চাপৰ হোৱাটোৱেই দোষ, ৬ দিন পিছত গঁতিয়াই উলিয়ালে নৱবিবাহিতাক

গুৱাহাটী: কি নঘটে এইখন মহানগৰীত, মহানগৰীৰ ওদালবাক্ৰাত আজৱ ঘটনা । চাপৰ হোৱা বাবে ঘৰৰ পৰা উলিয়াই দিলে নিজ পত্নীক । বিবাহৰ মাত্ৰ ৬ দিন পাৰ হোৱাৰ পাছতে স্বামী ঘৰৰ পৰা গতিয়াই উলিয়াই দিলে নৱবিবাহিত পত্নীক । এই ঘটনা সংঘটিত হৈছে মহানগৰীৰ ওদালবাক্ৰা নিজৰা পথত ।

জানিব পৰা মতে মহানগৰীৰ ওদালবাক্ৰা নিজৰা পথৰ স্বপনা দাস আৰু ৰাণা দাসৰ দ্বিতীয় সন্তান ৰাজকুমাৰ দাসে ২ জুন তাৰিখে মায়ঙৰ পৰা সামাজিকভাৱে বিয়া পাতি আনিছিল এজনী যুৱতীক । বিবাহৰ ছটা দিন নৌযাওতেই ঘৰৰ পৰা গতিয়াই উলিয়াই দিলে নৱবিবাহিত বোৱাৰীগৰাকীক । সোমবাৰৰ দিনটোত আঠমঙলা আছিল যদিও দৰা পক্ষ নগ'ল আঠমঙলা খাবলৈ ।

ইফালে নিশা বোৱাৰীগৰাকীক শাৰীৰিক অত্যাচাৰ চলাই ঘৰৰ পৰা গঁতিয়াই উলিয়াই দিয়াৰ অভিযোগ উত্থাপন হৈছে পৰিয়ালটোৰ বিৰুদ্ধে । উক্ত ঘটনাৰ পিছতে স্থানীয় ৰাইজে সকলো কথা গম পোৱাত সৃষ্টি হয় এক উত্তপ্ত পৰিস্থিতিৰ । পিছত ঘটনাস্থলীত উপস্থিত হয় ওদালবাক্ৰা আৰক্ষী । স্থানীয় লোকৰ অভিযোগ অনুসৰি ৰাজকুমাৰ দাসৰ জ্যেষ্ঠ ভাতৃ ৰাজেন দাসেও পূৰ্বেও দুবাৰকৈ বিয়া কৰাইছিল যদিও দুয়ো পত্নীকে ঘৰৰ পৰা উলিয়াই দিছিল ।

অসম চৰকাৰৰ আয়ুক্তৰ কাৰ্যালয়ত কৰ্মৰত ৰাজকুমাৰ দাসৰ বিৰুদ্ধে নৱবিবাহিতা মহিলাগৰাকীয়ে উত্থাপন কৰিছে কেতবোৰ গুৰুতৰ অভিযোগ । ভুক্তভোগী মহিলাগৰাকীয়ে কয়,"বিয়াৰ দুদিন পিছৰ পৰাই কৈ আছে যে নাৰাখোঁ । মোৰ সৰু ভণ্টী ওখ, গতিকে কৈছে যে, মোক পঠিয়াই দি সৰুভণ্টীক আনিব । নাৰাখোঁ বুলি কৈয়ো মোক শাৰিৰীক নিৰ্যাতন চলাইছে । সি মোক নাৰাখে, তাৰ ডাঙৰ ককায়েকৰ পত্নী নাই । সেয়ে মোক ডাঙৰ ককায়েকৰ কাৰণে ৰাখিব ।"

তেওঁ লগতে কয়, "গাঁৱৰ মানুহে কৈছে তাৰ ককায়েকেও আগতে এনে কৰিছে । দুগৰাকীক বিয়া কৰাইছিল, কিন্তু দুগৰাকীৰ এগৰাকীও নাই । মোক ঘৰৰ পৰা উলিয়াই দিছে । আৰক্ষী আহি বুজাপৰা কৰি ঘৰত থোৱাৰ পাছত মাকে মোক আকৌ উলিয়াই দিছে । মোক কথাই কথাই তই চাপৰ বুলি কৈ থাকে । ল'ৰাটোৱে কৈছে তই এটা ৰাতি ইয়াত থাকিলে তোৰ ডিঙিটো কাটি দিম ।"