যোৰহাটৰ ১৬খন জিলা পৰিষদ দখলৰ দিশে বিজেপি মিত্ৰজোঁট

যোৰহাট : বিগত লোকসভা নিৰ্বাচনৰ পিচতেই যোৰহাটত বিজেপিৰ প্ৰতি জনসাধাৰণৰ মোহভংগ হোৱা বুলি চৰ্চা হৈছিল । কংগ্ৰেছী নেতা গৌৰৱ গগৈৰ বিজয়ৰ পিচতেই সকলোৰে দৃষ্টি নিৱদ্ধ হৈ আছিল এই সমষ্টিটোত । পিচে পঞ্চায়ত নিৰ্বাচনৰ ফলাফলে এই হিচাপত আউল লগোৱাৰ উপক্ৰম ঘটাইছে । জিলাখনৰ অধিকাংশ আঞ্চলিক পঞ্চায়ত আৰু ৱাৰ্ড সদস্য বিজেপি সমৰ্থিত প্ৰাৰ্থীয়ে জয়লাভ কৰাৰ পিচত এইবাৰ ১৬খন জিলা পৰিষদ দখলৰ দিশে আগবাঢ়িছে ।

লোকসভা নিৰ্বাচনত যোৰহাট সমষ্টিত লক্ষাধিক ভোটৰ ব্যৱধানত গৌৰৱ গগৈয়ে বিজয়ধ্বজা উৰুৱালৈ সক্ষম হোৱাৰ এবছৰ নহ'লেই, ৰাইজৰ মোহভংগ হোৱাৰ উপক্ৰম হৈছে । যোৰহাট জিলাৰ চাৰিটা বিধানসভা সমষ্টিৰ অন্তৰ্গত ১৬খন জিলা পৰিষদৰ আটাইকেইখনতে বিজেপি মিত্ৰজোঁটৰ প্ৰাৰ্থী কেইগৰাকী আগবাঢ়ি আছে । আঞ্চলিক পঞ্চায়তৰ গৰিষ্ঠ সংখ্যকে বিজেপি মিত্ৰজোঁট সমৰ্থিত প্ৰাৰ্থীয়ে ইতিমধ্যে জয়লাভ কৰিছে ।

আনহাতে কংগ্ৰেছৰ দুৰ্গ হিচাপে পৰিচিত তিতাবৰ বিধানসভা সমষ্টিতো বিজেপিয়ে আঞ্চলিক পঞ্চায়তত জয়যাত্ৰা অৱ্যাহত ৰখাৰ লগতে কৰঙা, বৰহোলা, ঠেঙাল আৰু তিতাবৰ জিলা পৰিষদত আগৱাঢ়ি আছে । ৰাজ্যত বিজেপিয়ে জয়লাভ কৰা আৰু অগ্ৰগতি সন্দৰ্ভত বিত্তমন্ত্ৰী অজন্তা নেওগে কয়, "ৰাজ্যখনৰ পঞ্চায়ত নিৰ্বাচনৰ ফলাফল বিজেপি মিত্ৰজোঁটৰ সপক্ষে দেখিছো । পঞ্চায়ত নিৰ্বাচনত বিজেপিৰ এই ফলাফলৰ আঁৰতেই আছিল প্ৰধানমন্ত্ৰী নৰেন্দ্ৰ মোদী, মুখ্যমন্ত্ৰী ড৹ হিমন্ত বিশ্ব শৰ্মা আৰু বিজেপিৰ কাৰ্যকৰ্তাসকল । অসমবাসীক কৃতজ্ঞতা জ্ঞাপন কৰিছো । বিজেপিয়ে দিনে-নিশাই পৰিশ্ৰম কৰা আৰু মুখ্যমন্ত্ৰীৰ নেতৃত্বত হোৱা উন্নয়নৰ ধাৰাৰ বাবে ৰাইজে বিজেপিৰ প্ৰতি আস্থা প্ৰকাশ কৰিছে ।"

বিত্তমন্ত্ৰীগৰাকীয়ে পুনৰ কয়, "লোকসভা নিৰ্বাচনত যোৰহাট জিলাত ভাল ফলাফল লাভ কৰিব পৰা নাছিলো; কিন্তু কেইটামান মাহৰ পিচতেই আজি যোৰহাটবাসীয়ে পুনৰ বিজেপি মিত্ৰজোঁটক আঁকোৱালি লৈছে । প্ৰধানমন্ত্ৰী নৰেন্দ্ৰ মোদীৰ প্ৰতি তেওঁলোকে আস্থা প্ৰকাশ কৰিছে । পঞ্চায়ত নিৰ্বাচনত ৰাইজে দিয়া আশীৰ্বাদ শিৰত লৈ ২০২৬ৰ নিৰ্বাচনৰ বাবে অগ্ৰসৰ হ'ম আৰু ৰাইজৰ বাবে কাম কৰি যাম ।"

মন্ত্ৰী নেওগে পুনৰ কয়, " বিগত সময়ত কংগ্ৰেছৰ দুৰ্বল ভূমিকা দেখিবলৈ পাইছিলো । আমি কৈছিলোৱেই এই পঞ্চায়ত নিৰ্বাচনত কংগ্ৰেছৰ অৱস্থা অতি শোচনীয় হ'ব । ৰাইজে এতিয়া কংগ্ৰেছ দলৰ প্ৰতি অনীহা প্ৰকাশ কৰিছে আৰু বৰ্তমান সময়ত কংগ্ৰেছৰ নেতৃত্বৰ দুৰ্বলতা আৰু ৰাইজে তেওঁলোকক আঁকোৱালি লোৱা নাই । কংগ্ৰেছৰ ভৱিষ্যৎ সম্পৰ্কে ৰাইজে গম পাইছে ।"

আনহাতে পঞ্চায়ত নিৰ্বাচনত বিজেপিৰ ফলাফলত সন্তোষ প্ৰকাশ কৰি কাজিৰঙা লোকসভা সমষ্টিৰ সাংসদ কামাখ্যা প্ৰসাদ তাছাই কয়, "এতিয়া গৌৰৱ গগৈৰ মেজিক নচলে । কাৰণ পাকিস্তানলৈ যোৱা মানুহৰ অৱস্থা কি হয় ৰাইজে বুজি পায় আৰু পাকিস্তানৰ অৱস্থা কি হ'ল সকলোৱে জানে । এতিয়া গৌৰৱ গগৈ সম্পৰ্কে মই কথাই নকওঁ ।"