এয়া অসমৰ হাতী নহয় : FAKE NEWS বুলি কৈ স্পষ্টীকৰণ মুখ্যমন্ত্ৰীৰ কাৰ্যালয়ৰ

গুৱাহাটী : ‘‘শেহতীয়াকৈ অসমৰ পৰা কোনো হাতী সৰবৰাহ কৰা নাই ৷’’ আম্বানীৰ গুজৰাটৰ জামনগৰৰ বনতাৰা চিৰিয়াখানালৈ অসমৰ মাজেৰে ২৩ খনকৈ এনিমেল এম্বুলেন্সত হাতী কঢ়িয়াই নিয়া বুলি ৰাজ্য তোলপাৰ লগোৱা বাতৰি প্ৰসংগত স্পষ্টীকৰণ দিছে ৰাজ্য চৰকাৰে । সামাজিক মাধ্যম X-যোগে অসমৰ মুখ্যমন্ত্ৰীৰ কাৰ্যালয়ে দিছে এই স্পষ্টীকৰণ ৷

স্পষ্টীকৰণটোত কোৱা হৈছে, “এইটো স্পষ্ট কৰি দিয়া হৈছে যে অসমৰ পৰা শেহতীয়াকৈ কোনোধৰণৰ হাতী সৰবৰাহ কৰা হোৱা নাই ৷ অসমক এনে কাৰ্যত জড়িত কৰি যিবোৰ বাতৰি আৰু সামাজিক মাধ্যমত পোষ্ট প্ৰকাশ কৰা হৈছে, সেইবোৰ সম্পূৰ্ণভাৱে অনাকাংক্ষিত আৰু ভুৱা ৷”

মুখ্যমন্ত্ৰীৰ কাৰ্যালয়ে এই স্পষ্টীকৰণৰ লগত সংলগ্ন কৰি দিছে কেইবাটাও সংবাদ প্ৰতিষ্ঠানৰ বাতৰিৰ লগতে সামাজিক মাধ্যমত প্ৰকাশিত হোৱা ফটোৰ স্ক্ৰীনশ্ব'ট । আনকি ৰঙা আখৰেৰে এই খবৰবোৰ ‘‘FAKE NEWS’’ বুলিও লেখি দিয়া হৈছে ৷

উল্লেখ্য যে অসমৰ মাজেৰে গুজৰাটত পঞ্জীয়নভুক্ত ২৩ খন এনিমেল এম্বুলেন্সত দেওবাৰে বিশালসংখ্যক হাতী লৈ যোৱাৰ দৃশ্যই তোলপাৰ লগাইছিল অসম ৷ সোমবাৰেও অসমত অব্যাহত আছে ইয়াৰ প্ৰতিক্ৰিয়া । অসমৰ হাতী দেশৰ সবাতোকৈ বিত্তশালী আম্বানী পৰিয়ালৰ গুজৰাটৰ জামনগৰৰ চিৰিয়াখানালৈ সৰবৰাহ কৰাৰ অভিযোগেৰে অসম চৰকাৰক কৰা সমালোচনাৰে সামাজিক মাধ্যম উপচি পৰিছে ৷

এফালে হিমন্ত বিশ্ব শৰ্মা নেতৃত্বাধীন চৰকাৰক কঠোৰ সমালোচনা ৷ আনফালে দক্ষিণ কোৰিয়াত বিনিয়োগকাৰীৰ সন্ধানত ব্যস্ত মুখ্যমন্ত্ৰীগৰাকী ৷ যাৰ বাবে এই বাতৰি আৰু সামাজিক মাধ্যমৰ পোষ্টক লৈ স্পষ্টীকৰণ দিবলৈ বাধ্য হ’ল মুখ্যমন্ত্ৰীৰ কাৰ্যালয় ।

দেওবাৰে অসম আৰক্ষীৰ এটা দলে কনভয়ৰে হাতী কঢ়িওৱা গাড়ীক জিলাই জিলাই সুৰক্ষা দি উক্ত স্থান পাৰ কৰোৱাত ব্যস্ত হৈ আছিল । আনহাতে, অসম-অৰুণাচল সীমান্তৰ তিনিচুকীয়া জিলাৰ ডিৰাক গেটৰ পৰা এই হাতীসমূহ কনভয়ৰ মাজেৰে গুৱাহাটী হৈ লৈ যোৱাৰ অভিযোগ বিভিন্ন দল-সংগঠনৰ ।

এনিমেল এম্বুলেন্সত হাতী সৰবৰাহ (ETV Bharat Assam)

গুৱাহাটীৰ মাজেৰে দেওবাৰে ২৩ খনকৈ এনিমেল এম্বুলেন্সত হাতী লৈ যোৱা দৃশ্যই সকলোকে আচৰিত কৰি তুলিছিল । হাতী কঢ়িয়াই নিয়া বাহনৰ পৰা হাতীয়ে শুৰ উলিয়াই যোৱা ভিডিঅ’ আৰু ফটো দেখি আবেগিক হৈ পৰিছিল অসমবাসী ৷

আনকি কোন ঠাইৰ পৰা ক'লৈ কি কাৰণত এনেদৰে হাতী গুৱাহাটীৰ মাজেৰে এনিমেল এম্বুলেন্সত নিয়া হ'ল তাৰ কোনো নিশ্চিত তথ্য প্ৰকাশ হোৱা নাছিল । ৰহস্যৰ আৱৰ্তত সোমাই পৰিছিল হাতী সৰবৰাহ প্ৰক্ৰিয়াটো ৷ যাক লৈ অসমৰ সংবাদ মাধ্যম আৰু সামাজিক মাধ্যমত দেওবাৰৰ পৰা হৈ-চৈ লাগে । আনকি গুজৰাটৰ পঞ্জীয়নভুক্ত গাড়ীৰ নম্বৰৰ পৰাহে হাতীসমূহ জামনগৰৰ আম্বানীৰ চিৰিয়াখানালৈ লৈ যোৱা বুলি ধাৰণা কৰা হৈছিল ৷ এই সমস্ত ঘটনাই ৰাজ্যজুৰি ব্যাপক প্ৰতিক্ৰিয়াৰ সৃষ্টি কৰিছে ।

ড৹ হীৰেন গোঁহাইৰ পৰা আৰম্ভ কৰি অখিল গগৈ, একাংশ ৰাজনৈতিক নেতা, দল-সংগঠনৰ উত্থাপিত অভিযোগ অনুসৰি আম্বানীৰ চিৰিয়াখানালৈ অসমৰ মাজেৰে সৰবৰাহ কৰা হৈছে হাতীসমূহ । কিন্তু কোনোবাই যদি অসমৰ বুলি কৈছিল আন কোনোবাই কৈছিল এই হাতীসমূহ অনা হৈছে অৰুণাচলৰ পৰা ৷

অসমৰ মুখ্যমন্ত্ৰীৰ কাৰ্যালয়ে দিয়া স্পষ্টীকৰণৰ পিছত এই হাতীসমূহ অৰুণাচলৰ বুলিয়েই অধিক পতিয়নযোগ্য হৈছে ।