ছিণ্ডিকেটৰ হৈ মাত মতাৰ বাবেই মোক প্ৰাণে মৰাৰ ভাবুকি দিছে; শংকিত কংগ্ৰেছ নেতা
ডিমা হাছাও জিলাত কংগ্ৰেছ নেতাক প্ৰাণে মৰাৰ ভাবুকি । থানাত দাখিল এজাহাৰ ।
Published : August 5, 2025 at 9:32 PM IST
হাফলং : কোন দিশে গতি কৰিছে আজিৰ সমাজখন ! মাৰো বুলি ক'লেই কাৰোবাক মাৰি দিব পাৰে একাংশই ! এইবাৰ প্ৰাণৰ শংকাত ভুগিছে এজন ব্যক্তি । নাম বাপুজিৎ লাংথাচা । জানিব পৰা মতে, বাপুজিৎ ডিমা হাছাও জিলা কংগ্ৰেছৰ এগৰাকী নেতা ।
ছিণ্ডিকেটৰ হৈ মাত মতাৰ বাবেই কংগ্ৰেছ নেতা বাপুজিৎ লাংথাচাক মঙলবাৰে প্ৰাণে মৰাৰ ভাবুকি দিয়ে ৰক ডিমাছা ওৰফে প্ৰবীণ হাগজেৰ নামৰ এগৰাকী ব্যক্তিয়ে । সংবাদ মাধ্যমৰ আগত এই কথা ব্যক্ত কৰে বাপুজিতে । ইতিমধ্যে এই ঘটনা সন্দৰ্ভত বাপুজিতে হাফলং আৰক্ষী থানাত দাখিল কৰে এক এজাহাৰ ।
মঙলবাৰে বিয়লি কংগ্ৰেছ নেতা বাপুজিৎ লাংথাচাই কয়, ''মঙলবাৰ দিনৰ প্ৰায় ২:৩০ বজাত হাফলং ডিমাছা মহিলা সমিতিৰ ওচৰৰ পৰা মই মোৰ ল'ৰাটোক টিউচনৰ পৰা আনিবলৈ গৈছিলো । তেনে সময়তে প্ৰবীণ হাগজাৰ নামৰ ব্যক্তিগৰাকী এখন স্কুটি লৈ সেই ঠাইত উপস্থিত হয় আৰু মোক প্ৰশ্ন কৰে যে কিয় মই সংবাদ মাধ্যমৰ আগত ছিণ্ডিকেটৰ কথা কৈছো, কিয় তেওঁৰ নাম লৈছো । যদি মই অতি সোনকালে প্ৰবীণ হাগজাৰৰ নাম সংবাদ মাধ্যমত প্ৰকাশিত বাতৰিৰ পৰা আঁতৰাই দিবলৈ নকওঁ তেনেহ'লে মোৰ লগতে মোৰ গোটেই পৰিয়ালটোকে কাটি পেলাই দিব বুলি ভাবুকি দিয়ে ।''
এই ঘটনাৰ পাচতে প্ৰাণৰ শংকাত ভুগিছে কংগ্ৰেছ নেতা বাপুজিৎ লাংথাচাই । সেয়ে মঙলবাৰে বিয়লি বাপুজিৎ লাংথাচে প্ৰবীণ হাগজাৰৰ বিৰুদ্ধে হাফলং থানাত দাখিল কৰে এজাহাৰ । লগতে তেওঁ আৰক্ষীক এই বিষয়টো ভালদৰে নজৰ দিবলৈ অনুৰোধ জনায় ।
