গোৱালপাৰা, 9 আগষ্ট : গোৱালপাৰাত সংঘটিত হৈছে এক মৰ্মান্তিক ঘটনা ৷ নিজ পুত্ৰৰ প্ৰাণ ৰক্ষা কৰিবলৈ গৈ পুত্ৰৰ লগতে প্ৰাণ হেৰুৱালে পিতৃয়ে ৷ গোৱালপাৰা জিলাৰ লক্ষীপুৰ আৰক্ষী থানাৰ অন্তৰ্গত ধামৰ ৰুপকুৰা গাঁৱত সংঘটিত হৈছে এই কৰুণ ঘটনা ৷
জানিব পৰা মতে, বৃহস্পতিবাৰে নিশা প্ৰায় 10 মান বজাত বীৰেশ্বৰ হাজং নামৰ ব্যক্তিজনৰ পুত্ৰ ৰমেন হাজঙে নিশাৰ অহাৰ গ্ৰহণ কৰি গৰমৰ বাবে ঘৰৰ কাষতে থকা ৰাস্তাৰ কাষলৈ ওলাই আহিছিল ৷ বিগত সময়ছোৱাত জিলাখনৰ বান পৰিস্থিতি আৰু এমাহ ধৰি হোৱা নেৰানেপেৰা বৰষুণৰ ফলত ৰাস্তাৰ কাষত সৌৰশক্তিচালিত লাইটৰ এটা খুটা হাউলি বৈদ্যুতিক তাঁৰত সংযুক্ত হৈ আছিল ৷ এই কথা জানিব পৰা নাছিল ৰমেন হাজঙে ৷
পথৰ কাষলৈ ওলাই অহা ৰমেন হাজঙে এই হাউলি থকা সৌৰশক্তিচালিত লাইটৰ খুটা উঠাবলৈ লওঁতেই বিদ্যুৎস্পৃষ্ট হয় ৷ বিদ্যুৎস্পৃষ্ট হৈ ৰমেন হাজঙক চটফটাই থকা প্ৰত্যক্ষ কৰি পিতৃ বীৰেশ্বৰ হাজঙে পুত্ৰক বচাবলৈ গৈ বিদ্যুতৰ তাঁৰত লাগি ধৰে ৷ পিছত পৰিয়ালৰ চিঞৰ-বাখৰ শুনি স্থানীয় ৰাইজে দুয়োকে উদ্ধাৰ কৰে যদিও দুয়ো পিতা-পুত্ৰ গুৰুতৰভাৱে আহত হয় ৷
লগে লগে স্থানীয় ৰাইজৰ সহযোগত ততাতৈয়াকৈ লক্ষীপুৰ চিকিৎসালয়ত গুৰুতৰভাৱে আহত পিতা-পুত্ৰক ভৰ্তি কৰৰোৱা হয় যদিও চিকিৎসকে দুয়োকে মৃত বুলি ঘোষণা কৰে ৷ শক্তি বিভাগৰ অৱহেলাৰ বাবেই এইদৰে বিদ্যুৎস্পৃষ্ট হৈ পিতা-পুত্ৰৰ মৃত্যু হোৱা বুলি অভিযোগ কৰিছে স্থানীয় ৰাইজে ৷ এই ঘটনাৰ পিছতেই স্থানীয় ৰাইজে বৃহত্তৰ অঞ্চলটোৰ এই সমস্যা সমাধান কৰিবলৈ শক্তি বিভাগক ব্যৱস্থা গ্ৰহণ কৰাৰ বাবে আহ্বান জনোৱাৰ লগতে দৰিদ্ৰ দুৰ্ভগীয়া পৰিয়ালটোক ক্ষতিপূৰণ দিবলৈ চৰকাৰক আহ্বান জনাইছে ৷ এই ঘটনাই সমগ্ৰ লক্ষীপুৰ অঞ্চলত এতিয়া শোকৰ ছাঁ পেলাইছে ৷
লগতে পঢ়ক : গোলাঘাটত বান বিভীষিকা : চৌদিশে বৰ্নাত্যৰ আৰ্তনাদ - Assam Flood 2024
