গুৱাহাটী : গুৱাহাটী মহানগৰীত গৃহনিৰ্মাণ কৰিলে চৌহদত স্থাপন কৰিবই লাগিব বৰষুণৰ পানী ভূগৰ্ভত সংৰক্ষণ কৰা ব্যৱস্থা । অৱশ্যে এই ব্যৱস্থা নতুন নহয় যদিও বাধ্যতামূলকভাৱে কাৰ্যকৰী কৰাৰ বাবে নিৰ্দেশনা জাৰি কৰিছে গুৱাহাটী পৌৰ নিগমে । এই সন্দৰ্ভত গুৱাহাটী পৌৰ নিগমে বৃহস্পতিবাৰে এক নিৰ্দেশনা জাৰি কৰে ।
বৰষুণৰ পানী ভূগৰ্ভত সংৰক্ষণ কৰাৰ এই ব্যৱস্থা প্ৰকৃততে কি ? ইয়াৰ দ্বাৰা কি লাভ হ'ব ? গুৱাহাটী বিল্ডিং উপ-বিধি ২০১৪ অনুসৰি পৌৰ নিগমে জাৰি কৰা জাননীত কি আছে ? এই সৱিশেষ সামৰি ইটিভি ভাৰতৰ এক বিশেষ প্ৰতিবেদন-
এতিয়াৰে পৰা যিকোনো গৃহ নিৰ্মাণৰ ক্ষেত্রতে পৌৰ এলেকাৰ লোকে চৌহদত বৰষুণৰ পানী ভূগৰ্ভৰ গভীৰতালৈ নিয়াৰ ব্যৱস্থা কাৰ্যকৰী কৰিব লাগিব । অৰ্থাৎ গুৱাহাটীত গৃহ নিৰ্মাণ কৰাৰ লগতে অতিৰিক্তভাৱে এই ব্যৱস্থাৰ বাবেও ব্যয় বহন কৰিব লাগিব । ভূমিৰ আকাৰৰ ওপৰত এই ব্যৱস্থাৰ আকাৰ নিৰ্ভৰ কৰিব । এপাৰ্টমেণ্টসমূহত এই ব্যৱস্থা কাৰ্যকৰী হৈ আহিছে যদিও ব্যক্তিগত আৱাসত এই ব্যৱস্থা কাৰ্যকৰী কৰা পৰিলক্ষিত হোৱা নাই ।
আসাম ৰিয়েল ইষ্টেট ইনফ্ৰাষ্টাকচাৰ এণ্ড ডেভল'পাৰ্ছ এছ'চিয়েছন চমুকৈ 'এৰিডা'ৰ সভাপতি তথা বিশিষ্ট অভিযন্তা পি কে শৰ্মাৰে হোৱা আছুতীয়া সাক্ষাতকাৰৰ ভিত্তিত এই প্ৰতিবেদন প্ৰস্তুত কৰা হৈছে ।
কি আছে গুৱাহাটী পৌৰ নিগমৰ নিৰ্দেশনাত ?
মহানগৰীৰ কৃত্ৰিম বান ৰোধৰ বাবে চৰকাৰৰ বিশেষ পদক্ষেপ গ্ৰহণ কৰিছে । গুৱাহাটী পৌৰ নিগমে জাৰি কৰা নিৰ্দেশনা অনুসৰি মহানগৰীৰ প্ৰতিটো এপার্টমেণ্টে বৰষুণৰ পানী সংৰক্ষণ কৰিব লাগিব । বৰষুণৰ পানী সংগ্ৰহ আৰু ভূগৰ্ভস্থ পানী পুনঃভৰ্তিকৰণৰ ব্যৱস্থা থকাটো বাধ্যতামূলক । সকলো ধৰণৰ অট্টালিকা, আৱাসিক অঞ্চল, ব্যৱসায়িক, শিক্ষা, উদ্যোগ আদিৰ ক্ষেত্ৰত এই নিয়ম প্ৰযোজ্য হ’ব । ইয়াৰ লগতে আৱাসিক এলেকাৰ ২০ শতাংশ ভূমিত কৰিব লাগিব বৃক্ষৰোপণ । প্ৰতিগৰাকী বিল্ডিং নিৰ্মাতা, ছ'চাইটি আৰু মাটিৰ মালিকে এই নিয়ম মানি চলাটো এতিয়াৰে পৰা বাধ্যতামূলক হ'ব ।
২০ জুনৰ পৰা গুৱাহাটী পৌৰ নিগমে এই নিয়ম সঠিকভাৱে পালন কৰা হৈছে নে নাই তাৰ নিৰীক্ষণ আৰম্ভ কৰিব । প্ৰথম পৰ্যায়ত বিল্ডিং নিৰ্মাতাসকলৰ ক্ষেত্ৰত এই পৰীক্ষা চলিব আৰু নিয়ম উলংঘা হ’লে ডি ডি এম এ আইনৰ অধীনত কঠোৰ আইনী ব্যৱস্থা গ্ৰহণ কৰা হ’ব । গুৱাহাটী বিল্ডিং উপ-বিধি, ২০১৪ আৰু অসম ইউনিফাইড গৃহনিৰ্মাণ উপ-বিধি, ২০২২ অনুসৰি এই নিৰ্দেশনা জাৰি কৰা হৈছে ।
এই সিদ্ধান্তই গুৱাহাটী মহানগৰত বৰষুণৰ পানী সংৰক্ষণ কৰাৰ লগতে সেউজ এলেকাৰ বিস্তাৰ কৰিব । লগতে কৃত্ৰিম বানপানী ৰোধ আৰু জল সংকটৰ সমাধানৰ ক্ষেত্ৰত এক ঐতিহাসিক আৰু দিক-নিৰ্ণায়ক পদক্ষেপ হিচাপে বিবেচিত হ’ব বুলি ধাৰণা কৰা হৈছে ।
বৰষুণৰ পানী ভূগৰ্ভত সংৰক্ষিত কৰাৰ প্ৰণালী নতুন নহয় :
এজাক বৰষুণ দিলেই জলমগ্ন হৈ পৰে ৰাজধানী চহৰ গুৱাহাটী মহানগৰী । বৰষুণৰ পানী ওলাই নিয়া নাইবা সংৰক্ষণ কৰাৰ উপযুক্ত ব্যৱস্থা নথকাৰ বাবেই এজাক বৰষুণত সহজতে জলমগ্ন হৈ পৰে গুৱাহাটী । গুৱাহাটীত নিৰ্মাণ হোৱা বৃহৎ বৃহৎ অট্টালিকাত বৰষুণৰ পানী ভূগৰ্ভত সংৰক্ষিত কৰাৰ ব্যৱস্থা আছে; কিন্তু এই ব্যৱস্থাই কিমানদূৰ সফলতা লাভ কৰিছে তাৰ কোনো মাপকাঠি নাই ।
গুৱাহাটী পৌৰ নিগমে বৃহস্পতিবাৰে বৰষুণৰ পানী ভূগৰ্ভত সংৰক্ষণ কৰাৰ প্ৰসংগত এক নিৰ্দেশনা জাৰি কৰিছে; কিন্তু গুৱাহাটীত ২০১৪ চনৰ পৰাই এই ব্যৱস্থা অৰ্থাৎ বিল্ডিং উপ-বিধি,২০১৪ প্ৰযোজ্য হৈ আছে ।
এই সন্দৰ্ভত 'এৰিডা'ৰ সভাপতি পি কে শৰ্মাই কয়, "বৰষুণৰ পানী ভূগৰ্ভত সংৰক্ষণ কৰি ভূগৰ্ভৰ পানী বৃদ্ধি কৰাটো গুৰুত্বপূৰ্ণ কথা । এই ব্যৱস্থাটো ২০১৪ চনৰ পৰাই চলি আহিছে । এই ব্যৱস্থাটো যথেষ্ট খৰচী । এতিয়া চৰকাৰে এইটো নিৰীক্ষণ কৰাৰ কথা কৈছে । গুৱাহাটী মহানগৰীত বিল্ডিং উপ-বিধি (Appendix VI) অনুসৰি বিভিন্ন অট্টালিকা নিৰ্মাণত বৰষুণৰ পানী সংৰক্ষণ প্ৰণালী আছে । পানী সংৰক্ষণ কৰাৰ যিটো ব্যৱস্থা চলি আহিছে তাত কিছু সংশোধনীৰ প্ৰয়োজন আছে । এইক্ষেত্রত আমাৰ চৰকাৰৰ লগত আলোচনা হৈছে । চৰকাৰে আমাক গোটেই বিষয়টো চালিজাৰি চাই এখন খচৰা প্ৰস্তুত কৰাৰ দায়িত্ব দিছে ।"
অভিযন্তাগৰাকীয়ে পুনৰ কয়, " ইতিমধ্যে এইক্ষেত্রত আমি কাম আৰম্ভ কৰিছো । বিল্ডিং উপ-বিধিৰ পৰিশিষ্ট ছয়ৰ সংশোধনৰ খচৰা প্ৰস্তুতৰ বাবে আমি চুৰাতৰ অভিজ্ঞ ড৹ ভাস্কৰ ভি ভট্টক যোগাযোগ কৰিছো । ড৹ ভট্ট এই বিষয়ত এগৰাকী বিশেষজ্ঞ ব্যক্তি । ইয়াৰ লগতে আই আই টি গুৱাহাটীৰ লগতো যোগাযোগ কৰা হৈছে । শীঘ্ৰেই এই খচৰা আমি চৰকাৰক দিবলৈ চেষ্টা কৰিম ।"
তেওঁ লগতে কয়, "আমাৰ ইয়াত ইমান বৰষুণ হোৱাৰ পিছতো খোৱাপানীৰ নাটনি আছে । গ্ৰাউন ৱাটাৰ অৰ্থাৎ ভূগৰ্ভৰ পানীৰ স্তৰ শুকাই গৈছে । বৰষুণৰ পানী ভূগৰ্ভৰ পানীৰ স্তৰলৈ নিব পাৰিলে খোৱাপানীৰ নাটনিৰ সমস্যা দূৰ হ'ব আৰু লগতে আবদ্ধ পানীৰ সমস্যাও যথেষ্ট পৰিমানে লাঘৱ হ'ব ।"
ইপিনে, বিল্ডিং উপ-বিধি, ২০১৪ সন্দৰ্ভত পি কে শৰ্মাই কয়, "বৰষুণৰ পানী ভূগৰ্ভত সংৰক্ষণ কৰাৰ প্ৰণালী আগৰে পৰা চলি আহিছে । পৌৰ নিগমে জাৰি কৰা নিৰ্দেশনা অনুসৰি আইন মতে সেয়া কাৰ্যকৰী কৰা হৈছে নে নাই সেয়া নিৰীক্ষণ কৰাৰ কথা কোৱা হৈছে । এই ব্যৱস্থাটো নতুন নহয় । আমাৰ ধাৰণা হয় যে গোটেই প্ৰক্ৰিয়াটোতে কিছু বিসংগতি আছে । সেয়ে ইয়াৰ সংশোধনীৰ বাবে খচৰা প্ৰস্তুতৰ কাম চলি আছে । পানী সংৰক্ষণৰ ব্যৱস্থা কেৱল এপাৰ্টমেণ্টেই নহয় ব্যক্তিগতভাৱে নিৰ্মাণ কৰা গৃহৰ ক্ষেত্রতো প্ৰযোজ্য । এপাৰ্টমেণ্টসমূহত বহু খৰচ কৰি এই ব্যৱস্থা কৰা হৈছে; কিন্তু এই ব্যৱস্থা প্ৰকৃতাৰ্থত সফল হৈছে নে নাই সেয়া চোৱাৰ বাবেও খচৰাখনত ব্যৱস্থা কৰা হ'ব। আইন অনুসৰি সকলো নিৰ্মাণতে এই ব্যৱস্থা কৰাৰ নিয়ম আছে । গৃহনিৰ্মাণৰ অনুমতি লোৱাৰ ক্ষেত্রত এই আইনী দিশ আছে ।"
বৰষুণৰ পানী ভূগৰ্ভত সংৰক্ষণ কৰাৰ প্ৰণালী সন্দৰ্ভত পি কে শৰ্মাই কয়, "বৰষুণৰ পানীখিনি গোটাই পাইপেৰে ভূগৰ্ভৰ বালিৰ স্তৰলৈ নিব লাগিব । বৰিঙত পানী তলৰ পৰা ওপৰলৈ উঠোৱাৰ দৰে ইয়াত ওপৰৰ পানী তললৈ নিব লাগিব । ইয়াৰ বাবে বৰষুণৰ পানী জমা কৰি নিষ্কাষিত কৰি তললৈ নিব লাগিব । সেইদৰে ভূমিৰ পৰিমাণৰ ২০ শতাংশত গছ-গছনি লগোৱাৰ নিয়ম আছে ।"
