চিকিৎসালয়ত কেনে আছে সাংসদ ফণীভূষণ চৌধুৰী ?

গুৱাহাটী: বৰ্তমান সুস্থিৰ অৱস্থাত আছে সাংসদ ফণীভূষণ চৌধুৰীৰ স্বাস্থ্য । জ্যেষ্ঠ ৰাজনীতিকগৰাকীৰ স্বাস্থ্যক লৈ চিন্তাৰ কোনো কাৰণ নাই বুলি জনাইছে চিকিৎসকে ।বিগত কেইবাদিনো ধৰি জ্বৰ আৰু কাহত ভুগি থকাৰ বাবে বুধবাৰে স্বাস্থ্যৰ কিছু অৱনতি ঘটিছিল সাংসদ চৌধুৰীৰ ।

এই তথ্য সদৰী কৰিলে গুৱাহাটীৰ হেল্থ চিটী হাস্পতালৰ চিকিৎসক অতনু বৰঠাকুৰে ।

বৃহস্পতিবাৰে হেল্থ চিটী হাস্পতালৰ প্ৰেক্ষাগৃহত এক সংবাদমেল সম্বোধন কৰি ডাঃ অতনু বৰঠাকুৰে সাংসদ ফণীভূষণ চৌধুৰীৰ স্বাস্থ্য সম্পৰ্কত কয়, "যোৱানিশা ১২.৪০ বজাত তেখেতক ভৰ্তি কৰোৱা হৈছিল হেল্থ চিটী হাস্পতালত । বিগত কেইবাদিনো ধৰি জ্বৰ আৰু কাহত ভুগি আছিল সাংসদগৰাকী । যাৰ বাবে কালিৰে পৰা উশাহ-নিশাহত কিছু কষ্ট পাইছিল তেওঁ । সম্প্ৰতি ICCU তে ৰাখিছো । বৰ্তমান তেখেতৰ স্বাস্থ্য সংকটমুক্ত বুলি আমি ক’ব পাৰো । ডাঃ শশাংক বৰুৱাৰ নেতৃত্বত ৭ জন বিশেষজ্ঞ চিকিৎসকৰ দলে চিকিৎসা কৰি আছে ।’’

উল্লেখ্য যে বুধবাৰে সন্ধিয়া প্ৰায় ৮ বজাত নিজা বাসগৃহত হঠাৎ অসুস্থ হৈ পৰিছিল অগপ নেতা তথা বৰপেটা লোকসভা সমষ্টিৰ সাংসদ ফণীভূষণ চৌধুৰী । অসুস্থ হৈ পৰাত সাংসদগৰাকীক ততাতৈয়াকৈ লৈ যোৱা হৈছিল বঙাইগাঁৱৰ ল'ৱাৰ আছাম হাস্পতাললৈ । তাত প্ৰাথমিক চিকিৎসা সম্পন্ন হোৱাৰ পাছত সাংসদগৰাকীক বুধবাৰে নিশা প্ৰায় ১২:৪০ বজাত ভৰ্তি কৰোৱা হয় গুৱাহাটীৰ খানাপাৰাস্থিত হেল্থ চিটী হাস্পতালৰ জৰুৰীকালীন বিভাগত ।

মঙলবাৰে সন্ধিয়াৰ পৰা অসুস্থ অনুভৱ কৰিছিল সাংসদগৰাকীয়ে । বুধবাৰে দিনৰ ভাগত সমষ্টিৰ কেইবাখনো ৰাজহুৱা সভাত অংশগ্ৰহণ কৰিছিল ফণীভূষণ চৌধুৰীয়ে । ব্যস্ততাৰ বাবে দিনৰ আহাৰ গ্ৰহণ কৰা নাছিল সাংসদগৰাকীয়ে । অসুস্থ হৈ থকা সাংসদগৰাকী বুধবাৰে সন্ধিয়াৰ ভাগত অত্যধিক দুৰ্বল হৈ পৰে ।

আনহাতে, হৃদৰোগতো আক্ৰান্ত সাংসদ ফণীভূষণ চৌধুৰী । প্ৰায় ৫ বছৰৰ পূৰ্বে পেচমেকাৰ স্থাপন কৰা হৈছিল ফণীভূষণ চৌধুৰীৰ দেহত । সাংসদ চৌধুৰীক হেল্থ চিটী হাস্পতালত ভৰ্তি কৰোৱাৰ কিছু সময়ৰ পাছতেই মন্ত্ৰী জয়ন্ত মল্লবৰুৱা উপস্থিত হৈ জ্যেষ্ঠ নেতা তথা সাংসদগৰাকীৰ স্বাস্থ্যৰ বুজ লয় । বৰ্তমান হেল্থ চিটী হাস্পতালত সূক্ষ্ম নিৰীক্ষণত আছে সাংসদ ফণীভূষণ চৌধুৰী । তেওঁৰ সৈতে চিকিৎসালয়ত উপস্থিত আছে বিধায়িকা পত্নী আৰু পুত্ৰ ।

লগতে পঢ়ক: বৰপেটাৰ সাংসদ ফণীভূষণ চৌধুৰী অসুস্থ; গুৱাহাটীৰ চিকিৎসালয়ত ভৰ্তি