ৰাম মন্দিৰৰ প্ৰাণ প্ৰতিষ্ঠাৰ বৰ্ষপূৰ্তি; বশিষ্ঠ মন্দিৰত প্ৰজ্বলন 1,11,111 গছি বন্তি

গুৱাহাটী : চাওঁতে চাওঁতে এটা বছৰ শেষ হ’ল ৷ বিগত বৰ্ষৰ 22 জানুৱাৰীৰ দিনা ডবা-শংখৰ ধ্বনিৰ সহিতে পুৰোহিতৰ মন্ত্ৰোচাৰণৰ মাজৰেৰে অতি আৰম্বপূৰ্ণভাৱে অযোধ্যাত ৰাম মন্দিৰত প্ৰাণ প্ৰতিষ্ঠা কৰা হৈছিল ৷ দেশ-বিদেশৰ পৰা অগণন লোকে ৰাম লালাক এবাৰ কাষৰ পৰা চাবলৈ অযোধ্যাত দৌৰি আহিছিল ৷ যি বাতৰিয়ে দেশৰ লগতে আন্তঃৰাষ্ট্ৰীয় কেবাটাও সংবাদ সংস্থাৰ শিৰোনাম দখল কৰিছিল ৷

অযোধ্যাত ৰাম লালাৰ প্ৰাণ প্ৰতিষ্ঠাৰ এটা বছৰ সম্পূৰ্ণ হ’ল । ৰাম মন্দিৰৰ প্ৰাণ প্ৰতিষ্ঠাৰ বৰ্ষপূৰ্তি উপলক্ষে সমগ্ৰ দেশৰ লগতে অসমৰো বিভিন্ন প্ৰান্তত বুধবাৰে পুৱাৰে পৰা বিভিন্ন কাৰ্যসূচী অনুষ্ঠিত কৰা পৰিলক্ষিত হয় । এই অনুষ্ঠানৰ অংশস্বৰূপে গুৱাহাটী মহানগৰীৰ বশিষ্ঠাশ্ৰম দেৱালয়তো অনুষ্ঠিত কৰা হয় এক বিশেষ কাৰ্যসূচী । এক লাখ এঘাৰ হাজাৰ এশ এঘাৰ চাকি জ্বলাই উদযাপন কৰা হ’ল ৰাম লালাৰ প্ৰাণ প্ৰতিষ্ঠা কৰা এই বিশেষ দিনটো ।

বশিষ্ঠৰ অজয় দে নামৰ এজন যুৱকৰ নেতৃত্বত বশিষ্ঠ মন্দিৰ পৰিচালনা সমিতি তথা বৃহত্তৰ বশিষ্ঠ অঞ্চলৰ ৰাইজৰ সহযোগত প্ৰজ্বলন কৰা হয় এক লাখ এঘাৰ হাজাৰ এশ এঘাৰ চাকি । প্ৰজ্বলন কৰা চাকিৰে অংকন কৰা হয় শ্ৰীৰাম-সীতা, হনুমানৰ প্ৰতিচ্ছবি । লগতে ‘‘জয় শ্ৰী ৰাম’’ ধ্বনিৰে মুখৰিত হৈ পৰে সমগ্ৰ বশিষ্ঠাশ্ৰম দেৱালয় চৌহদ ।

উল্লেখ্য যে, বিগত বৰ্ষৰ 22 জানুৱাৰীৰ দিনা সমগ্ৰ দেশবাসীয়ে অধীৰ আগ্ৰহেৰে বাট চাই থকা ৰাম মন্দিৰৰ প্ৰাণ প্ৰতিষ্ঠা প্ৰধানমন্ত্ৰী নৰেন্দ্ৰ মোদীৰ উপস্থিতিত সম্পূৰ্ণ বৈদিক ৰীতি-নীতিৰে কৰা হৈছিল । সেই হেতুকে 2024 চনৰ 22 জানুৱাৰীৰ দিনা বশিষ্ঠ মন্দিৰৰ প্ৰাংগনত প্ৰজ্বলন কৰা হৈছিল এক লাখ গচি মাটিৰ চাকি ।