ প্ৰান্তে প্ৰান্তে বিহুৰ আখৰা :
ব'হাগত বিহু নাচিবলৈ আখৰাত ব্যস্ত মৰাণৰ সমন্বয় ছোৱালী হুঁচৰি দল । পুৰুষৰ হুঁচৰি দলক ফেৰ মাৰিব সমন্বয় ছোৱালী হুঁচৰি দলে । এই দলটোৱে প্ৰতি বছৰে ৰাইজৰ চোতালত হুঁচৰি গাই আহিছে । ডিব্ৰুগড়, চৰাইদেউ আৰু শিৱসাগৰৰ বিভিন্ন অঞ্চলৰ ছোৱালীৰে গঠিত এই ছোৱালী হুঁচৰি দলটোৱে ৰাজ্যৰ বিভিন্ন প্ৰান্তত হুঁচৰি গাই ৰাইজৰ সমাদৰ লাভ কৰি আহিছে । এইবাৰো পূৰ্ণোদ্য়মে আৰম্ভ কৰিছে আখৰা । উল্লেখ্য় যে এই সমন্বয় ছোৱালী হুঁচৰি দলত ঢোল, পেঁপাকে ধৰি সকলো বিহুৰ বাদ্যযন্ত্ৰ ছোৱালীয়ে বজায় ।
যুৰীয়া পেঁপা লৈ সাজু হুঁচৰি দল:
নাৰীয়ে হুঁচৰি পৰিৱেশন কৰাৰ বিষয়ে উল্লেখ নাই যদিও বৰ্তমান সময়ত পুৰুষৰ সমানে সমানে নাৰীয়েও অসমীয়া সাংস্কৃতিটো আগুৱাই নিবলৈ চেষ্টা অব্যাহত ৰাখিছে । তাৰে উদাহৰণ দাঙি ধৰিছে মৰাণৰ এটি ছোৱালী হুঁচৰি দলে । ডিব্ৰুগড়, চৰাইদেউ আৰু শিৱসাগৰৰ বিভিন্ন অঞ্চলৰ প্ৰায় ২১ গৰাকী ছোৱালীয়ে ২০১৯ চনত গঠন কৰিছিল সমন্বয় ছোৱালী হুঁচৰি দল । এই দলটোৱেই ধাৰাবাহিকতা ৰক্ষা কৰিবলৈ সক্ষম হৈছে । ঢোল, পেঁপাকে ধৰি সকলো বিহুৰ বাদ্যযন্ত্ৰ যুৱতীকেইগৰাকীয়ে অতি সুন্দৰকৈ বজাই ৰাইজক আকৰ্ষণ কৰিবলৈ সক্ষম হৈছে । এইবাৰ যুৰীয়া পেঁপা দেখিবলৈ পোৱা যাব সমন্বয় ছোৱালী হুঁচৰি দলত ।
গৃহস্থৰ চোতালৰ লগতে মঞ্চতো কৰিব পৰিবেশন :
ডিব্ৰুগড়, চৰাইদেউ আৰু শিৱসাগৰৰ বিভিন্ন অঞ্চলৰ প্ৰতিভাৱান যুৱতীসকলে মৰাণৰ আখৰাত ব্যস্ত থকাৰ মাজতে সংবাদ মাধ্যমৰ আগত কয়, "সমন্বয় ছোৱালী হুঁচৰি দলে প্ৰায় ১৩ দিনমানৰ পৰা প্ৰস্তুতি চলাই আছে । সমগ্ৰ অসমতে বিহু পৰিৱেশন কৰা হ'ব । ইতিমধ্যে বিভিন্ন অনুষ্ঠানসমূহৰ পৰা যোগাযোগ কৰিছে। বিহুৰ সময়ছোৱা আমাৰ বাবে ভাল লগা সময় । সকলোৱে এটা ভাৰাঘৰত একেলগে থাকি এটা পৰিয়ালৰ দৰে বিহুত ব্যস্ত হৈ থাকো । এইবাৰো আখৰা প্ৰায় সম্পূৰ্ণ হৈছে । এইবাৰ গৃহস্থৰ চোতালৰ লগতে মঞ্চৰ প্ৰতিযোগিতাতো অংশগ্ৰহণ কৰা হ'ব । "
