উত্তম গগৈৰ হত্যাকাণ্ড; পত্নী-কন্যাই মিলি ১০ লাখ টকাৰ চুক্তিত স্বামীক হত্যা

ডিব্ৰুগড় : চাঞ্চল্যকৰ এক হত্যাকাণ্ডই জোকাৰি গৈছে‌ ডিব্ৰুগড়ৰ বৰবৰুৱা ।‌ বৰবৰুৱাৰ উত্তম গগৈৰ নৃশংস হত‍্যাক লৈ পত্নী কন্যাসহ চাৰিজনক বৰবৰুৱা আৰক্ষীয়ে গ্ৰেপ্তাৰ কৰা পাছতে পাছতে সমগ্ৰ ঘটনাটোৱে ৰাজ্যত তীব্ৰ চাঞ্চল্য সৃষ্টি কৰিছে ।

এই ঘটনা পোহৰলৈ অহাৰ পাছতে হত্যাকাৰীক উচিত শাস্তি দিয়াৰ দাবী কৰি ৰাইজে প্ৰতিবাদ সাব্যস্ত কৰাৰ সমান্তৰালভাৱে আৰক্ষীয়ে ঘটনাক লৈ তদন্ত ক্ষীপ্ৰতাৰে আৰম্ভ কৰিছে ।‌ আজি (মঙলবাৰ) বৰবৰুৱা আৰক্ষীয়ে ব্যৱসায়ী উত্তম গগৈ ওৰফে ছেং কাইৰ হত‍্যাকাণ্ডত ব‍্যৱহৃত লোহাৰ পাইপ উদ্ধাৰ কৰিবলৈ সক্ষম হয় । বৰবৰুৱাৰ পাত্ৰ গাঁৱৰ এটা নলাৰ পৰা উদ্ধাৰ কৰা হয় অস্ত্ৰ হিচাপে ব্যৱহাৰ কৰা পাইপ ।

বৰবৰুৱা আৰক্ষীয়ে হত্যাকাৰী দ্বীপজ্যোতি বুঢ়াগোহাঁইক লগত লৈ SDRF আৰু DMCৰ সহায়ত অভিযান চলাইছিল ।‌ হত্যাকাণ্ড সংঘটিত কৰি দুই হত্যাকাৰীয়ে এই নলাত পেলাই দিছিল হত‍্যাকাণ্ডত ব‍্যৱহৃত লোহাৰ পাইপ । হত্যাকাণ্ডত ব্যৱহৃত আন আন সামগ্ৰীসমূহো বিচাৰি অভিযান আৰক্ষীৰ ।

কেনেকৈ সংঘটিত হৈছিল এই চাঞ্চল্যকৰ হত্যাকাণ্ড :

যোৱা ২৫ জুলাইত সংঘটিত হৈছিল এই চাঞ্চল্যকৰ হত্যাকাণ্ডটো । বৰবৰুৱাৰ লাহন গাঁৱৰ উদীয়মান ব‍্যৱসায়ী উত্তম গগৈক কোনো দুৰ্বৃত্তই ঘৰত অকলে থকা অৱস্থাত নিশা নৃশংসভাৱে হত‍্যা কৰিছিল । মৃতদেহ উদ্ধাৰ হোৱা শুৱনি কোঠাটোৰ বিভিন্ন সামগ্ৰী ছেদেলি ভেদেলি কৰি মূল‍্যবান বয়বস্তু লৈ গৈছিল হত‍্যাকাৰীয়ে ।

হত‍্যাকাৰীয়ে এখন কাণ কাটি থৈ গৈছিল উত্তম গগৈৰ ।‌ এই ঘটনা ডকাইটি ঘটনা বুলি অনুমান কৰা হৈছিল যদিও আৰক্ষীৰ তদন্তত পোহৰলৈ আহে বহু চাঞ্চল্যকৰ তথ্য । আৰক্ষীৰ তদন্তত পোহৰলৈ আহে উদীয়মান ব‍্যৱসায়ী উত্তম গগৈক নিজৰ পত্নী আৰু কন্যাই চুপাৰী কিলাৰ লগাই হত্যা কৰিছিল ।

ইয়াৰ পিছত পাছতে দেওবাৰে পুৱা বৰবৰুৱা আৰক্ষীয়ে আটক কৰিছে উত্তম গগৈৰ পত্নী ববী গগৈ, নৱম শ্ৰেণীত অধ্যয়নৰত নাবালিক কন্যা আৰু জামিৰা মটক গাঁৱৰ দীপজ্যোতি বুঢ়াগোহাঁই আৰু তেওঁৰ সহযোগী এজন নাবালকক । আৰক্ষীৰ জেৰাত হত্যাকাৰীয়ে স্বীকাৰ কৰিছে পত্নী, কন্যাই দুই চুপাৰী কিলাৰক সোণৰ গহনা আৰু কেইবা লাখ টকা দি হত্যা কৰাইছিল উদীয়মান ব‍্যৱসায়ী উত্তম গগৈক ।

৪ দিনৰ আৰক্ষী জিম্মাত ২ অভিযুক্ত :

ডিব্ৰুগড়ৰ বৰবৰুৱাত সংঘটিত চাঞ্চল্য আজিও অব্যাহত থকাৰ লগতে অভিযুক্তক মাৰাথান জেৰা চলাইছে আৰক্ষীয়ে । অভিযুক্ত ববী সোণোৱাল গগৈ, দ্বীপজ্যোতি বুঢ়াগোহাঁইক ৪ দিনৰ আৰক্ষী জিম্মাত লৈ মাৰাথান জেৰা চলাইছে আৰক্ষীয়ে । আনহাতে এই হত্যাকাণ্ডত অভিযুক্ত আনজন নাবালক অভিযুক্ত আৰু উত্তম গগৈৰ নৱম শ্ৰেণীত অধ্যয়নৰত কন্যাক শিশু সংশোধন গৃহলৈ প্ৰেৰণ কৰিছে আৰক্ষীয়ে ।

হত্যাকাৰীক উচিত শাস্তিৰ দাবীত বাৰবৰুৱা থানাত অৱস্থান লাহন গাঁৱৰ ৰাইজৰ :

উত্তম গগৈৰ ষষ্ঠ শ্ৰেণীত অধ্যয়ন কৰি থকা কণমানি পুত্ৰক লৈ বিপাঙত পৰিছে পৰিয়ালৰ লোকৰ লগতে লাহন গাঁৱৰ গাঁওবাসী । পিতৃৰ জঘন‍্য হত‍্যাকাণ্ড, মাতৃ আৰু বায়েক ৰঙাঘৰত । শিশুটিৰ ভৱিষ‍্যতক লৈ চিন্তিত পৰিয়ালৰ লগতে গাঁওখনৰ সচেতন লোক ।

আনহাতে আজি লাহন গাঁৱৰ একাংশ মহিলাই বৰবৰুৱা আৰক্ষী থানাত অৱস্থান গ্ৰহণ কৰি হত্যাকাৰীক উচিত শাস্তিৰ দাবীত জনায় । এগৰাকী সচেতন মহিলাই কয়, "কিয় পত্নী কন্যাই এই ঘটনা সংঘটিত কৰিলে তাৰ ৰহস্য আৰক্ষীয়ে উদঘাটন কৰিব লাগে । প্ৰয়োজন হ'লে আৰক্ষীয়ে আৰু বেছি দিন জেৰা কৰিব লাগে । এই ঘটনাত তৃতীয় পক্ষ জড়িত আছে সেয়ে সৰু ল'ৰা- ছোৱালী ব্যৱহাৰ কৰিছে যাতে শাস্তিৰ পৰা বাচি যাব পাৰে । তেওঁৰ ব্যৱসায়ৰ লগত জড়িত মানুহখিনিকো তদন্তৰ আওতালৈ আনিব লাগে, তেতিয়া সকলো ৰহস্য ফাদিল হ'ব ।''