শান্তিপূৰ্ণভাৱে সম্পন্ন উৰিয়ামঘাটত প্ৰথম দিনৰ উচ্ছেদ অভিযান
ৰেংমা সংৰক্ষিত বনাঞ্চলৰ বিদ্যাপুৰ বজাৰত ব্যাপক উচ্ছেদ অভিযান । প্ৰশাসনে প্ৰকাশ কৰিলে প্ৰেছ বাৰ্তা ।
Published : July 29, 2025 at 10:22 PM IST
সৰুপথাৰ: গোলাঘাট জিলাৰ ৰেংমা সংৰক্ষিত বনাঞ্চলৰ ভিতৰত অৱস্থিত উৰিয়ামঘাটৰ বিদ্যাপুৰ বজাৰত মঙলবাৰে চলোৱা হয় এক বৃহৎ উচ্ছেদ অভিযান । গোলাঘাট জিলা প্রশাসন আৰু গোলাঘাট আৰক্ষীৰ সক্রিয় সহযোগত অসমৰ বন বিভাগৰ নেতৃত্বত তথা নাগালেণ্ড চৰকাৰ আৰু নাগালেণ্ড আৰক্ষীৰ ঘনিষ্ঠ সমন্বয়ত এই অভিযান সফলতাৰে সম্পন্ন কৰা হয় ।
এই অভিযানৰ সময়ত প্রায় ৪.২ হেক্টৰ বনাঞ্চলত বিস্তৃত প্রায় ১২০ টা অবৈধ বাণিজ্যিক প্রতিষ্ঠান ভংগ কৰা হয় । এই পদক্ষেপ বেদখল কৰা সংৰক্ষিত বনাঞ্চলৰ ভূমি পুনৰ উদ্ধাৰ আৰু পৰিৱেশ সংৰক্ষণৰ প্ৰতি চৰকাৰৰ দায়বদ্ধতাক শক্তিশালী কৰাৰ এক সংহত প্ৰচেষ্টাৰ অংশ আছিল ।
এই অভিযানত বৃহৎ পৰিসৰত যন্ত্রপাতি, বনকর্মী, প্রশাসনিক বিষয়া নিয়োগ কৰা হৈছিল । বিশেষ মুখ্য সচিব এম কে যাদৱৰ নেতৃত্বত আৰু অসমৰ প্ৰধান মুখ্য বন সংৰক্ষক, গোলাঘাটৰ জিলা আযুক্তগৰাকী, গোলাঘাটৰ জ্যেষ্ঠ আৰক্ষী অধীক্ষক তথা অতিৰিক্ত জিলা আযুক্ত আৰু কাৰ্যবাহী দণ্ডাধীশকে ধৰি অন্যান্য উচ্চপদস্থ বিষয়া সহযোগিতাত এই অভিযান সম্পন্ন কৰা হয় ।
অভিযান শান্তিপূর্ণভাৱে সম্পন্ন কৰিবলৈ আৰক্ষী আৰু চি আৰ পি এফৰ বাহিনী মোতায়েন কৰে প্ৰশাসনে । এই উচ্ছেদ অভিযানে সংৰক্ষিত বনাঞ্চলত অবৈধ বেদখল ৰোধ কৰাৰ লগতে অঞ্চলটোৰ পৰিৱেশ সংৰক্ষণৰ প্ৰসাৰৰ বাবে অসম চৰকাৰৰ অব্যাহত থকা প্ৰচেষ্টাৰ এক উল্লেখযোগ্য পদক্ষেপ হিচাপে পৰিগণিত হৈছে বুলি এক বিবৃতিতযোগে সদৰী কৰে প্ৰথমটো দিনৰ প্রেছ বার্তাত ।
উল্লেখ্য যে উৰিয়ামঘাটৰ সীমান্তত ১১,০০০ বিঘা ভূমি উচ্ছেদৰ বাবে মঙলবাৰৰ পৰা আৰম্ভ হৈছে উচ্ছেদ অভিযান । হাজাৰ হাজাৰ আৰক্ষী-প্ৰশাসনৰ লোকৰ কটকটীয়া নিৰাপত্তাৰ মাজত চলে উচ্ছেদকাৰ্য । বিদ্যাপুৰ নামেৰে এখন বৃহৎ বজাৰ নিৰ্মাণ কৰিছিল বেদখলকাৰীসকলে । সেই বজাৰৰ লগতে ব্যৱসায়িক প্ৰতিষ্ঠানসমূহো মহতিয়াই নিলে প্ৰশাসনৰ এক্সকেভেটৰে । ধংসস্তূপত পৰিণত হ'ল বিদ্যাপুৰ চহৰৰ লগতে বেদখলকাৰীৰ বাসগৃহসমূহ ।
