ৰাজ্যৰ আৰু ক'ত ক'ত হ'ব উচ্ছেদ, কি ক'লে মুখ্যমন্ত্ৰীয়ে ?

গুৱাহাটী: ৰাজ্যৰ বিভিন্ন প্ৰান্তত অব্যাহত আছে উচ্ছেদ অভিযান । এইবাৰ গোৱালপাৰাৰ পাইকান বনাঞ্চলতো চলিব উচ্ছেদ অভিযান । এই কথা প্ৰকাশ কৰিলে মুখ্যমন্ত্রী ড৹ হিমন্ত বিশ্ব শৰ্মাই ।

দেওবাৰে গুৱাহাটীত সাংবাদিকৰ প্ৰশ্নৰ উত্তৰত মুখ্যমন্ত্রীয়ে কয়, "উচ্চ ন্যায়ালয়ৰ নিৰ্দেশমৰ্মে অহা ১০ জুলাইত পাইকান বনাঞ্চলত উচ্ছেদ অভিযান চলিব । আনহাতে পাৱাৰ প্লাণ্টৰ বাবে ৮ জুলাইৰ পৰা চাপৰত উচ্ছেদ অভিযান আৰম্ভ হ'ব । কিন্তু চাপৰত উচ্ছেদ কৰাৰ আগতেই ৰাইজ প্ৰায় আঁতৰি গৈছে । যিসকল লোকৰ ম্যাদী পট্টাৰ মাটি আছিল তথা চৰকাৰে আৱণ্টন দিছিল তেওঁলোকক চৰকাৰী আইন অনুসৰি ক্ষতিপূৰণ দিয়াৰ ব্যৱস্থা কৰা হৈছে । যিহেতু পাইকানখন বনাঞ্চল সেয়ে ১০ জুলাইত উচ্ছেদ অভিযান চলিব । তাত এতিয়ালৈকে বহুত মানুহ আঁতৰি যোৱা নাই । গতিকে ১০ জুলাইত উচ্ছেদ কৰিবলগীয়া হ'ব পাৰে । কিন্তু আমি বিচাৰো যে উচ্ছেদ কৰাৰ আগতে ৰাইজ যাতে নিজে নিজে আঁতৰি যায় ।"

ইফালে গুৱাহাটীৰ মাছখোৱাত হোৱা নাগৰিক অভিৱৰ্তনত বিৰোধী সমবেত হোৱাৰ প্ৰসংগত মুখ্যমন্ত্রীয়ে ওলোটাই সাংবাদিকক লক্ষ্য কৰি লয় । মুখ্যমন্ত্রীয়ে কয়, "আপোনালোকৰ মানসিকতাটো এনেকুৱা যে সৰ্বানন্দ সোণোৱাল, হিমন্ত বিশ্ব শৰ্মা, প্ৰমোদ বড়ো, অতুল বৰা একত্রিত হ'লে তেতিয়া আপোনালোকে এই প্ৰশ্নটো নকৰে । গতিকে সাংবাদিকসকলে কেনেকুৱা প্ৰশ্ন কৰিলে নিৰপেক্ষ যেন অনুভৱ হয় তাৰ দায়িত্ব আপোনালোকেও ল'ব লাগে । যিদিনাখন অতুল বৰা, কেশৱ মহন্ত, মই, সৰ্বানন্দ সোণোৱাল, প্ৰমোদ বড়ো, ইউ জি ব্ৰহ্ম একত্রিত হওঁ তেতিয়াতো আপোনালোকে এই প্ৰশ্নটো নকৰে । গতিকে আপোনালোকৰ পক্ষপাত দেখিলে আপোনালোকৰ প্ৰতি মাজে মাজে মোৰ সান্ত্বনাও ওপজে, অলপ অলপ খঙো উঠে, অলপ অলপ দুখো লাগে যে আপোনালোক কিয় ইমান পক্ষপাত হৈছে । এই যিকেইজন মানুহ লগ লাগিছে তেওঁলোক কিমানবাৰ হাৰিব লাগিব । মই বাৰে বাৰে দেখুৱাই দিলো যে এইবিলাক কোনো হিৰ' নহয় । প্ৰথমতে বিধানসভাত হৰুৱালো । তাৰ পিছত লোকসভা আৰু পঞ্চায়তত হৰুৱালো । এতিয়াও আপোনালোকৰ মায়া-মোহ শেষ হোৱা নাই । গতিকে ২০২৬ত ভালদৰে হাৰিলে মই আশা কৰো যে আপোনালোকৰ মায়া-মোহ স্থায়ীভাৱে নোহোৱা হ'ব ।"

মুখ্যমন্ত্রীয়ে লগতে কয়, "২০২১ ত হাগ্ৰামা মহিলাৰী, বদৰুদ্দিন আজমল, ৰিপুণ বৰা এই সকলোবোৰ একেলগ হোৱাৰ পাছত আপোনালোকে তাল-ফাল লগাইছিল । ২০২১ৰ আপোনালোকৰ নিউজবোৰ মাজে মাজে মই ইউটিউবত চাই থাকো । সেই সময়ত বিজেপিক নাইকীয়া কৰি দিছিল । ২০২১ৰ নিউজবোৰ আপোনালোকে অলপ চাব । মই ভাবো যে আপোনালোকে আশা কৰি থকাটো বাস্তৱ নহয় । বি টি চি নিৰ্বাচনতে তাৰ ফলাফল পাব ।"

লগতে পঢ়ক :নামঘৰতো গৰু মাংস পৰিব নালাগে, মছজিদতো গাহৰি মাংস পৰিব নালাগে: মুখ্যমন্ত্ৰী - PORK MEAT FOUND IN MOSQUE