যোগ সাধনাৰে নৱ প্ৰজন্মক স্বাস্থ্য় সচেতন কৰি তোলাৰ প্ৰয়াস
ঋষি পতঞ্জলিয়ে যোগ সাধনাক নতুন ৰূপ দিয়াৰ পিচত সেই ধাৰা আজিও অব্য়াহত আছে । সেয়েহে ৰাজ্য়ত গঢ়ি উঠিছে বহুতো প্ৰশিক্ষণ কেন্দ্ৰ ।
Published : June 17, 2025 at 10:43 AM IST
বৰপেটা : ভাৰতৰ যোগ সাধনা বিশ্বৰ ভিতৰতে এক প্ৰাচীনতম কলা । প্ৰাচীন মহাকাব্য তথা ইতিহাসত ভাৰত ঋষি-মুনিসকলে যোগ সাধনা কৰাৰ উল্লেখ আছে । ঋষি পতঞ্জলিয়ে যোগ সাধনাক দিছিল নতুন ৰূপ । যোগৰ সাধনাৰে শাৰীৰিক-মানসিকভাৱে শক্তিশালী সমাজ এখন গঢ়াৰ লক্ষ্যৰে তেওঁ যোগক জনপ্ৰিয় কৰাত গুৰুত্ব দিছিল । তাৰ প্ৰভাব আজিও আছে । বৰঞ্চ অধিক শক্তিশালী ৰূপতহে আছে ।
নৱ প্ৰজন্মৰ মাজত যোগ সাধনাক জনপ্ৰিয় কৰি এখন সুস্থ আৰু নিৰোগী সমাজ গঠনৰ নিৰলস প্ৰচেষ্টাত ব্ৰতী হৈ আহিছে বৰপেটাৰ অষ্টাংগ যোগ কেন্দ্ৰ । এই কেন্দ্ৰটোৱে বিগত কেইবাবছৰৰ পৰা সম্পূৰ্ণ স্বেচ্চামূলকভাৱে শিশু আৰু কিশোৰ-কিশোৰীক যোগ প্ৰশিক্ষণ দি আহিছে । প্ৰথমতে মাত্ৰ তিনিটি শিশুক লৈ এই প্ৰশিক্ষণ আৰম্ভ কৰা হৈছিল । লাহে লাহে বৰপেটা আৰু ইয়াৰ কাষৰীয়া অঞ্চলৰ বহু অভিভাৱকৰ মাজত কেন্দ্ৰটোৱে যোগৰ প্ৰতি সজাগতা সৃষ্টি কৰিবলৈ সক্ষম হয় ।
যোগ সাধনা কৰা শিশু আৰু কিশোৰ-কিশোৰীৰ শাৰীৰিক-মানসিক যোগাত্মক বহু পৰিৱৰ্তন হোৱা বুলি অভিভাৱকসকলে উপলব্ধি কৰে । তাৰ ফলত প্ৰশিক্ষাৰ্থীৰ সংখ্যাও দ্ৰুতগতিত বৃদ্ধি হয় । সম্প্ৰতি ৭৩ টি শিশু আৰু কিশোৰ-কিশোৰীক কেন্দ্ৰটোৱে যোগৰ প্ৰশিক্ষণ দি আছে । নিতৌ পুৱা ৫-৩০ বজাৰ পৰা প্ৰশিক্ষণ তথা যোগাভ্যাসৰ কাৰ্যসূচী আৰম্ভ হয় । প্ৰতিকূল বতৰটো তেওঁলোকৰ এই প্ৰশিক্ষণ বন্ধ নহয় ।
তেওঁলোকৰ স্বেচ্ছামূলক এই প্ৰচেষ্টাত সহযোগ কৰি বৰপেটাৰ ক্লাৱ ৰাইনো নামৰ অনুষ্ঠানটোৱে বিগত তিনি বছৰৰ পৰা প্ৰশিক্ষণ প্ৰদানৰ বাবে নিজৰ এটা সভাগৃহ বিনামূলীয়াকৈ ব্যৱহাৰৰ অনুমতি প্ৰদান কৰিছে । সেই স্থানতে এতিয়া পুৱা এজাক শিশু,কিশোৰ-কিশোৰীক লৈ যোগৰ মাধ্যমেৰে এখন নিৰোগী আৰু সুস্থ সমাজ গঠনৰ কামত ব্ৰতী হৈছে কেন্দ্ৰটোৰ সভাপতি তথা প্ৰশিক্ষক কামদেৱ দাস আৰু মুখ্য প্ৰশিক্ষক জীৱেশ্বৰ বৈশ্য । জীৱেশ্বৰ বৈশ্যৰ পত্নী দীপামণি তালুকদাৰেও প্ৰশিক্ষণ প্ৰদান কৰে ।
মুখ্য প্ৰশিক্ষকৰ দায়িত্বত থকা জীৱেশ্বৰ বৈশ্যই এবছৰীয়া এক বিশেষ প্ৰশিক্ষণো গ্ৰহণ কৰিছে । অষ্টাংগ যোগ কেন্দ্ৰৰ সভাপতি তথা প্ৰশিক্ষক কামদেৱ দাসে কয়, "যোগৰ জৰিয়তে এখন সমাজক চাৰিওদিশেৰে সুস্থ কৰি তুলিব পাৰি । তেনেক্ষেত্ৰত যদিহে কণ কণ শিশুসকলৰ মাজত যোগক জনপ্ৰিয় কৰিব পৰা যায়, তেন্তে তাৰ প্ৰভাৱ সমাজৰ ভৱিষ্যতৰ ওপৰত সৰ্বাধিক পৰে । সেই লক্ষ্য আৰু উদ্দেশ্যৰে তেওঁলোকে প্ৰধানকৈ শিশু আৰু কিশোৰ-কিশোৰীৰ মাজত যোগক জনপ্ৰিয় কৰি তোলাৰ বাবে কাম কৰি আহিছে । ইয়াৰ বাবে তেওঁলোকে কোনো মূল্যও নিবিচাৰে । সেইকাৰণে সম্পূৰ্ণ স্বেচ্চামূলকভাৱে বিগত কেইবাবছৰৰ পৰা জড়িত হৈ আহিছে । ভাৰতবৰ্ষই বিশ্বত আন্তঃৰাষ্ট্ৰীয় যোগ দিৱসক প্ৰতিষ্ঠা কৰিবলৈ সক্ষম হোৱাটোৱে আমাৰ দেশৰ সফলতাকে প্ৰতিপন্ন কৰিছে ।"
