গুৱাহাটী: ৰাজ্যৰ নগৰ-চহৰত জনসংখ্যা বৃদ্ধিৰ লগে লগে ক্ৰমাৎ বৃদ্ধি পাইছে ফ্লেটৰ চাহিদা । বিশেষকৈ ৰাজধানী চহৰ গুৱাহাটী মহানগৰীত জনসংখ্যাৰ বিপৰীতে ভূমিৰ পৰিমাণ কমি অহাত স্বাভাৱিকতে ফ্লেটৰ চাহিদা বৃদ্ধি পাইছে । ফ্লেটৰ চাহিদা বৃদ্ধিৰ লগে লগে বৃদ্ধি পাইছে ৰিয়েল ইষ্টেটৰ ব্যৱসায়ো ।
বৰ্তমান সময়ত ৰিয়েল ইষ্টেটৰ ব্যৱসায়ে বিশাল পৰিসৰ লাভ কৰিছে । চৌদিশে গঢ় লৈ উঠিছে বিশাল বিশাল অট্টালিকা । আনহাতে, গুৱাহাটী মহানগৰীকে ধৰি বিভিন্ন নগৰ-চহৰত সৰু সৰু এপাৰ্টমেণ্টৰো চাহিদা বৃদ্ধি পাইছে ।
চাহিদা বৃদ্ধি পালেও কিন্তু ফ্লেট এটা ক্ৰয় কৰিবলৈ যাওঁতে প্ৰথমতে কি কি কথা জানি লোৱা উচিত সেই সম্পৰ্কে বহু লোকেই অৱগত নহয় । যাৰ বাবে ফ্লেট এটা ক্ৰয় কৰিবলৈ যাওঁতে বহু লোকেই বিবুদ্ধিত পৰে । ফ্লেট এটা ক্ৰয় কৰিবলৈ যাওঁতে জানিবলগীয়া কেতবোৰ দিশ সামৰি এই বিশেষ প্ৰতিবেদন ।
আছাম ৰিয়েল ইষ্টেট এণ্ড ইনফ্ৰাষ্টাকচাৰ ডেভল'পাৰ্ছ এছ'চিয়েছন চমুকৈ 'এৰিডা'ৰ সভাপতি তথা বিশিষ্ট অভিযন্তা পি কে শৰ্মাৰে হোৱা আছুতীয়া সাক্ষাৎকাৰৰ ভিত্তিত এই প্ৰতিবেদন প্ৰস্তুত কৰা হৈছে ।
প্ৰশ্ন : ফ্লেট এটা ক্ৰয় কৰিবলৈ যাওঁতে প্ৰথমতে কি কি বিষয় জানি ল'ব লাগে ?
উত্তৰ : গ্ৰাহকৰ সুৰক্ষাৰ বাবে ২০১৭ চনৰ পিছৰ পৰা ৰিয়েল ইষ্টেট ৰেগুলেটৰী অথ'ৰিটি চমুকৈ 'ৰেৰা' আইনখন প্ৰযোজ্য কৰা হৈছে । এই আইনখনে ক্ৰেতাক সম্পূৰ্ণ সুৰক্ষা প্ৰদান কৰে । 'ৰেৰা'ৰ ৱেবছাইটত সকলো উপলব্ধ । ক্ৰয় কৰিব বিচৰা প্ৰকল্পৰ সকলো দিশ ৰেৰাৰ ৱেবছাইটত চাব পাৰিব । তাত নিৰ্মাতাৰ সম্পূৰ্ণ তথ্য উপলব্ধ । নিৰ্মাতা আৰু প্ৰকল্পৰ সকলো তথ্য তাত লাভ কৰিব পাৰিব । মাটিৰ কাগজ-পত্রৰ পৰা আৰম্ভ কৰি অনুমতিকে ধৰি সকলো দিশ তাত চাব পাৰিব ।
ক্ৰেতাই প্ৰথমতে ৰেৰাৰ পঞ্জীয়ন থকা প্ৰকল্প চাই ল'ব লাগে । ৰেৰাই সকলো চালিজাৰি চাইহে পঞ্জীয়ন কৰে । ক্ৰেতাই কিবা অসুবিধা পালে ৰেৰাই ইয়াৰ সমাধান দিব । ৰেৰাই গোচৰো ল'ব পাৰে আৰু ইয়াৰ মীমাংসাও কৰিব পাৰে । ৰেৰাই গ্ৰাহকৰ সুৰক্ষা সুনিশ্চিত কৰে ।
প্ৰশ্ন : ফ্লেট ক্ৰয় কৰাৰ প্ৰক্ৰিয়াটো কেনেকুৱা ?
উত্তৰ : ফ্লেট এটাৰ সকলো দিশ চালিজাৰি চাই সিদ্ধান্ত লোৱাৰ পিছত বুকিঙৰ অগ্ৰিম ধন দি চুক্তি স্বাক্ষৰ কৰা হয় । তাৰ পিছত চুক্তি অনুসৰি কিস্তি দিয়া হয় । সময়মতে যাতে গ্ৰাহকে ফ্লেট লাভ কৰে সেই দিশটোও ৰেৰাই চায় । ৰেৰা হোৱাৰ পৰা গ্ৰাহক সম্পূৰ্ণৰূপে সুৰক্ষিত ।
প্ৰশ্ন : ফ্লেট এটাৰ মালিকীস্বত্ব কিমান দিনলৈ থাকে ?
উত্তৰ : মাটিৰ দৰে ফ্লেটৰ মালিকীস্বত্ব চিৰদিনৰ বাবে থাকে । স্থাৱৰ সম্পত্তিৰ আইনৰ আওতাত পৰে ফ্লেট । প্ৰজন্মৰ পাছত প্ৰজন্মই ইয়াৰ অধিকাৰ পাব । ঘৰৰ ডিজাইনৰ মানদণ্ড অনুসৰি এটা ঘৰৰ আয়ুস এশ বছৰ । কাগজ-পত্র অনুসৰি এশ বছৰ থাকে । কিন্তু আমি ইয়াত কেইবাশ বছৰ পুৰণি ঘৰ দেখিছোঁ ।
প্ৰশ্ন : প্ৰাকৃতিক দুৰ্যোগ নাইবা আন কোনো কাৰণত এপাৰ্টমেণ্ট ধ্বংস হ'লে কি হ'ব ?
উত্তৰ : প্ৰাকৃতিক দুৰ্যোগৰ বাবে বীমাটো দৰকাৰী বিষয়। নিৰ্মাতাৰ হাতত অট্টালিকাটো থকালৈকে বা ক্ৰেতাক নিদিয়া পৰ্যন্ত নিৰ্মাতাৰ দায়িত্বত থাকিব তথা প্ৰিমিয়াম দিব । কিন্তু ক্ৰেতাক গতাই দিয়াৰ পিছত ছ'চাইটীৰ হাতলৈ যোৱাৰ পিছত ছ'চাইটীয়ে প্ৰিমিয়াম দিব । প্ৰাকৃতিক দুৰ্যোগৰ বাবে ঘৰৰ বীমা কৰা থাকে ।
প্ৰশ্ন : ফ্লেট বা এপাৰ্টমেণ্ট নিৰ্মাণ কৰি গ্ৰাহকক দিয়াৰ পাছত নিৰ্মাতাৰ দায়বদ্ধতা কেতিয়ালৈকে থাকে ?
উত্তৰ : প্ৰম'টাৰসকলৰ বিসংগতিৰ ক্ষেত্রত দায়বদ্ধতা পাঁচ বছৰৰ বাবে থাকে । নিৰ্মাণৰ ক্ষেত্রত কিবা ত্ৰুটি থাকিলে তাৰ দায়িত্ব পাঁচ বছৰৰ বাবে প্ৰম'টাৰ সকলে লয় ।
প্ৰশ্ন : সৰু আকাৰৰ ভূমিত নিৰ্মাণ কৰা দুই-তিনিমহলীয়া অট্টালিকাৰ কম সংখ্যাৰ ফ্লেটসমূহ কিমান নিৰাপদ ?
উত্তৰ : সৰু সৰু অট্টালিকাৰ ফ্লেটসমূহ 'ৰেৰা'ৰ নিয়ন্ত্রণত নাই । মাটিৰ পৰিমাণ আৰু ইউনিটৰ সংখ্যাৰ লগত এইটো জড়িত । সৰু সৰু প্ৰকল্পৰ ক্ষেত্রত ৰেৰাৰ পঞ্জীয়ন বাধ্যতামূলক নহ'ব পাৰে । বাধ্যতামূলক নোহোৱা ঠাইত কোনোৱা ক্ৰেতাই ফ্লেট ক্ৰয় কৰিব গ'লে এটা ডাঙৰ প্ৰত্যাহ্বান লোৱা হ'ব । কাৰণ তেনে অট্টালিকা নাইবা ফ্লেটত কিবা বিসংগতি হ'লে কোনো ধৰণৰ সুৰক্ষা নাই ।
ৰেৰাৰ আওতাত নপৰা ফ্লেটৰ ক্ষেত্রত কিবা সমস্যা হ'লে আদালতলৈ যাব লাগিব । যিটো এটা দীঘলীয়া প্ৰক্ৰিয়া । ৰেৰাৰ অধীনত হ'লে সম্পূৰ্ণ সুৰক্ষিত । সেয়ে ফ্লেট এটা ক্ৰয় কৰাৰ ক্ষেত্রত সাৱধানতা অৱলম্বন কৰা উচিত ।
