'লা ইলাহা ইল্লালা'.... যমদূতৰ পৰা বাচিবলৈ কলিমা পঢ়িলে শিলচৰৰ হিন্দু পৰিয়ালে

শিলচৰ/গুৱাহাটী: মঙলবাৰে জম্মু-কাশ্মীৰৰ পহলগামত সংঘটিত হয় এক ভয়ানক সন্ত্ৰাসবাদী আক্ৰমণৰ ঘটনা । এই ঘটনাত ইতিমধ্যে ২৬ গৰাকী পৰ্যটকৰ মৃত্যু হৈছে । আনহাতে, আহত হৈছে আন কেইবাগৰাকীও । ইফালে এই অমানুষিক আক্ৰমণৰ বলি হোৱাৰ পৰা কথমপি ৰক্ষা পৰে আন বহু পৰ্যটক ।

দেশৰ বিভিন্ন ৰাজ্যৰ পৰা অৱসৰ বিনোদনৰ বাবে যোৱা পৰ্যটকসকলক নিৰ্বিচাৰে কৰা আক্ৰমণৰ ঘটনাই এতিয়া দেশ-বিদেশত তুমুল প্ৰতিক্ৰিয়াৰ সৃষ্টি কৰিছে । এই বৰ্বৰ আক্ৰমণৰ ঘটনাক সকলোৱে একেমুখে গৰিহণা দিছে ।

কাশ্মীৰত দেৱাশিস ভট্টাচাৰ্যৰ পুত্ৰ আৰু পত্নী (ETV Bharat Assam)

ইফালে এই আক্ৰমণৰ পৰা কথমপি প্ৰাণৰক্ষা পৰা বিভিন্নজনে বৰ্ণনা কৰিছে শ্বাসৰুদ্ধকাৰী ঘটনা । মৃত্যুৰ দুৱাৰদলিৰ পৰা উভতি অহা বিভিন্নজনে আগবঢ়োৱা মৃত্যু বিভীষিকাৰ চাক্ষুস ঘটনাৰ বৰ্ণনাই সকলোকে শিহৰিত কৰিছে । এই ভয়ংকৰ ঘটনাৰ পৰা নিজৰ প্ৰাণ ৰক্ষা কৰিবলৈ সক্ষম হৈছে অসমৰো এটা পৰিয়ালে । শিলচৰৰ পৰিয়ালটোৱে এই আক্ৰমণৰ ঘটনাৰ বৰ্ণনা ফোনযোগে আগবাঢ়াইছে ই টিভি ভাৰতৰ প্ৰতিনিধিৰ আগত ।

কেনেদৰে ৰক্ষা পৰিল শিলচৰৰ পৰিয়ালটো

সন্ত্ৰাসবাদীৰ ভয়ংকৰ আক্ৰমণৰ পৰা কথমপি ৰক্ষা পৰে শিলচৰৰ এটা হিন্দু পৰিয়াল । এই পৰিয়ালটো হৈছে শিলচৰ শিৱালিপাৰ্কৰ বাসিন্দা তথা শিলচৰ অসম বিশ্ববিদ্যালয়ৰ বাংলা বিভাগৰ অধ্যাপক দেৱাশিস ভট্টাচাৰ্যৰ পৰিয়াল ৷ অধ্যাপক দেৱাশিস ভট্টাচাৰ্যই তেওঁৰ পত্নী আৰু পুত্ৰক লগত লৈ ছুটী কটাবলৈ দুদিন পূৰ্বে কাশ্মীৰলৈ গৈছিল ৷

মঙলবাৰে তেওঁলোক পহলগামলৈ গৈছিল । তাত হঠাতে সন্ত্ৰাসবাদীয়ে পৰ্যটকসকলৰ ওপৰত গুলীবৰ্ষণ কৰে । প্ৰাণৰক্ষাৰ বাবে আন পৰ্যটকৰ সৈতে দেৱাশিস ভট্টাচাৰ্যৰ পৰিয়ালটোৱে জংঘলৰ ভিতৰত লুকাই পৰে । কিন্তু তেওঁলোকক প্ৰত্যক্ষ কৰে দুজন সন্ত্ৰাসবাদীয়ে । লগে লগে দেৱাশিস ভট্টাচাৰ্যৰ পৰিয়ালৰ সদস্যসকলৰ মূৰত বন্দুক লগাই সন্ত্ৰাসবাদীয়ে কলিমা পঢ়াৰ কথা কয় । ভাগ্যক্ৰমে পৰিয়ালটোৱে কলিমা জানিছিল । সেয়ে তিনিজনীয়া পৰিয়ালটোৱে সন্ত্ৰাসবাদীৰ সন্মুখত কলিমা পঢ়ে আৰু তাৰ ফলতে তেওঁলোকৰ প্ৰাণৰক্ষা পৰে ।

পত্নীৰ সৈতে দেৱাশিস ভট্টাচাৰ্য (ETV Bharat Assam)

কিন্তু কাষতে থকা আন এজনে কলিমা নজনাৰ বাবে তেওঁলোকৰ সন্মুখতে লোকজনক সন্ত্ৰাসবাদীয়ে গুলীয়াই হত্যা কৰে বুলি জনাই অধ্যাপক দেৱাশিস ভট্টাচাৰ্যই । ইফালে এই ঘটনাৰ পাছত কোনোমতে উক্ত স্থান এৰি তেওঁলোক পলাই আহে ৷ বৰ্তমান তেওঁলোক শ্ৰীনগৰত আছে বুলি জনাইছে অধ্যাপক দেৱাশিস ভট্টাচাৰ্যই ।

অধ্যাপক দেৱাশিস ভট্টাচাৰ্যই বৰ্ণনা কৰিলে শ্বাসৰুদ্ধকাৰী ঘটনা

বৰ্তমান শ্ৰীনগৰৰ হোটেলত থকা অধ্যাপক দেৱাশিস ভট্টাচাৰ্যৰ পৰা ঘটনা সন্দৰ্ভত জানিবলৈ ফোনযোগে যোগাযোগ কৰে ই টিভি ভাৰত অসমৰ ব্যুৰ' চীফ প্ৰশান্ত কুমাৰ বৰুৱাই । আমাৰ প্ৰতিনিধিৰ প্ৰশ্নৰ উত্তৰত সমগ্ৰ ঘটনা বৰ্ণনা কৰে অধ্যাপক দেৱাশিস ভট্টাচাৰ্যই ।

দেৱাশিস ভট্টাচাৰ্যৰ মুখেৰে শ্বাসৰুদ্ধকাৰী বৰ্ণনা

আমি কালি ৰাতিপুৱা শ্ৰীনগৰৰ পৰা পহলগাম গৈ পালোঁ । পহলগামৰ যিকেইটা টুৰিষ্ট স্পট আছে তাত যাবলৈ হ'লে ঘোঁৰাত যাব লাগে । ঘোঁৰা লৈ আমি ষ্টাৰ্ট কৰিলোঁ ১১.৩০ মানত । মই স্পটত গৈ পালোঁ ১.৩০-২ টা মান বজাত । আমি গৈ পোৱাৰ ১৫ মিনিটমান পিছত গুলীৰ শব্দ শুনিবলৈ পালোঁ । লগতে এজন লোকেল ফটোগ্ৰাফাৰে কথা পাতি আছিল । ফটোগ্ৰাফাৰক সুধিলোঁ গুলীৰ শব্দ কিহৰ । তেতিয়া ক'লে যে একো নাই কেতিয়াবা বান্দৰ-চান্দৰ নামি আহে, তেতিয়া ফৰেষ্টৰ মানুহে ইয়াতে ব্লেংক ফায়াৰ কৰি দিয়ে । টুৰিষ্টক ডিষ্টাৰ্ব কৰে সেই কাৰণে কৰে ।

মই সিমান গুৰুত্ব দিয়া নাই । তাৰ পিছত আৰু এটা দুটা আৰম্ভ হ'ল গুলীৰ শব্দ । মোৰ ল'ৰাই লক্ষ্য কৰিলে দুজনে শুই আছিল, এজন গৈ তিনি-চাৰি হাত দূৰৈৰ পৰা চিধাচিধি গুলী মাৰি দিলে । মানুহটো পৰি থাকিল । তেতিয়া একেলগে ১০-১৫ টা গুলীৰ আৱাজ আৰম্ভ হ'ল । ৮০০ বৰ্গমিটাৰ মানৰ এখন ফিল্ড, তাতে গুলীয়াগুলী আৰম্ভ হৈ গ'ল বিভিন্ন ঠাইত, বিভিন্ন ফালে । তেতিয়া আমি ওচৰতে এডাল গছ আছিল তাৰ তলত গোট খালোঁ আটাইকেইজন আৰু শুই থাকিলোঁ ।

শুই থাকি যেতিয়া শুনিবলৈ পালোঁ যে মানুহবোৰে 'লা ইলাহা ইল্লালা' জপি আছে, ময়ো লা ইলাহা ইল্লালা আৰম্ভ কৰি দিলোঁ । এজন মানুহে ক'ব পৰা নাই । তেতিয়া এজন মিলিটেণ্ট আহিল আৰু কিবা ক'বলৈ দিলে । কি ক'ব দিলে মই শুনা নাই । মানুহটোৱে ক'ব পৰা নাই । তেতিয়া সাত-আঠ হাত দূৰৈৰ পৰা মানুহটোক ডাইৰেক্ট গুলীয়াই দিলে । মানুহটো যেতিয়া পৰিল তেওঁৰ ভৰিখন আহি মোৰ গাত লাগিল ।

তাৰ পিছত মোকো গান পইণ্টত ধৰিছিল । মোৰ ল'ৰাই লক্ষ্য কৰিছিল কথাটো । মোক আহি সুধি আছে । কিন্তু মই যে গান পইণ্টত আছোঁ মইতো দেখা নাই । তেতিয়া মোক সুধি আছে 'ক্যা বোল ৰহি হু' । মই তেতিয়া লাই ইলাহা... সেই একেই কথা জপি আছিলোঁ । লাহে লাহে মোক এৰি দিলে । কিন্তু তিনি চাৰিবাৰমান আমাৰ চাৰিওফালে ঘূৰিলে মানুহটো । তাৰ পিছত লাহে লাহে গছডালৰ পৰা অলপ আঁতৰি গ'ল । যেতিয়া গছডালৰ পৰা ২০ মিটাৰমান আঁতৰি গ'ল মানুহটো, আমি একদম দৌৰি খৰখেদাকৈ ওচৰতে এখন ফেন্সিং আছিল কোনোমতে ক্ৰছ কৰি আমি পাহাৰত ক্লাইম্ব কৰা আৰম্ভ কৰি দিলোঁ ।

দুই আঢ়ৈ ঘণ্টামান আমি পাহাৰতেই কেতিয়াবা উঠিছোঁ, কেতিয়াবা নামিছোঁ । তাৰ পিছত ঘোঁৰাৰ খোজৰ চিন অনুসৰণ কৰি আমি গৈ আছোঁ । তাৰ পিছত এখন গাঁও গৈ পালোঁ আৰু তেতিয়া অলপ নেটৱৰ্কো পালোঁ । তেতিয়া মোক ড্ৰাইভাৰে ফোন কৰিলে । তেতিয়া মই এগৰাকী কাশ্মীৰী মহিলাক ক'লোঁ যে আপুনি অলপ ফোনটো লৈ কৈ দিয়ক আমি এতিয়া ক'ত আছোঁ ।

মহিলাগৰাকীয়ে কাশ্মীৰী ভাষাত ড্ৰাইভাৰৰ লগত কথা পাতিলে আৰু মোক ছাজেষ্ট কৰিলে যে আপোনালোক এই বাটেৰে নামি থাকক । আমি নামি থাকিলোঁ । এটা সময়ত আমি যে ঘোঁৰাবোৰ ভাৰা কৰিছিলোঁ এই মানুহবোৰ আহি পালেহি । তাৰ পিছত আমাক ঘোঁৰাত উঠাই ৰেছকিউ কৰি আনিলে । ছত্তীশগড়ৰ এটা ফেমিলি, ফেমিলি নহয় হাজবেণ্ড ক'ত হেৰাই গ'ল ক'ব নোৱাৰো, মহিলা আৰু এটি কণমানি আমাৰ লগত আহিল । আমি তললৈ নামি আহিলোঁ । তাৰ পিছত আমি ড্ৰাইভাৰক মাতি আনিলোঁ । ড্ৰাইভাৰৰ গাড়ীত উঠি আমি ডাইৰেক্ট পহলগামৰ পৰা শ্ৰীনগৰ গুচি আহিলোঁ ।