'দেও কুবেৰ শলিতা লগোৱা সকাম' কি !
সৰুপথাৰত 'দেও কুবেৰ শলিতা লগোৱা সকাম' । উপস্থিত মন্ত্ৰী অতুল বৰা । অসম-নাগালেণ্ড সীমা সমস্যা সন্দৰ্ভত প্ৰতিক্ৰিয়া প্ৰকাশ মন্ত্ৰীগৰাকীৰ ।
Published : February 12, 2025 at 9:40 PM IST
সৰুপথাৰ: চুতীয়া যুৱ সন্মিলন অসম ধনশিৰি জিলা সমিতিৰ উদ্যোগত সৰুপথাৰত অনুষ্ঠিত কৰা হয় দেও কুবেৰ শলিতা লগোৱা সকাম । মাঘী পূৰ্ণিমা তিথি উপলক্ষে অনুষ্ঠিত কৰা হয় দেও কুবেৰ শলিতা লগোৱা সকাম । সৰুপথাৰৰ ১নং গন্ধকৰৈ গাঁৱত অনুষ্ঠিত কৰিছে এই অনুষ্ঠান । অসমৰ ভূমিপুত্ৰ চুতীয়া জনগোষ্ঠীৰ ৰজা ৰজা বীৰপাল, সতী সাধনীৰ প্ৰতিচ্ছবিত শ্ৰদ্ধাঞ্জলী জনোৱা হয়, স্মৃতি তৰ্পণ কৰাৰ লগতে ৰাজীৱ শদিয়াকো শ্ৰদ্ধাঞ্জলি জনোৱা হয় ।
চুতীয়া জনগোষ্ঠীৰ 'দেও কুবেৰ শলিতা লগোৱা সকাম' পূৰ্ব-পুৰুষৰ উপাসনা কৰা এক জনগোষ্ঠীয় অনুষ্ঠান । জনশ্ৰুতি অনুসৰি বীৰপালৰ ৰাজত্ব কালতে চুতীয়াৰ ইষ্ট দেৱতা কুবেৰৰ আবিৰ্ভাৱ হৈছিল চুতীয়া ৰাজ্যত । ইষ্ট দেৱতা কুবেৰ দেৱে ৰাজলক্ষ্মী স্বৰূপা পাঁচবিধ ধাতু দ্ৰব্য স্বপ্নৰ জৰিয়তে বীবৰক অৰ্পণ কৰিছিল । ইয়াৰে ভিতৰত সোণৰ বিড়ালী, সোণৰ ঢাল, তৰোৱাল, এপাত জাকি আৰু এটা দণ্ডচত্ৰ আছিল ।
এই সম্পদসমূহ আছিল চুতীয়া ৰজাৰ শৌৰ্য বীৰ্যৰ প্ৰতীক তথা দেশৰ স্বাভিমান আৰু সাহসৰ প্ৰতীক । এই ধাতু দ্ৰব্য সম্পদসমূহ চুতীয়া ৰাজবংশত প্ৰজন্ম ধৰি সংৰক্ষিত হৈ আছিল আৰু পবিত্ৰ মাঘী পূৰ্ণিমাৰ দিনা গংগাজলেৰে পবিত্ৰ কৰি পূজা অৰ্চনা কৰাৰ লগতে দেও কুবেৰ আৰু শলিতা লগোৱা সকাম অনুষ্ঠিত কৰিছিল । দেও কুবেৰ অনুষ্ঠানত 'সাম্প্ৰতিক সময়ত অসমত বসবাস কৰা সকলো জাতি-জনগোষ্ঠীৰ মাজত সমন্বয়ৰ প্ৰয়োজনীয়তা আৰু এই ক্ষেত্ৰত আমাৰ কৰণীয়' শীৰ্ষক বিষয়ত এখন আলোচনা চক্ৰ অনুষ্ঠিত হয় ।
চুতীয়া যুৱ সন্মিলন অসম ধনশিৰি জিলা সমিতিৰ উদ্যোগত সৰুপথাৰত অনুষ্ঠিত হোৱা দেও কুবেৰ শলিতা লগোৱা সকামত উপস্থিত থাকে মন্ত্ৰী অতুল বৰা । মন্ত্ৰীগৰাকীয়ে উক্ত অনুষ্ঠানত অংশগ্ৰহণ কৰি কয়, "আজি মাঘী পূৰ্ণিমা ৷ মাঘী পূৰ্ণিমাৰ দিনটোতেই চুতীয়াসকলে দেও কুবেৰৰ এই অনুষ্ঠানটি অনুষ্ঠিত কৰে । আমি জানো যে উত্তৰ পাৰত পৰম্পৰাগতভাৱে পাতি অহা হয় । ইয়াত প্ৰথমবাৰৰ বাবে অনুষ্ঠিত কৰিছে । আমি এই পবিত্ৰ অনুষ্ঠানত উপস্থিত থাকি অত্যন্ত আনন্দিত হৈছোঁ ।"
ইফালে একেদিনাই অসম-নাগালেণ্ড সীমান্তত অৱস্থিত তৈলখাদত নাগালেণ্ডৰ প্ৰশাসন উপস্থিত হৈ ONGC ৰ বিষয়া কৰ্মচাৰীক ভাবুকি প্ৰদান কৰাৰ প্ৰসংগত বিশেষ প্ৰতিক্ৰিয়া প্ৰকাশ নকৰিলেও, অসম-নাগালেণ্ড সীমা সমস্যা সন্দৰ্ভত মন্ত্ৰী বৰাই প্ৰকাশ কৰে প্ৰতিক্ৰিয়া । তেওঁ কয়, "আপোনালোকে জানে যে বহুদিনৰে পৰা সৰুপথাৰৰ অসম-নাগালেণ্ড সীমান্তত মাজে মাজে কেতবোৰ ঘটনা হৈ থাকে । আগতেতো বহুত ডাঙৰ ঘটনাই হৈ গৈছে । আমাৰ কাৰ্যকালত আমি চোকা দৃষ্টি ৰাখিছোঁ । মুখ্যমন্ত্ৰীয়েও চুবুৰীয়া ৰাজ্যসমূহৰ লগত সৌহাদ্যপূৰ্ণ সম্পৰ্ক এটা ৰক্ষা কৰিবৰ বাবে চেষ্টা কৰি আহিছে ।"
