বিধায়কৰ নতুন ঘৰৰ কাষতেই ওলাল দুটাকৈ গ্ৰেণেড

সৰুপথাৰ: গণৰাজ্য দিৱসৰ প্ৰাকক্ষণত সৰুপথাৰ নগৰত দুটাকৈ বোমা উদ্ধাৰ । সৰুপথাৰ সমষ্টিৰ বিধায়ক বিশ্বজিৎ ফুকনৰ নৱ-নিৰ্মিত আবাস গৃহৰ সন্মুখত বুধবাৰে উদ্ধাৰ হয় গ্ৰেণেড দুটা । বিধায়কৰ নৱ-নিৰ্মিত আবাস গৃহৰ সন্মুখত থকা এটা পৰিত্যক্ত ভঁৰালৰ তলত গ্ৰেণেড দুটা পোৱা যায় । বিধায়কৰ সৰুপথাৰ নগৰত বাসগৃহৰ কাষতেই থকা বাসগৃহৰ এটা ভঁৰাল ঘৰ ভাঙি আছিল মিস্ত্ৰীয়ে । তেনে অৱস্থাতেই উদ্ধাৰ হৈছে দুটাকৈ পুৰণি গ্ৰেণেড ।

ইতিমধ্যে ঘটনাস্থলীত অসম আৰক্ষী আৰু অগ্নি নিৰ্বাপক বাহিনী উপস্থিত হৈ তদন্ত আৰম্ভ কৰিছে । বাতৰি লিখাৰ সময়লৈকে গোলাঘাটৰ পৰা প্ৰশাসনৰ এটা বিশেষ দল আহি থকাৰ খবৰ পোৱা গৈছে । সৰুপথাৰৰ এজন বিজেপি সদস্যই মন্তব্য কৰা অনুসৰি, "সৰুপথাৰৰ বিধায়কৰ নৱ-নিৰ্মিত বাসগৃহৰ নিচেই কাষতে থকা মৃদুল গোঁহাইৰ বাসগৃহৰ এটা ভঁৰাল ঘৰ ভাগি আছিল মিস্ত্ৰীয়ে । তেনে অৱস্থাতে প্ৰত্যক্ষ কৰে দুটাকৈ বোমা । তৎক্ষণাত মিস্ত্ৰী এজনে বোমা উদ্ধাৰ হোৱা কথাটো অৱগত কৰে । সেই মুহূৰ্ততে বিধায়কক ফোনযোগে অৱগত কৰোঁ ।"

তেওঁ লগতে কয়, "বিধায়কে আৰক্ষীৰ দল উপস্থিত হোৱাৰ কথা জানিবলৈ দিয়ে লগতে বোমাৰ পৰা আঁতৰত থাকিবলৈ জনায় । বোমা দুটা পুৰণি যদিও হাতেৰে স্পৰ্শ কৰোঁ ।" উল্লেখ্য যে, কিছুদিনৰ পিছৰে পৰাই সৰুপথাৰৰ বিধায়ক বিশ্বজিৎ ফুকনে নৱ-নিৰ্মিত এই বাসগৃহত থকাৰ কথা । এইখিনিতে প্ৰশ্ন হৈছে যে ভঁৰাল ঘৰটো ভাগিল বুলিহে উদ্ধাৰ হৈছে দুটাকৈ বোমা । কিন্তু যদিহে ভঁৰালঘৰটো পূৰ্বৰ অৱস্থাতেই থাকিলহেতেন তেন্তে কোনেও হয়তো গমকেই নাপালেহেতেন ।

প্ৰশ্ন হৈছে কোনে ৰাখিছিল সেই গ্ৰেনেড দুটা ? বিধায়ক আবাসৰ নিচেই কাষতেই থকা ভঁৰালত উদ্ধাৰ হোৱা গ্ৰেনেড দুটাত বৰ্তমানেও ছেফটি পিন সংলগ্ন হৈ আছে ।

উল্লেখযোগ্য যে ২০২৪ বৰ্ষৰ স্বাধীনতা দিৱসৰ দিনটোত ৰাজ্যৰ প্ৰান্তে প্ৰান্তে বোমা সংস্থাপনৰ খবৰে ৰাজ্যৰ জনতাক আতংকিত কৰিছিল । সেই সময়ত সৰুপথাৰ নগৰৰ মাজমজিয়াতো উদ্ধাৰ হৈছিল বোমাসদৃশ সামগ্ৰী । এতিয়া গণৰাজ্য দিৱসৰ প্ৰাকক্ষণত সৰুপথাৰ সমষ্টিৰ বিধায়কৰ বাসগৃহৰ কাষতেই উদ্ধাৰ হোৱা দুটাকৈ গ্ৰেনেডক লৈ চিন্তিত ৰাইজ । আৰক্ষীৰ তদন্তৰ পিছতেহে গম পোৱা যাব কোনে থৈছিল সেই গ্ৰেনেড দুটা ।