ৰেট হোল মাইনিং এৰি লিডু-মাৰ্ঘেৰিটাৰ পৰা দলে দলে পলাইছে শ্ৰমিক
অবৈধ কয়লাখনি ছীল । অবৈধ কয়লাখনিত কৰ্মৰত তিনি শ্ৰমিকক আটক ।
Published : January 22, 2025 at 11:35 AM IST
তিনিচুকীয়া : উমৰাংছ'ত অবৈধ কয়লাখনিত সংঘটিত শ্ৰমিকৰ মৃত্যৰ ঘটনাৰ পাছতেই প্ৰশাসনে মাৰ্ঘেৰিটা সমজিলাৰ অন্তৰ্গত নামদাংস্থিত বিটু পাহাৰত বৃহৎ অভিযান চলাই ইতিমধ্যে ১৩ টাকৈ ৰেট হোল মাইনিং বন্ধ কৰে ।
লগতে ৪ জন শ্ৰমিকক আটক কৰাৰ উপৰি এখন এক্সকেভেটৰ জব্দ কৰে । ইয়াৰ পাছতেই মাৰ্ঘেৰিটা-লিডুৰ পৰা দলে দলে পলায়ন কৰিছে অবৈধ কয়লাখনিত কাম কৰি থকা শ্ৰমিকে । এতিয়া অবৈধ কয়লাখনিত কাম কৰা শ্ৰমিকৰূপী লোকৰ বাবে বিৰ দি বাট নোপোৱা অৱস্থাৰ সৃষ্টি হৈছে লিডু ৰে'লৱে ষ্টেচনত । টিকটৰ বাবে দীঘলীয়া শাৰী ।
উল্লেখ্য যে অসমৰ আৰক্ষীৰ সঞ্চালক প্ৰধান জিপি সিঙে X যোগে মাৰ্ঘেৰিটা, লিডু, লেখাপানীত চলা ৰেট হোল মাইনিং পৰৱৰ্তী সাতদিনৰ ভিতৰত বন্ধ কৰাৰ কঠোৰ নিৰ্দেশ দিয়াৰ পিছতে হাহাকাৰ লাগিছে ইয়াৰ সৈতে জড়িত থকা লোকসকলৰ । উমৰাংছ'ৰ ঘটনাৰ পিছতে খোদ আৰক্ষী সঞ্চালক প্ৰধানগৰাকী মাৰ্ঘেৰিটা, লিডু, লেখাপানীলৈ আহি সমগ্ৰ পৰিস্থিতিৰ বুজ লৈ মাৰ্ঘেৰিটাৰ বিতৰ্কিত চোৰাং কয়লাৰ লগতে ৰেটহোল মাইনিং বন্ধ কৰাৰ নিৰ্দেশ দিয়ে ।
ইয়াৰ পিছতে মাৰ্ঘেৰিটাত একপ্ৰকাৰ হাহাকাৰ লাগিছে । যিয়ে যেনেকৈ পাৰে গোৱালপাৰা, ধুবুৰী, নগাঁও, মৰিগাঁও, হাইলাকান্দি আদি জিলাৰ প্ৰায় দুই সহস্ৰাধিক শ্ৰমিকে লিডুৰ পৰা গুৱাহাটী অভিমূখী ইণ্টাৰচিটী ট্ৰেইনত ৰাওনা হৈছে । আনহাতে, মঙলবাৰে তিনিচুকীয়া জিলা প্ৰশাসনৰ নিৰ্দেশত মাৰ্ঘেৰিটাৰ ভিন্ন স্থানত ৪ টা গোটে চলাই অভিযান । লিডুৰ বিভিন্ন স্থানত অব্যাহত থকা অবৈধ কয়লাখনি (ৰেট হোল মাইনিং) ৰ বিৰুদ্ধে প্ৰশাসনে অভিযান তীব্ৰতৰ কৰি তুলিছে ।
অবৈধ কয়লাখনি ছীল:
নামদাংস্থিত অবৈধ কয়লাখনিৰ লগতে লিডু আৰু টিৰাপত চলিয়ে আছে আৰক্ষীৰ অভিযান । মাৰ্ঘেৰিটা আৰক্ষীৰ প্ৰশাসন, সমজিলা প্ৰশাসন আৰু উত্তৰ-পূব কয়লাক্ষেত্ৰই মাৰ্ঘেৰিটাৰ নামদাংস্থিত অবৈধ ৰেট হোল মাইনিঙৰ উপৰি লিডু, টিৰাপ, টিকক আদি কেইবাটাও স্থানত অবৈধ কয়লাখনি (ৰেট হোল মাইনিং)ৰ বিৰুদ্ধে অভিযান চলায় । এই অভিযানত কেইবাটাও অবৈধ কয়লাখনি প্ৰশাসনে ছীল কৰে ।
উক্ত অভিযানত উপস্থিত থকা সমজিলা প্ৰশাসনৰ কাৰ্যবাহী বিষয়াগৰাকীয়ে সংবাদমাধ্যমৰ আগত কয়, “পুৱা ৮.৩০ বজাৰ পৰা মাৰ্ঘেৰিটা আৰক্ষী, ক’ল ইণ্ডিয়া আৰু বিদ্যুৎ বিভাগৰ সহযোগত আমি অবৈধ কয়লাৰ খননৰ বিৰুদ্ধে অভিযান চলালো । অভিযানত ৰেট হোল মাইনিং চলি থকাৰ সময়ত আমি ১৩ টা ৰেট হোল মাইনিং বন্ধ কৰিলো । লগতে গাঁতৰ ভিতৰত কাম কৰি থকা তিনিজন শ্ৰমিকক উলিয়াই অনাত আৰক্ষীয়ে তেওঁলোকক আটক কৰি সোধাপোচা অব্যাহত ৰাখিছে ।"
ক'ল ইণ্ডিয়াৰ কাৰ্যালয়ত জেনেৰেটৰ সংযোগ :
তেওঁ পুনৰ কয়, "সমান্তৰালভাৱে যিখিনি বিদ্যুৎ যোগান লৈ কাম কৰি আছিল সকলো সংযোগ বিছিন্ন কৰি দিয়া হৈছে । লগতে বিভিন্ন সা-সামগ্ৰী জব্দ কৰা হৈছে । উক্ত স্থানত থকা ক’ল ইণ্ডিয়াৰ এটা পুৰণা কাৰ্যালয়ত এগৰাকী কৰ্মচাৰীয়ে এটা জেনেৰেটৰ স্থাপন কৰি এই কাম কৰি আছিল । এতিয়া সমগ্ৰ বিষয়টো সন্দৰ্ভত তদন্ত অব্যাহত ৰখা হৈছে ।” ইফালে, শেহতীয়াকৈ অবৈধ কয়লাক্ষেত্ৰত চলা অভিযানে চোৰাং কয়লা মাফিয়াৰ মাজত ত্ৰাসৰ সৃষ্টি কৰিছে । লগতে অবৈধ ৰেট হোল মাইনিং কৰা কয়লা মাফিয়াই বিনিদ্ৰ ৰজনী কটাবলগীয়া হৈছে ।
