গুৱাহাটী : চলিত বাৰিষাৰ প্ৰথমটো বানে ৰাজ্যৰ বিস্তৰ ক্ষতি সাধন কৰিলে । শেহতীয়াকৈ ৰাজ্যৰ বান পৰিস্থিতি কিছু উন্নত হৈছে যদিও আজিৰ দিনটোতো সাতখন জিলাৰ কেইবাহাজাৰ লোক বানৰ কবলত আছে । প্ৰথমটো বানত ৰাজ্যৰ শ শ হেক্টৰ কৃষিভূমি বিনষ্ট হৈছে ।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই দিয়া তথ্য মতে, চলিত বানত এতিয়ালৈকে ২২ জন লোকৰ মৃত্যু হৈছে । লক্ষণীয় বিষয় যে প্রত্যেক বছৰ বাৰিষা বানে ৰাজ্যত প্ৰলয়ৰ সৃষ্টি কৰাটো নতুন কথা নহয় ।
চলিত বৰ্ষতো তাৰ ব্যতিক্ৰম হোৱা নাই । কিন্তু উদ্বেগজনক কথাটো হ'ল যে প্ৰতি বছৰে ক্ষতি অনুপাতে ৰাজ্যখনে কেন্দ্ৰৰ পৰা ধন লাভ নকৰে । অথচ বানে কৰা ক্ষতিপূৰণৰ বাবে প্ৰতি বছৰে ৰাজ্য চৰকাৰক বৃহৎ পৰিমাণৰ পুঁজিৰ প্ৰয়োজন হয় ।
- দহ বছৰত বানত প্ৰাণ গ'ল ৯৬৪ গৰাকী লোকৰ :
প্ৰত্যেক বছৰে বানত বহুলোকে প্ৰাণ হেৰুৱাব লগা হয় । চলিত বানতে এতিয়ালৈকে ২২ জন লোকৰ মৃত্যু হৈছে । বিগত দহ বছৰত ৰাজ্যত প্ৰলয়ংকাৰী বানে প্ৰাণ নিলে ৯৬৪ গৰাকী লোকৰ ।
এই তথ্য অসম ৰাজ্যিক দুৰ্যোগ ব্যৱস্থাপনা কৰ্তৃপক্ষৰ । দিছপুৰৰ জনতা ভৱনস্থিত অসম ৰাজ্যিক দুৰ্যোগ ব্যৱস্থাপনা কৰ্তৃপক্ষ কাৰ্যালয়ৰ এগৰাকী প্ৰকল্প প্ৰৱন্ধকে জনোৱা মতে বিগত বৰ্ষত হোৱা সংহাৰী বানত ৰাজ্যখনত মুঠ ১১০জন লোকৰ মৃত্যু হৈছিল ।
আনহাতে বানত ৪৯,৫৮০.৪৩ হেক্টৰ কৃষিভূমি নষ্ট হোৱাৰ লগতে বিধ্বস্ত হৈছিল ১,৪৫,২৪৯ টা বাসগৃহ । বছৰটোত বানৰ দ্বাৰা ক্ষতিগ্ৰস্ত হৈছিল ২,৩১৮টা পথ । ইফালে বিগত ২০১৫ চনৰ পৰা ২০২৪ বৰ্ষলৈকে ৰাজ্যখনত বানৰ ফলত ৯৬৪ গৰাকী লোকৰ প্ৰাণ হেৰুৱাইছে ।
বিষয়াগৰাকীয়ে দিয়া তথ্য অনুসৰি, ২০১৫ চনত ৬৬ গৰাকী, ২০১৬ চনত ৬৪ গৰাকী, ২০১৭ চনত ১৬০ গৰাকী, ২০১৮ চনত ৫৩ গৰাকী, ২০১৯ চনত ১০১গৰাকী, ২০২০ চনত ১৫০ গৰাকী, ২০২১ চনত ৩ গৰাকী, ২০২২ চনত ১৭৯ গৰাকী, ২০২৩ চনত ৭৮ গৰাকী আৰু ২০২৪ বৰ্ষত ১১০ গৰাকী লোকৰ বানত মৃত্যু হৈছিল ৷
- বানত কৃষিখণ্ডৰ বিস্তৰ ক্ষতি :
কৃষিপ্ৰধান ৰাজ্যখনত বানে প্ৰত্যেক বছৰে বিস্তৰ ক্ষতি সাধন কৰি আহিছে । বিগত ৯ বছৰত ৰাজ্যখনৰ কৃষি খণ্ড বিশেষকৈ শস্যৰ ব্যাপক ক্ষতি সাধন হৈছে । বিষয়াগৰাকীয়ে দিয়া চৰকাৰী তথ্য অনুসৰি, ২০১৫ চনত ১০৫ কোটি টকা, ২০১৬ চনত ৮৫ কোটি টকা, ২০১৭ চনত ১০০.১২ কোটি টকা, ২০১৮ চনত ২৩.৪৮ কোটি টকা, ২০১৯ চনত ১৫৭.৫৪ কোটি টকা, ২০২০ চনত ১৪৫.৮৬ কোটি টকা, ২০২১ চনত ৮.৫৫ কোটি টকা, ২০২২ চনত ১৫৪.৫৮ কোটি টকা আৰু ২০২৩ চনত ১৭.৯৯ কোটি টকাৰ শস্যৰ ক্ষতি হৈছিল ।
| চন | ক্ষতি হোৱা শস্যৰ পৰিমাণ |
| ২০১৫ চন | ১০৫ কোটি টকা |
| ২০১৬ চন | ৮৫ কোটি টকা |
| ২০১৭ চন | ১০০.১২ কোটি টকা |
| ২০১৮ চন | ২৩.৪৮ কোটি টকা |
| ২০১৯ চন | ১৫৭.৫৪ কোটি টকা |
| ২০২০ চন | ১৪৫.৮৬ কোটি টকা |
| ২০২১ চন | ৮.৫৫ কোটি টকা |
| ২০২২ চন | ১৫৪.৫৮ কোটি টকা |
| ২০২৩ চন | ১৭.৯৯ কোটি টকা |
ইয়াৰ উপৰি ৰাজ্যৰ আন্তঃগাঁথনিৰ ক্ষেত্ৰতো কোটি কোটি টকাৰ ক্ষতি হৈ আহিছে।
- ৯ বছৰত ২৯ হাজাৰ কোটি টকাৰ বিপৰীতে দিলে তিনিশ কোটি টকা :
প্ৰত্যেক বছৰে বানত ৰাজ্যখনৰ ইমান বৃহৎ পৰিমাণৰ ক্ষতি হোৱাৰ পাছতো কিন্তু কেন্দ্ৰীয় চৰকাৰে অসমৰ এই জ্বলন্ত সমস্যাটো সমাধানৰ ক্ষেত্ৰত বিশেষ গুৰুত্ব দিয়া পৰিলক্ষিত হোৱা নাই । আনকি ৰাজ্যখনে বিচৰা অনুসৰি সাহায্যও প্রদান কৰা হোৱা নাই । মাথোঁ এছ ডি আৰ এফ শিতানত অসমে পাবলগীয়া প্ৰাপ্য ধনৰাশি মোকলাই দিয়েই দায়িত্ব সামৰিছে কেন্দ্ৰই ।
উল্লেখ্য যে, বিগত ২০১৬ চনৰ পৰা ২০২৪ চনলৈ বিগত ৯টা বছৰত অসম চৰকাৰে কেন্দ্ৰীয় চৰকাৰৰ পৰা ২৯,০৩০.০২ কোটি টকা বিচাৰিছিল যদিও পালে মাত্র ৩২৩.৩৮ কোটি টকা । এই কথা আমি কোৱা নাই । এই কথা কৈছে ৰাজ্য চৰকাৰে ।
অসম বিধানসভাত ৰাজহ আৰু দুৰ্যোগ ব্যৱস্থাপনা বিভাগৰ মন্ত্রী কেশৱ মহন্তই দিয়া বিবৃত্তি অনুসৰি ২০২১ চনত বানত হোৱা ক্ষয়-ক্ষতিৰ বাবে অসমে কেন্দ্ৰৰ পৰা বিচাৰিছিল ১,০৮৮.১৯ কোটি টকা । কিন্তু সেই বছৰত অসমে কেন্দ্ৰৰ পৰা পালে মাত্র ৪৪.৩৭ কোটি টকা ।
২০২২ চনত কেন্দ্ৰৰ পৰা অসমে ৩,০৭৩.৮৬ কোটি টকা বিচাৰিছিল যদিও পাইছিল মাত্র ২৫০ কোটি টকা । তাৰ পাছত ২০২৩ চনত অসমে কেন্দ্ৰৰ পৰা ১১৭.৬৮ কোটি টকা বিচাৰিছিল যদিও কেন্দ্ৰই অসমক এটা টকাও নিদিলে ।
২০২৪ চনতো অসম চৰকাৰে কেন্দ্ৰীয় চৰকাৰৰ পৰা ১,৬৮১.৪৯ কোটি টকা বিচাৰে যদিও কেন্দ্ৰীয় চৰকাৰে দিয়ে মাত্ৰ ২৯.০১৭ কোটি টকা । বানত হোৱা ক্ষয়-ক্ষতিৰ বাবে অসম চৰকাৰে কেন্দ্ৰৰ পৰা বিচৰা ধৰণে পুঁজি লাভ কৰা নাই । যাৰ ফলত ৰাজ্যৰ উন্নয়নৰ গতিতো বাধাৰ সৃষ্টি হৈছে ।
| চন | কেন্দ্ৰৰ পৰা অসমে বিচৰা টকাৰ পৰিমাণ | অসমে কেন্দ্ৰৰ পৰা লাভ কৰা টকাৰ পৰিমাণ |
| ২০২১ চন | ১,০৮৮.১৯ কোটি টকা | ৪৪.৩৭ কোটি টকা |
| ২০২২ চন | ৩,০৭৩.৮৬ কোটি টকা | ২৫০ কোটি টকা |
| ২০২৩ চন | ১১৭.৬৮ কোটি টকা | ০ |
| ২০২৪ চন | ১,৬৮১.৪৯ কোটি টকা | ২৯.০১৭ কোটি টকা |
পিছে এই ক্ষেত্ৰত কোনো গুৰুত্ব নাই কেন্দ্ৰীয় চৰকাৰৰ । কৃষি অৰ্থনীতিৰ ওপৰত বিশেষভাৱে নিৰ্ভৰশীল ৰাজ্যখনত প্ৰত্যেক বছৰে বানে কৃষি খণ্ডৰ ওপৰত নেতিবাচক প্ৰভাৱ পেলাই আহিছে ।
