PRC ক লৈ পয়মাল ! চৰকাৰৰ অনুমতিবিহীন নিৰ্দেশনা দি পুনৰ প্ৰত্যাহাৰ কৰিবলৈ বাধ্য হ’ল উচ্চ শিক্ষা সঞ্চালকালয় - Ranoj Pegu on DHE order
Directorate of higher education: অৱশেষত প্ৰত্যাহাৰ হ’ল উচ্চ শিক্ষা সঞ্চালকালয়ে জাৰি কৰা বিতৰ্কিত নিৰ্দেশনা ৷ শিক্ষামন্ত্ৰী ডাঃ ৰণোজ পেগু আৰু মুখ্যমন্ত্রী হিমন্ত বিশ্ব শৰ্মাই নিৰ্দেশনা প্ৰত্যাহাৰৰ কৰিবলৈ নিৰ্দেশ দিয়াৰ পাচতে এই সিদ্ধান্ত গ্ৰহণ কৰে উচ্চ শিক্ষা সঞ্চালকালয়ে ৷ এনে ধৰণৰ বিজ্ঞপ্তি তথা নিৰ্দেশনা কেৱল চৰকাৰেহে জাৰি কৰিব পাৰে বুলি সঞ্চালকালয়ৰ ভূমিকাক সমালোচনা মুখ্যমন্ত্রী হিমন্ত বিশ্ব শৰ্মাৰ ।
Published : July 10, 2024 at 12:15 PM IST
|Updated : July 10, 2024 at 2:50 PM IST
গুৱাহাটী, 10 জুলাই: ৰাজ্যৰ উচ্চ শিক্ষা সঞ্চালকালয়ৰ শিক্ষা বিভাগৰ চাকৰিত স্থায়ী বাসিন্দাৰ প্ৰমাণপত্ৰ নালাগে বুলি দিয়া বিতৰ্কিত নিৰ্দেশনাক লৈ ক্ষুব্ধ হৈ পৰিছে মুখ্যমন্ত্ৰী হিমন্ত বিশ্ব শৰ্মা আৰু শিক্ষামন্ত্ৰী ৰণোজ পেগু । অৱশেষত বাতিল কৰা হ'ল অসম বিৰোধী সিদ্ধান্ত । উচ্চ শিক্ষা সঞ্চালকালয়ে জাৰি কৰা নিৰ্দেশনা প্ৰত্যাহাৰ কৰাৰ নিৰ্দেশ দিলে শিক্ষামন্ত্রী ডাঃ ৰণোজ পেগুৱে ।
অসমৰ উচ্চ শিক্ষা সঞ্চালকালয়ৰ অধীনৰ চাকৰিৰ বাবে পি আৰ চি অৰ্থাৎ স্থায়ী বাসিন্দাৰ প্ৰমাণ পত্র বাধ্যতামূলক নহয় বুলি উচ্চ শিক্ষা সঞ্চালকালয়ৰ উপ-সঞ্চালক সুমিত্ৰা দেৱে জাৰি কৰা নিৰ্দেশনা অৱশেষত প্ৰত্যাহাৰ কৰাৰ নিৰ্দেশ দিলে শিক্ষামন্ত্রীয়ে । এই নিৰ্দেশৰ পাচতেই উচ্চ শিক্ষা সঞ্চালকালয়ে উক্ত বিতৰ্কিত জাননীখন প্ৰত্যাহাৰৰ সিদ্ধান্ত গ্ৰহণ কৰে ৷
Enquire further on what authority the Director of Higher Education issued this circular. Such a circular could only have been issued by the Government, not by a directorate. https://t.co/Ec2hLxmkC8
— Himanta Biswa Sarma (@himantabiswa) July 10, 2024
উল্লেখ্য যে উচ্চ শিক্ষা সঞ্চালকালয়ে জাৰি কৰা নিৰ্দেশনাৰ পাচতে ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছিল । বিভিন্ন দল-সংগঠনে ইয়াৰ বিৰোধিতা কৰিছিল । অৱশেষত আজি শিক্ষামন্ত্রীয়ে এই সন্দৰ্ভত সামাজিক মাধ্য্যোগে নিজৰ প্ৰতিক্ৰিয়া ব্যক্ত কৰি উক্ত নিৰ্দেশনা প্ৰত্যাহাৰৰ নিৰ্দেশ দিয়ে । চৰকাৰৰ অনুমতি অবিহনেই উক্ত জাননী জাৰি কৰা হৈছিল বুলি শিক্ষামন্ত্ৰী ডাঃ ৰণোজ পেগুৱে নিজৰ প্ৰতিক্ৰিয়াত সদৰী কৰে ।
সামাজিক মাধ্যম X যোগে শিক্ষামন্ত্ৰীগৰাকীয়ে জনাইছে— “চৰকাৰৰ অনুমোদন অবিহনে উচ্চ শিক্ষা সঞ্চালকে জাৰি কৰিছে স্থায়ী আৱাসিক প্ৰমাণপত্ৰ (পি আৰ চি) সম্পৰ্কীয় জাননী । ডি এইচ ইক শীঘ্ৰে জাননী প্ৰত্যাহাৰ কৰিবলৈ নিৰ্দেশ দিয়া হৈছে ।”
মন কৰিবলগীয়া যে ৰাজ্যৰ উচ্চ শিক্ষা সঞ্চালকালয়ৰ সঞ্চালক সুমিত্ৰা দেৱে যোৱা ৪ জুলাইৰ দিনা এক পত্ৰযোগে পি আৰ চি অৰ্থাৎ স্থায়ী বাসিন্দাৰ প্ৰমাণ পত্র নোহোৱাকৈ অসমৰ উচ্চ শিক্ষাৰ চাকৰিত আবেদন কৰিব পৰা যাব বুলি নিৰ্দেশনা দিছিল । উচ্ছ শিক্ষা বিভাগৰ এই সিদ্ধান্তই স্বাভাৱিকতে সকলোকে ক্ষোভিত কৰি তোলে ৷
অসম চৰকাৰৰ এই সিদ্ধান্তই শিক্ষা বিভাগত অসমৰ বাহিৰৰ প্ৰাৰ্থীৰ চাকৰিত নিযুক্তিৰ বাবে ৰঙা দলিচা পাৰি দিয়াৰ বুলি কঠোৰ সমালোচনাৰ সন্মুখীন হয় ৰাজ্য চৰকাৰ । অসমৰ উচ্চ শিক্ষা সঞ্চালকালয়ৰ উপ-সঞ্চালক সুমিত্ৰা দেৱে জাৰি কৰা এই নিৰ্দেশনা অনুসৰি মহাবিদ্যালয়সমূহৰ সহকাৰী অধ্যাপক, লাইব্ৰেৰিয়ান, তৃতীয় আৰু চতুৰ্থবৰ্গৰ পদৰ নিযুক্তিৰ সময়ত পি আৰ চি তথা স্থায়ী বাসিন্দাৰ প্ৰমাণ পত্রৰ কোন প্ৰয়োজন নহ’লহেঁতেন । অৱশেষত শিক্ষামন্ত্রীয়ে উক্ত নিৰ্দেশনা প্ৰত্যাহাৰ কৰাৰ বাবে নিৰ্দেশ দিয়ে ।
মুখ্যমন্ত্রীৰ প্ৰতিক্ৰিয়া
ইফালে, এই সন্দৰ্ভত সামাজিক মাধ্যমযোগে প্ৰতিক্ৰিয়া প্ৰকাশ কৰিছে মুখ্যমন্ত্রী হিমন্ত বিশ্ব শৰ্মাই । শিক্ষামন্ত্ৰী ৰনোজ পেগুৱে এই কথা ঘোষণা কৰাৰ কিছু সময়ৰ পিচতেই মুখ্যমন্ত্ৰী হিমন্ত বিশ্ব শৰ্মাই জনাই যে পিআৰচিৰ এনে সিদ্ধান্ত কেৱল চৰকাৰেহে ল’ব পাৰে । কোনো কাৰণতে সঞ্চালকালয়ে এনে নিৰ্দেশনা দিব নোৱাৰে । মুখ্যমন্ত্রীয়ে উচ্চ শিক্ষা সঞ্চালকালয়ে কিহৰ ভিত্তিত আৰু কৰ্তৃত্বত উক্ত নিৰ্দেশনা জাৰি কৰিছে সেই বিষয়ে অধিক অনুসন্ধান কৰাৰ বাবে শিক্ষামন্ত্রীৰ প্ৰতি আহ্বান জনায় ।
নিজৰ X একাউণ্টত মুখ্যমন্ত্ৰীগৰাকীয়ে শিক্ষামন্ত্ৰী ৰণোজ পেগুক উল্লেখ কৰি লিখিছে- “উচ্চ শিক্ষা কৰ্তৃপক্ষই কি কৰ্তৃত্বৰ ভিত্তিত এই নিৰ্দেশনা জাৰি কৰিলে সেই বিষয়ে অধিক তদন্ত কৰক । এনে এখন জাননী চৰকাৰেহে জাৰি কৰিব পাৰে, সঞ্চালকালয়ৰ দ্বাৰা নহয় ।’’
