গোলাঘাট/কাজিৰঙা: গোলাঘাট জিলাৰ বোকাখাত সমষ্টিত সংঘটিত হৈছে এক চাঞ্চল্যকৰ ঘটনা । জাঠি-জোং লৈ অতি নৃশংসভাৱে গাঁৱৰ ৰাইজে হত্যা কৰিলে এটা ঢেকীয়াপতীয়া বাঘ । বোকাখাত সমষ্টিৰ অন্তৰ্গত বুধে চাপৰিত বাঘটো হত্যা কৰে গাঁৱৰ ৰাইজে ৷ এই কথা উল্লেখ কৰিছে বন বিভাগৰ লোকে ৷
গাঁৱৰ ৰাইজে প্ৰথমে পুৱাই তিনিঘৰীয়া-বৰচাপৰিৰ কলাবাৰীত প্ৰত্যক্ষ কৰে বাঘটো ৷ তাৰ পাছতে ৰাইজে চিঞৰ-বাখৰ কৰে ৷ গঞা ৰাইজৰ হুলস্থূল শুনি বাঘটো বৰবিলৰ ধাননিৰ মাজত লুকাই যায় ৷ কিন্তু গাঁৱৰ ৰাইজে সমগ্ৰ অঞ্চলটো ঘেৰাও কৰি দা-জাঠি-জোং লৈ বাঘটোক আক্ৰমণ কৰে ৷
বাঘটোক কেৱল নৃশংসভাৱে হত্যা কৰাই নহয়, গাঁৱৰ একাংশ ৰাইজে ইয়াৰ গাৰ মঙহ, নেজ, আগফালৰ ঠেং দুটাৰ আধা অংশ, পাছফালৰ ঠেং দুটাৰ নখ, দাঁত, এখন কাণ, ছাল আদি কাটি লৈ যায় ৷ ইফালে এই ঘটনাৰ খবৰ লাভ কৰি বন বিভাগৰ লোক উক্ত স্থানত উপস্থিত হয় যদিও বহু চেষ্টাৰ অন্ততহে দণ্ডাধীশৰ উপস্থিতিত উগ্ৰ গঞাৰ মাজৰ পৰা বাঘটোৰ মৃতদেহ তুলি নিবলৈ সক্ষম হয় ৷
জানিব পৰা মতে, উগ্ৰ গঞাৰ হাতৰ পৰা বাঘটোক উদ্ধাৰ কৰিবলৈ যাওঁতে বন বিভাগৰ কেবাজনো লোক কিছু পৰিমাণে আহত হয় ৷ বন বিভাগৰ লোকে বাঘটোৰ মৃতদেহ গোলাঘাট আঞ্চলিক বন বিষয়াৰ কাৰ্যালয়লৈ লৈ যায় ৷
এই সমগ্ৰ ঘটনা কেতিয়াও গ্ৰহণযোগ্য হ'ব নোৱাৰে বুলি তাৎক্ষণিক প্ৰতিক্ৰিয়া প্ৰকাশ কৰিছে বন মন্ত্ৰী চন্দ্ৰমোহন পাটোৱাৰীয়ে ৷ বিভাগীয় মন্ত্ৰীগৰাকীয়ে কয়- "বাঘ এটাৰ বিচৰণ দেখি ৰাইজ আতংকিত হোৱাটো স্বাভাৱিক ৷ কিন্তু বাঘটোক হত্যা কৰা কামটো কেতিযাও গ্ৰহণযোগ্য হ'ব নোৱাৰে ৷ অঞ্চলটোৰ ৰাইজে বন বিভাগক খবৰ দিব পাৰিলেহেতেন ৷ বন বিভাগে বাঘটো ট্ৰেংকুলাইজড কৰি তাৰ পৰা আনি হয় কাজিৰঙাত এৰি দিলেহেতেন নাইবা চিৰিয়াখানালৈ পঠিয়াই দিলেহেতেন ৷ কিন্তু এনেকৈ হত্যা কৰাটো উচিত হোৱা নাই ৷ ইতিমধ্যে ইয়াৰ তদন্তৰ ব্যৱস্থা কৰা হৈছে ৷ হত্যাকাৰীৰ বিৰুদ্ধে নিশ্চিতভাৱে ব্যৱস্থা গ্ৰহণ কৰা হ'ব ৷"
এই সম্পৰ্কে গোলাঘাট আঞ্চলিক বন বিভাগৰ বন বিষয়া আইহোম শ্যামে কয়, ‘‘ৰাইজে হত্যা কৰিছে এই ঢেঁকীয়াপতীয়া বাঘটোক । আমাক খবৰ দিয়াত আমি গৈ পোৱাৰ আগতেই হাজাৰ হাজাৰ লোকে হত্যা কৰিলে বাঘটোক ৷ আমি বচাবলৈ নোৱাৰিলো । এই সম্পৰ্কে তদন্ত কৰা আৰম্ভ কৰিছো । আমাৰ বনকৰ্মীসকলে বাধা প্ৰদান কৰাত ৰাইজে তেওঁলোককো আক্ৰমণ কৰিছিল ৷ যাৰ ফলত তিনিজন বনকৰ্মী আঘাতপ্ৰাপ্ত হৈছে । বাঘটোৰ দাঁত, কাণ, ভৰি, নেজ, মাংস, ছাল, নখ আদি ৰাইজে কাটি লৈ গৈছে । বাঘটোৰ বয়স ন-দহ বছৰ হ'ব ।’’
| লগতে পঢ়ক : নুমলীগড়ত উদ্ধাৰ অৰ্ধগলিত নাহৰফুটুকী |
