পাঁচ শতাধিক ঢোলৰ অৰ্ডাৰ লৈ বিহুলৈ সাজু শম্ভূ দাস - Dhol Ready For Bihu

ধেমাজি, ৩০ মাৰ্চ : অসমীয়া হেঁপাহৰ ৰঙালী বিহুলৈ মাজত প্ৰায় এপষেক । গছৰ ডালে ডালে কুলি-কেতেকীৰ অমিয়া মাত আৰু বিহু আখৰাতলীত ঢোলৰ গুমগুমনিয়ে কঢ়িয়াই আনিছে ৰঙালীৰ বতৰা ৷ শিপিনী ব্যস্ত তাঁতশালত । ঢোল-পেঁপা, গগনা গোটোৱাত ব্যস্ত বিহুৱা নাচনী । চৌদিশে মাথোঁ ৰঙালীক আদৰাৰ ব্যাপক ব্যস্ততা ।

ৰঙালী বিহুৰ আটাইতকৈ প্ৰয়োজনীয় লোকবাদ্যবিধেই হৈছে ঢোল ৷ ঢোলত চাপৰ ঠিকমতে নপৰিলে নাচনীৰ লাহী কঁকাল নাভাঙে ৷ প্ৰকৃততে ক’বলৈ গ'লে ঢোলেহে আনে ৰঙালী বিহুৰ মাদকতা ৷ সেয়ে বিহুৰ প্ৰাকমুহূৰ্তত বিভিন্ন ঢোলৰে সৰু বৰ বিপণীসমূহ ভৰি পৰিছে ৷

ধেমাজি জিলাৰ ভিতৰতে বিখ্যাত অন্যতম ঢোলৰ ব্যৱসায় প্ৰতিষ্ঠান হৈছে মাছখোৱা চাৰিআলিত থকা অমূল্য বাদ্য ভাণ্ডাৰ ৷ এই অমূল্য বাদ্য ভাণ্ডাৰত ঢোল, খোল, তবলা, নেগেৰা আদি সকলো লোকবাদ্য নিৰ্মাণ কৰে ৷ বিপনীখনৰ স্বত্বাধিকাৰ শম্ভূ দাসে জানিবলৈ দিয়া অনুসৰি অমূল্য বাদ্য ভাণ্ডাৰত এইবেলি বিহুৰ বাবে লাভ কৰিছে পাঁচশৰো অধিক ঢোল ৷

ব্যৱসায় প্ৰতিষ্ঠানটোৱে ঢোলসমূহ পাইকাৰী হিচাপে বিক্ৰী কৰাই নহয় খুচুৰা হিচাপেও বিক্ৰীও কৰে বুলি জানিবলৈ দিয়ে স্বত্বাধিকাৰী শম্ভূ দাসে ৷ ধেমাজি জিলাৰ বিভিন্ন প্ৰান্তৰ লগতে গোলাঘাট, ডিব্ৰুগড়, মাজুলী আদি আন আন জিলাৰ লোকসকলেও সম্ভূ দাসৰ ঢোল বিচাৰি ভিৰ কৰে বিপনীখনত ৷

নিম্নতম ৫০০ টকা মূল্যৰ পৰা ৮০০০ হাজাৰ টকা পৰ্যন্ত মূল্যৰ ঢোল বিক্ৰী কৰে প্ৰতিষ্ঠানটোৱে ৷ এতিয়া বিহুৰ বতৰত পাঁচ ছয়জন লোকক লৈ একেলগে দিনে-নিশাই ঢোল নিৰ্মাণ কৰাত ব্যস্ত হৈ পৰিছে শম্ভূ দাসৰ বাদ্য ভাণ্ডাৰ ৷

লগতে পঢ়ক: ঢোল-পেঁপাৰ মাতত কঁপিছে পানীতোলা: কঁকাল ভাঙি নাচিবলৈ ওলাই আহিল কণমানিও