যেন স্তব্ধ হৈ গ'ল ঘড়ীৰ কাঁটা... প্ৰিয় শিল্পীৰ মৃত্যুত নিজে নিজে বন্ধ হৈ পৰিল গুৱাহাটী মহানগৰী
ঠায়ে ঠায়ে শ্ৰদ্ধাঞ্জলি । বতাহত যেন ভাপ হৈ উৰি আছে কেৱল চকুপানী...
Published : September 20, 2025 at 3:13 PM IST
গুৱাহাটী: ৰাজধানী চহৰ গুৱাহাটী মহানগৰী আজি স্তব্ধ । পুৱাৰে পৰাই মহানগৰীৰ সকলো ব্যৱসায়িক প্ৰতিষ্ঠান বন্ধ ৰখা হৈছে । আপোনৰো আপোন শিল্পী জুবিন গাৰ্গৰ প্ৰতি শ্ৰদ্ধাঞ্জলি জনাই ব্যৱসায়ীসকলে বন্ধ ৰাখিছে নিজৰ ব্যৱসায়িক প্ৰতিষ্ঠান । কাৰণ আজি অসমবাসীৰ মন গধূৰ হৈ আছে ।
আপোন শিল্পীজনক হেৰুৱাই মৰ্মাহত হৈ পৰিছে প্ৰতিগৰাকী অসমীয়া । সেই গধূৰ মন লৈ আজি জুবিন গাৰ্গলৈ শ্ৰদ্ধাঞ্জলি জনাই স্তব্ধ হ'ল গুৱাহাটী মহানগৰী ।
স্বতস্ফূৰ্তভাৱে বন্ধ ৰাখিছে সকলো দোকান-পোহাৰ, ব্যৱসায়িক প্ৰতিষ্ঠান । অৱশ্যে চেম্বাৰ্ছ অৱ কমাৰ্চে জুবিন গাৰ্গৰ প্ৰতি শ্ৰদ্ধা নিবেদন কৰি দুদিনৰ বাবে ব্যৱসায়িক প্ৰতিষ্ঠান বন্ধ ৰখাৰ আহ্বান জনাইছিল; কিন্তু সেই আহ্বানৰ পূৰ্বেই জুবিন গাৰ্গৰ মৃত্যুৰ খবৰত শোকস্তব্ধ হৈ শুকুৰবাৰে সন্ধিয়াই গুৱাহাটীৰ বহু ব্যৱসায়িক প্ৰতিষ্ঠান বন্ধ ৰখা হৈছিল ।
শনিবাৰে সম্পূৰ্ণৰূপে গুৱাহাটীৰ ব্যৱসায়িক প্ৰতিষ্ঠান বন্ধ ৰখা হয় । সকলোৱে মৰমৰ শিল্পীগৰাকীৰ প্ৰতি শ্ৰদ্ধা জনাই ব্যৱসায়িক প্ৰতিষ্ঠান বন্ধ ৰাখিছে । ইফালে, গুৱাহাটীৰ এনে এটা স্থান নাই য'ত জুবিন গাৰ্গৰ প্ৰতিচ্ছবি লগাই শ্ৰদ্ধাঞ্জলি জনোৱা নাই । ঠায়ে ঠায়ে জনতাই জনতাৰ শিল্পীগৰাকীৰ প্ৰতি শ্ৰদ্ধা নিবেদন কৰাৰ লগতে তেওঁৰ গীতেৰেই শ্ৰদ্ধা নিবেদন কৰিছে ।
আজি সকলো ম্ৰিয়মান । কাকো কোনেও সান্ত্বনা দিব পৰা নাই । সকলোৰে মুখত আজি বেদনাৰ চিন । সকলো অপেক্ষাত আছে কেতিয়া আহিব মৰমৰ শিল্পীগৰাকীৰ পাৰ্থিৱ শৰীৰ । শেষ শ্ৰদ্ধা নিবেদনৰ বাবে সকলোৱে অপেক্ষাৰত হৈ আছে । ৰাজ্যৰ বিভিন্ন প্ৰান্তৰ পৰা গুৱাহাটীলৈ আহিছে হাজাৰ হাজাৰ জুবিনপ্ৰেমী । মুখ্যমন্ত্রীয়ে জনোৱা মতে আজি নিশা নাইবা কাইলৈ পুৱা জুবিন গাৰ্গৰ নশ্বৰ দেহ গুৱাহাটীলৈ অনা হ'ব । ছিংগাপুৰৰ পৰা আজি নিশাৰ ভাগত জুবিন গাৰ্গৰ পাৰ্থিৱ শৰীৰ দিল্লীলৈ অনা হ'ব । তাৰ পিছত বিশেষ বিমান যোগে গুৱাহাটীলৈ অনা হ'ব ।
শিল্পীগৰাকীৰ পাৰ্থিৱ শৰীৰ প্ৰথমে তেওঁৰ বাসগৃহলৈ নিয়া হ'ব য'ত পৰিয়ালৰ লোকে শেষশ্ৰদ্ধা নিবেদন কৰি কিছু নিবিড় মুহূৰ্ত কটাব । তাৰ পাছত ৰাজহুৱা শ্ৰদ্ধাঞ্জলি জনোৱাৰ বাবে জুবিন গাৰ্গৰ পাৰ্থিৱ শৰীৰ সৰুসজাইত ৰখা হ'ব য'ত ৰাইজে প্ৰিয় শিল্পীগৰাকীৰ প্ৰতি শেষশ্ৰদ্ধা নিবেদন কৰিব । ইফালে, দিল্লীৰ পৰা জুবিন গাৰ্গৰ পাৰ্থিৱ শৰীৰ গুৱাহাটীলৈ অনাৰ বাবে দিল্লী অভিমুখে ৰাওনা হৈছে মুখ্যমন্ত্রী ড৹ হিমন্ত বিশ্ব শৰ্মা ।
উল্লেখ্য যে ছিংগাপুৰত অনুষ্ঠিত চতুৰ্থ উত্তৰ-পূব ভাৰত মহোৎসৱ (এন ই আই এফ) ২০২৫ ত অংশ ল’বলৈ গৈছিল জুবিন গাৰ্গ । ২০ ছেপ্টেম্বৰত সাংস্কৃতিক অনুষ্ঠানত জুবিনে গান গোৱাৰ কথা আছিল; কিন্তু শুকুৰবাৰে ছিংগাপুৰ সাগৰত সাঁতুৰিবলৈ গৈ শিল্পীগৰাকী হঠাতে অসুস্থ হৈ পৰে । লগে লগে গুৰুতৰ অৱস্থাত ছিংগাপুৰ জেনেৰেল হাস্পতালত ভৰ্তি কৰোৱা হয় যদিও চিকিৎসকে শিল্পীগৰাকীৰ প্ৰাণৰক্ষা কৰিব নোৱাৰিলে। অতি আদৰৰ-মৰমৰ শিল্পীগৰাকীক অকস্মাতে হেৰুৱাই মৰ্মাহত হৈ পৰিছে প্ৰতিগৰাকী অসমীয়া ।
