উচ্চতৰ মাধ্যমিকৰ পৰাই প্ৰতিমাহে ছাত্ৰীৰ একাউণ্টত সোমাব ধন, কিন্তু কেনেকৈ ? - Mukhya Mantri Nijut Moina Scheme
Assam Govt new scheme: 'মুখ্যমন্ত্রীৰ নিযুত মইনা আঁচনি'ক অনুমোদন ৰাজ্যিক কেবিনেটৰ । কাৰ বাবে আৰু কিয় এই বিশেষ আঁচনি ? কোনে কোনে লাভ কৰিব এই আঁচনিৰ সুবিধা ? কি আছে এই আঁচনিত ? কি কি চৰ্ত বা কোন কোন বঞ্চিত হ'ব এই আঁচনিৰ সুবিধা লাভৰ পৰা ? জানিবলৈ পঢ়ক এই প্ৰতিবেদন ।
Published : June 12, 2024 at 7:43 PM IST
|Updated : June 12, 2024 at 8:10 PM IST
গুৱাহাটী, ১২ জুন: ৰাজ্য চৰকাৰৰ অভিলাষী 'মুখ্যমন্ত্রীৰ নিযুত মইনা আঁচনি'ত অনুমোদন জনালে ৰাজ্যিক কেবিনেটে । বুধবাৰে মুখ্যমন্ত্রী হিমন্ত বিশ্ব শৰ্মাৰ পৌৰোহিত্যত লোকসেৱা ভৱনত আয়োজন কৰা অসম চৰকাৰৰ সাপ্তাহিক কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । ইয়াৰ ভিতৰত অন্যতম মুখ্যমন্ত্রীৰ নিযুত মইনা আঁচনি ।
কেবিনেট বৈঠকৰ অন্তত মুখ্যমন্ত্রী হিমন্ত বিশ্ব শৰ্মাই এখন সংবাদমেল সম্বোধন কৰি খোদ আঁচনিখনৰ সবিশেষ উল্লেখ কৰে । বাজেটত গ্ৰহণ কৰা মুখ্যমন্ত্রীৰ নিযুত মইনা আঁচনিখন ৰূপায়ণৰ বাবে আজিৰ কেবিনেটে অনুমোদন জনায় ।
কাৰ বাবে আৰু কিয় মুখ্যমন্ত্রীৰ নিযুত মইনা আঁচনি
এই আঁচনিখন কেৱল ছাত্রীৰ বাবে প্ৰযোজ্য । উচ্চতৰ মাধ্যমিকৰ পৰা স্নাতকোত্তৰ পৰ্যায়লৈ অধ্যয়নৰ বাবে ছাত্রীসকলক সকাহ দিয়াৰ বাবে এইখন আঁচনি । বাল্য বিবাহ ৰোধ কৰাৰ লগতে ছাত্রীৰ ড্ৰপ আউটৰ হাৰ হ্ৰাস কৰাৰ বাবে চৰকাৰে এই অভিলাষী আঁচনিখন গ্ৰহণ কৰিছে ।
কি আছে আঁচনিখনত ?
দশম শ্ৰেণী উত্তীৰ্ণ হৈ একাদশ শ্ৰেণীত নামভৰ্তি কৰা ছাত্রীসকলে আঁচনিখনৰ যোগেদি মাহেকত লাভ কৰিব ১০০০ টকাকৈ । গৰমৰ বন্ধ আৰু ঠাণ্ডাৰ বন্ধৰ দুটা মাহ বাদ দি দহমাহে লাভ কৰিব এই ধন । প্ৰতি মাহৰ ১১ তাৰিখে বেংক একাউণ্ট সোমাব এই ধনৰাশি । উচ্চতৰ মাধ্যমিকৰ শিক্ষা শেষ নোহোৱালৈকে ১০০০ টকাকৈ প্ৰতিমাহে লাভ কৰিব । আনহাতে স্নাতক মহলাৰ প্ৰতিগৰাকী ছাত্রীয়ে মাহে লাভ কৰিব ১২৫০ টকা ।
স্নাতক মহলাৰ পাঠ্যক্ৰম তিনি নাইবা চাৰি বছৰীয়া হ'লেও ছাত্রীসকলে এই ধন লাভ কৰিব । সেইদৰে স্নাতক উত্তীৰ্ণ হৈ স্নাতকোত্তৰত অধ্যয়ন কৰা ছাত্রীয়ে মাহেকত লাভ কৰিব ২৫০০ টকা । বিএড অধ্যয়ন কৰাসকলেও লাভ কৰিব এই ধনৰাশি । কেৱল জুন আৰু জুলাই মাহত এই ধন প্ৰদান কৰা নহ'ব ।
আঁচনিখনৰ ক্ষেত্রত আছে কেতবোৰ চৰ্ত
ভাল ৰিজাল্ট কৰি স্কুটী লাভ কৰা ছাত্রীৰ ক্ষেত্রত এই আঁচনিখন প্ৰযোজ্য নহ'ব । যদি কোনো ছাত্রীয়ে স্কুটী নলৈ আঁচনিখনৰ সুবিধা ল'ব বিচাৰে তেন্তে ল'ব পাৰিব । ছাত্রীৰ নিজা পছন্দৰ ওপৰত নিৰ্ভৰ কৰিব স্কুটী ল'ব নে আঁচনিখনৰ সুবিধা ল'ব । মন্ত্রী-বিধায়ক আৰু সাংসদৰ কন্যা এই আঁচনিখনৰ হিতাধিকাৰী হ'ব নোৱাৰিব । আনহাতে ব্যক্তিগত খণ্ডৰ মহাবিদ্যালয় আৰু বিশ্ববিদ্যালয়ৰ ছাত্রীয়ে মুখ্যমন্ত্রীৰ নিযুত মইনা আঁচনিৰ সুবিধা নাপাব । ভেন্সাৰ কলেজৰ ছাত্রীয়ে আঁচনিখনৰ সুবিধা লাভ কৰিব ।
কেতিয়াৰ পৰা কিদৰে কাৰ্যকৰী হ'ব আঁচনিখন ?
আঁচনিখনৰ সুবিধা লাভৰ বাবে পূৰণ কৰিব লাগিব প্ৰ-পত্র । জুলাই মাহৰ পৰা বিতৰণ কৰা হ'ব প্ৰ-পত্র । লগতে চৰকাৰীভাৱে ৰূপায়ণ কৰা হ'ব সজাগতামূলক কাৰ্যসূচী । ১১ অক্টোবৰত ছাত্রীসকলে লাভ কৰিব প্ৰথম মাহৰ ধন । অক্টোবৰ মাহৰ পৰা নিয়মীয়াকৈ লাভ কৰিব মাহেকীয়া এই ধনৰাশি ।
এবাৰ প্ৰ-পত্র পূৰণ কৰাসকলে দ্বিতীয়বাৰৰ বাবে প্ৰ-পত্র পূৰণ কৰিব নালাগে । প্ৰ-পত্রত পিতৃ-মাতৃৰ স্বাক্ষৰৰ প্ৰয়োজন হ'ব । আৰ্থিকভাৱে স্বচ্ছল কোনো অভিভাৱক নাইবা ছাত্রীয়ে স্ব-ইচ্ছাই আঁচনিখন গ্ৰহণ নকৰাকৈ থাকিব পাৰিব । অৱশ্যে আঁচনিখনত বি পি এল নাইবা এ পি এলৰ কথা নাই । সকলোৱে আবেদন কৰিব পাৰিব । মহাবিদ্যালয় নাইবা বিশ্ববিদ্যালয়ত প্ৰ-পত্র লাভৰ উপৰি প'ৰ্টেলৰ যোগেদিও প্ৰ-পত্র সংগ্ৰহ কৰি আবেদন কৰিব পাৰিব । ইয়াৰ বাবে এক বিশেষ প'ৰ্টেল থাকিব ।
কোনে নাপাব আঁচনিখনৰ সুবিধা ?
বিবাহিতসকলে লাভ নকৰিব এই আঁচনিৰ সুবিধা । কলেজত পঢ়ি থকা অৱস্থাত বিবাহ হোৱাসকল এই আঁচনিৰ পৰা বঞ্চিত হ'ব । অৱশ্যে স্নাতকোত্তৰ মহলাত অধ্যয়নৰত হৈ থকাসকলে বিবাহ পাশত আৱদ্ধ হ'লেও আঁচনিখনৰ সুবিধা লাভ কৰিব । আনহাতে ড্ৰপ আউটসকলে নাপাব ইয়াৰ সুবিধা ।
সেইদৰে ৰেগিঙত লিপ্ত হোৱা, অনিয়মীয়া, নিয়মানুৱৰ্তীতা মানি নচলা ছাত্রীসকল এই আঁচনিৰ পৰা বঞ্চিত হ'ব । প্ৰত্যেক বছৰে ৰিনিউৱেল কৰা হ'ব আৰু ইয়াৰ দ্বাৰা সেইসকলক আঁচনিৰ পৰা বঞ্চিত কৰা হ'ব । আনহাতে অনুত্তীৰ্ণ ছাত্রীও এই আঁচনিৰ পৰা বঞ্চিত হ'ব ।
আঁচনিখনত চৰকাৰৰ ব্যয়
এই বছৰ আঁচনিখনৰ বাবে চৰকাৰৰ ব্যয় হ'ব ৩০০ কোটি টকা । সেইদৰে এই বছৰ দুই লাখ ছাত্রী আঁচনিখনৰ দ্বাৰা উপকৃত হ'ব । পাঁচ বছৰত আঁচনিখনৰ যোগেদি উপকৃত হ'ব ১০ লাখ ছাত্রী । পাঁচ বছৰৰ বাবে কেবিনেটে অনুমোদন জনোৱা আঁচনিখনৰ বাবে চৰকাৰৰ মুঠ ব্যয় হ'ব ১৫০০ কোটি টকা । এই আঁচনিখনৰ যোগেদি ছাত্রীৰ নামভৰ্তিৰ হাৰ বৃদ্ধি পাব আৰু ড্ৰপ আউটৰ হাৰ কমিব ।
এইবাৰো প্ৰথম বিভাগত উত্তীৰ্ণ ছাত্রীসকলে লাভ কৰিব স্কুটী
এইবাৰৰ পৰা উচ্চতৰ মাধ্যমিকত ৭৫ শতাংশ আৰু ততোধিক নম্বৰ লাভ কৰা ছাত্রীসকলক স্কুটী দিয়া হ'ব বুলি ঘোষণা কৰা হৈছিল । কিন্তু এইবছৰ ৬০ শতাংশ আৰু ততোধিক নম্বৰ পাভ কৰা ছাত্রীসকলক স্কুটী দিয়া হ'ব । অহা বছৰৰ পৰা সলনি হ'ব নিয়ম । এইবাৰ ৫০ হাজাৰ ছাত্রীয়ে লাভ কৰিব স্কুটী । উল্লেখ্য যে স্কুটী দিয়া বাবে এইবাৰ ৪০ হাজাৰ ছাত্রী প্ৰথম বিভাগত উত্তীৰ্ণ হৈছে ।
