এক ব্য়তিক্ৰমী দৃশ্য়; বানৰ মাজতো শিবিৰতেই ওমলিছে এজাক শিশুৱে
এখন জিলাতেই দহ সহস্রাধিক শিশু বছৰৰ প্ৰথমটো বানত আক্ৰান্ত ।
Published : June 7, 2025 at 8:16 PM IST
নগাঁও : বান শিবিৰতেই ওমলিছে এজাক শিশুৱে । সাধাৰণতে বান শিবিৰত যথেষ্ট কষ্টৰ মাজেৰে সময় কটাবলগীয়া হয় শিশুৰ পৰা বৃদ্ধলৈকে সকলোৱে; কিন্তু এইবাৰ বান শিবিৰত যেন কিছু ব্যতিক্ৰমী ছবি ফুটি উঠিছে । বান শিবিৰতেই নিজৰ ঘৰখনৰ দৰেই ওমলিবলৈ সুবিধা পাইছে শিশুসকলে ।
বছৰৰ প্ৰথমটো বানে প্লাবিত কৰা নগাঁও জিলাৰ শতাধিক ৰাজহ গাঁৱৰ বান পৰিস্থিতি কিছু উন্নত হৈছে যদিও আজিও আশ্ৰয় শিবিৰতেই থাকিব ল'বলগীয়া হৈছে বানাক্ৰান্তই । ইয়াৰ মাজতেই নগাঁৱৰ আশ্ৰয় শিবিৰসমূহত দেখা গৈছে কিছু ব্যতিক্ৰমী দৃশ্য ।
বান শিবিৰত থকা শিশুসকলৰ বাবে ওমলিবলৈ এক বিশেষ ব্যৱস্থা কৰিছে নগাঁও জিলা প্ৰশাসনে । জিলাখনৰ ৰহাৰ ৩ টাকৈ বান শিবিৰৰ উপৰি চৰকাৰীভাৱে স্থাপন কৰা প্ৰতিটো বান শিবিৰতেই শিশু ওমলা কেন্দ্ৰ স্থাপন কৰা হৈছে, য’ত বান বিভীষিকাৰ মাজতো নিজকে আনন্দ-উল্লাহত ব্যস্ত ৰাখিবলৈ সুযোগ লাভ কৰিছে ।
তথ্য অনুসৰি, জিলাখনৰ দহ সহস্রাধিক শিশু বছৰৰ প্ৰথমটো বানত আক্ৰান্ত হৈছে । চৰকাৰীভাৱে স্থাপন কৰা আশ্ৰয় শিবিৰত আশ্ৰয় গ্ৰহণ কৰা শিশুসকলৰ বাবে স্থাপন কৰা হৈছে শিশু উমলা কেন্দ্ৰ । য’ত শিশুসকলৰ শাৰীৰিক ব্যায়ামৰ পৰা আদি কৰি নৃত্য-গীত আদি সকলো ব্যৱস্থাই কৰা হৈছে ।
জিলাখনৰ ৰহা, কমপুৰ, চামগুৰি আৰু কলিয়াবৰ ৰাজহ চক্ৰৰ অধীনৰ এশৰো অধিক গাঁও বান কবলত পৰে । শেহতীয়াকৈ ব্ৰক্ষ্মপুত্ৰকে ধৰি কপিলী আদি নৈৰ জলস্তৰো বিগত দুদিনত যথেষ্ট হ্ৰাস পাইছে । চৰকাৰী তথ্য অনুসৰি বিশেষকৈ বিপদ সীমা অতিক্ৰম কৰা কপিলী নৈৰ জলস্তৰ যথেষ্ট হ্ৰাস পাইছে যদিও অঞ্চলসমূহৰ বহু ঘৰ-বাৰী এতিয়াও আছে বানৰ কবলত ।
শনিবাৰৰ তথ্য অনুসৰি, কপিলী নৈৰ জলপৃষ্ঠ বিদপসীমাতকৈ সামান্য পৰিমাণে নিম্নগামী হৈছে । অৱশ্যে এতিয়াও বিভিন্ন প্ৰান্তত স্থাপন কৰা অস্থায়ী আশ্ৰয় শিবিৰৰ উপৰি চৰকাৰীভাৱে স্থাপন কৰা আশ্ৰয় শিবিৰতেই আশ্ৰয় গ্ৰহণ কৰি আছে বানাক্ৰান্ত বহু পৰিয়ালে ।
এই বানপীড়িত অঞ্চলসমূহ পৰিদৰ্শন কৰি বানাক্ৰান্তৰ বুজ লোৱাৰ লগতে পৰ্যাপ্ত খাদ্য যোগানৰ ব্যৱস্থা কৰিছে জিলা আয়ুক্ত নৰেন্দ্ৰ কুমাৰ শ্বাহে । পৰ্যপ্ত খাদ্য সামগ্ৰীৰ লগতে ঔষধ আদি যোগানৰো ব্যৱস্থা কৰা হৈছে ।
চৰকাৰী তথ্য অনুসৰি, বৰ্তমানলৈকে জিলাখনৰ ৰহাত ৩টা আৰু নগাঁও সদৰত এটা বান সাহাৰ্য শিবিৰ স্থাপন কৰা হৈছে । ইপিনে, কামপুৰত ৮৭টা, চামগুৰি ৫, কলিয়াবৰ ৪টা, ৰহাত ২টাকে ধৰি জিলাখনত মুঠ ৯৮ টা বান সাহাৰ্য বিতৰণ কেন্দ্ৰ স্থাপন কৰা হৈছে ।
এই বিতৰণ কেন্দ্ৰ সমূহৰ জৰিয়তে বৰ্তমানলৈকে চাউল ১১২৯.৩৪ কুইণ্টল, ডালি- ২১৮.৮২ কুইণ্টল, নিমখ ৬৫.৬১ কুইণ্টল, মিঠাতেল ৫.২২লিটাৰ, পশুখাদ্য ১৮২৯.২৩ কুইণ্টল, শিশুৰ পনীয়া খাদ্য় ৰহাত ৩৪.৫০ লিটাৰ আৰু নগাঁৱত ৭.২০ লিটাৰ বিতৰণ কৰা হৈছে ।
জিলা স্বাস্থ্য বিভাগে বানাক্ৰান্ত ৰাইজৰ মাজত চিকিৎসা শিবিৰৰ লগতে পশু পালন আৰু পশু চিকিৎসা বিভাগে পশু চিকিৎসা শিবিৰ অনুষ্ঠিত কৰি আছে । জিলা মহিলা আৰু শিশু বিভাগে বান সাহাৰ্য শিবিৰসমূহত শিশু ওমলা কক্ষ, মাতৃ দুগ্ধপান কক্ষ স্থাপন কৰাৰ লগতে শিশুসকলক গৰম ৰন্ধা খাদ্য প্ৰদানৰ ব্যৱস্থা কৰিছে ।
জনস্বাস্থ্য কাৰিকৰী বিভাগে বানাক্ৰান্ত অঞ্চলসমূহৰ লগতে বান সাহাৰ্য শিবিৰ সমূহত বিশুদ্ধ খোৱাপানী, ব্লিচিং পাউদাৰ আৰু হেলজেন টেবলেটো বিতৰণ কৰি আহিছে ।
উল্লেখ্য় যে, বানাক্ৰান্তসকলৰ বাবে গ্ৰহণ কৰা সকলো ব্যৱস্থাৰ তদাৰক কৰি আছে খোদ জিলা আয়ুক্ত নৰেন্দ্ৰ কুমাৰ শ্বাহে । সাম্প্ৰতিক বানত কামপুৰ ৰাজহ চক্ৰৰ অন্তৰ্গত এটি শিশুৰ মৃত্যু হোৱা বুলিও চৰকাৰী তথ্যত প্ৰকাশ । জিলা তথ্য আৰু জনসংযোগ বিষয়া মন্দিৰা চায়েঙিয়া দলেই কয়, "প্ৰশাসনৰ তৰফৰ পৰা মৃত শিশুটিৰ আত্মীয়ক এককালীন সাহাৰ্য প্ৰদান কৰাৰ ব্যৱস্থা কৰা হৈছে ।"
