'ঝুমইৰ বিনন্দিনী'ৰ কাউন্ট-ডাউন আৰম্ভ
সৰুসজাই ষ্টেডিয়ামত 'ঝুমইৰ বিনন্দিনী'ৰ চূড়ান্ত অনুশীলত মুখ্যমন্ত্ৰী ড৹ হিমন্ত বিশ্ব শৰ্মা ।
Published : February 23, 2025 at 11:06 PM IST
গুৱাহাটী : সোমবাৰে সন্ধিয়া ৬ বজাত ঝুমইৰ বিনন্দিনীৰে মুখৰিত হৈ পৰিব গুৱাহাটীৰ সৰুসজাই ষ্টেডিয়াম । ৰাজ্যৰ বিভিন্ন জিলাৰ পৰা অহা ঝুমুৰ নৃত্যৰ শিল্পীসকলে দেওবাৰে সন্ধিয়া চূড়ান্ত অনুশীলনত অংশগ্ৰহণৰ পিচতেই আৰম্ভ হৈছে ঐতিহাসিক ক্ষণৰ কাউন্ট ডাউন ।
২০০ বছৰীয়া চাহ জনগোষ্ঠীৰ সংস্কৃতিক বিশ্ববাসীৰ মাজলৈ লৈ যোৱাৰ বাবে সাজু হৈছে মহিলা নৃত্যশিল্পীকে ধৰি পুৰুষ নৃত্যশিল্পীৰ লগতে বাদ্যযন্ত্ৰীসহ ৯ হাজাৰৰো অধিক শিল্পী ।
মাদলৰ চেৱত সৰুসজাইত প্ৰাণ পায় উঠিছে ঝুমুৰে । সোমবাৰে সৰুসজাই খেল পথাৰত প্ৰধানমন্ত্ৰী নৰেন্দ্ৰ মোদীৰ উপস্থিতিত প্ৰদৰ্শিত হ'ব মেগা ঝুমুৰ নৃত্য । ২১ ফেব্ৰুৱাৰীৰ পৰা ২৩ ফেব্ৰুৱাৰীলৈ সৰুসজাই ষ্টেডিয়ামত চলা মূল অনুশীলনৰ আজি চূড়ান্ত অনুশীলন আছিল ।
চূড়ান্ত অনুশীলত উপস্থিত থাকি সমগ্ৰ পৰিৱেশ পৰিদৰ্শন কৰে মুখ্যমন্ত্ৰী ড৹ হিমন্ত বিশ্ব শৰ্মাই । মুখ্যমন্ত্ৰীৰ লগতে উপস্থিত থাকে ৰাজ্যচৰকাৰৰ কেইবাগৰাকীও মন্ত্ৰী ।
সোমবাৰে সন্ধিয়া প্ৰধানমন্ত্ৰীকে ধৰি এই মেগা ঝুমুইৰ প্ৰদৰ্শনত উপস্থিত থাকিব ৬০ খন ৰাষ্ট্ৰৰ ৰাষ্ট্ৰদূত, দেশৰ উচ্চ আৰু উচ্চতম ন্যায়ালয়ৰ ন্যায়াধীশ, উদ্যোগপতিৰ লগতে বহু অভ্যাগতই । অসম চৰকাৰৰ উদ্যোগত আয়োজন কৰা ‘‘ঝুমইৰ বিনন্দিনী’’ শীৰ্ষক এই মেগা ঝুমুৰ নৃত্যই সোমবাৰে সন্ধিয়া ৰচনা কৰিব ইতিহাস ।
উল্লেখযোগ্য যে ১৬ মিনিট ৩২ ছেকেণ্ডৰ এই অনুষ্ঠানত অংশগ্ৰহণ কৰিছে ৰাজ্যৰ ৮০০ খন চাহ বাগিচাৰ শিল্পী প্ৰতিনিধি । ৮,৮৮৮ শিল্পীয়ে প্ৰদৰ্শন কৰিব ঝুমুৰ নৃত্য ।
ইফালে, চাহজনগোষ্ঠীৰ পৰম্পৰা ঝুমুৰ নৃত্যক দেশবাসীৰ লগতে বিশ্ববাসীৰ সন্মুখত পৰিচয় কৰাই দিবৰ বাবে চৰকাৰে গ্ৰহণ কৰা এই প্ৰচেষ্টাক ধন্যবাদ জনালে অংশগ্ৰহণকাৰী শিল্পীসকলে ।
ইতিমধ্যে মুখ্যমন্ত্ৰীয়ে ঘোষণা কৰা অনুসৰি ঝুমইৰ বিনন্দিনীত ভাগ লোৱা প্ৰতিগৰাকী শিল্পীলৈ ২৫ হাজাৰকৈ টকা আগবঢ়োৱা হৈছে ।
