বৰপেটা: ঐতিহ্যমণ্ডিত বৰপেটা সত্ৰৰ বৰ্ষ গণনাত সোমবাৰৰ পৰা আৰম্ভ হোৱা অসমীয়া নতুন বৰ্ষটোত ৰাজ্যখনক বিভিন্ন প্ৰাকৃতিক দুৰ্যোগে জোকাৰি যোৱাৰ সম্ভাৱনা ব্যক্ত কৰা হৈছে । এই গণনাতে দেশৰ আৰু অসমৰ ৰাজনীতিৰ ওপৰতো কেইবাটাও সম্ভাৱনা প্ৰকাশ কৰিছে সত্ৰখনৰ দৈৱজ্ঞই ।
উল্লেখ্য যে পহিলা ব'হাগত বৰপেটা সত্ৰত সত্ৰৰ দৈৱজ্ঞই পৰম্পৰাগতভাৱে বিহু গণনা কৰি আহিছে । এই গণনাক বৰ্ষফল গণনা বুলিও কোৱা হয় । সত্ৰখনৰ বৰ্তমানৰ দৈৱজ্ঞ ত্ৰিদীপ দেৱশৰ্মাই ভাৰতৰ ৰাজনীতিৰ ক্ষেত্ৰত প্ৰধানমন্ত্ৰী নৰেন্দ্ৰ মোদী সন্দৰ্ভত কয় যে অহা ২৭ মে'লৈকে প্ৰধানমন্ত্ৰীৰ বাবে শুভ নহয় ৷ শাৰিৰীক আৰু মানসিক কষ্টৰ যোগ আছে ৷
আনহাতে, অসমৰ মুখ্যমন্ত্ৰী সন্দৰ্ভত গণনা উল্লেখ কৰি দৈৱজ্ঞগৰাকীয়ে কয়, "২০২৬ ৰ নৱেম্বৰলৈকে ড৹ হিমন্ত বিশ্ব শৰ্মাৰ শুভ দশা চলি থাকিব ৷ বৰঞ্চ শুক্ৰৰ দশা চলি থকাৰ বাবে বিগত বছৰতকৈ এই বছৰটো তেওঁৰ বাবে হ'ব অন্যতম শ্ৰেষ্ঠ বৰ্ষ ৷ ইয়াৰ বাবেই ড৹ হিমন্ত বিশ্ব শৰ্মা দ্বিতীয়বাৰলৈ অসমৰ মুখ্যমন্ত্ৰী হ'ব ৷"
শত্ৰুৰ পৰাও মুখ্যমন্ত্ৰীৰ কোনোধৰণৰ ক্ষতি নহয় বুলি উল্লেখ কৰি দৈৱজ্ঞই কয়, "জনসাধাৰণৰ পৰা সন্মান আৰু প্ৰীতি লাভ কৰিব মুখ্যমন্ত্ৰীয়ে ৷ দান আৰু ধাৰ্মিকতাৰ বাবে তেওঁৰ শত্ৰু দমন হ'ব ৷ অৱশ্যে অহা ১৪ আহাৰৰ পৰা ৰাহু আৰু কেতু সঞ্চাৰ হোৱাৰ ফলত ৰাজনৈতিক ক্ষেত্ৰত মুখ্যমন্ত্ৰী কিছু সাৱধান হোৱাও ভাল ৷ সেই সময়ছোৱাত নিজৰ ভুলত কেতিয়াবা কাৰ্য নষ্ট হ'ব পাৰে ৷ কথা কওঁতে সাৱধান হোৱাৰ লগতে দেহৰ যত্নও ল'ব লাগিব মুখ্যমন্ত্ৰীয়ে ৷"
ইপিনে সদৌ অসম ছাত্ৰ সন্থাকে ধৰি এনে সকলো সংগঠনৰ বাবে নতুন অসমীয়া বৰ্ষটো বিশেষ শুভ নহয় বুলিও গণনাত পোৱাৰ কথা দৈৱজ্ঞই উল্লেখ কৰে ।
