কলিয়াবৰ: শেহতীয়াকৈ কেন্দ্ৰীয় সাংস্কৃতিক মন্ত্ৰণালয়ৰ অধীনস্থ সাংস্কৃতিক উৎস আৰু প্ৰশিক্ষণ কেন্দ্ৰ (চিচিআৰটি)য়ে ঘোষণা কৰিছে জুনিয়ৰ ফেল'শ্বিপ প্ৰাপকৰ তালিকা । যিখন তালিকাত স্থান লাভ কৰিছে বহু উদীয়মান শিল্পীয়ে । এই বিশেষ তালিকাখনে হাঁহি বিৰিঙাইছে কলিয়াবৰৰ এগৰাকী নৃত্যশিল্পীৰ মুখত । চিচিআৰটিৰ জুনিয়ৰ ফেল'শ্বিপৰ তালিকাত স্থান লাভ কৰিছে কলিয়াবৰৰ সত্ৰীয়া নৃত্যশিল্পী-গৱেষক ছাত্রী দীপশিখা ভূঞাই ।
অসমৰ সত্ৰীয়া নৃত্যৰ প্ৰচাৰ আৰু প্ৰসাৰত নিজাববীয়াকৈ লোৱা বিশেষ পদক্ষেপ আৰু 'সত্ৰীয়া নৃত্যত অসমৰ মহিলাৰ অৱদান' বিষয়ক গৱেষণাৰ বাবে এই জুনিয়ৰ ফেল'শ্বিপ লাভ কৰিছে উদীয়মান নৃত্যশিল্পীগৰাকীয়ে । দীপশিখা ভূঞাই কলিয়াবৰৰ বহু ছাত্ৰ-ছাত্ৰীক ধাৰাবাহিকভাৱে সত্ৰীয়া নৃত্যৰ বিনামূলীয়া প্ৰশিক্ষণ প্ৰদান কৰি আহিছে । কলিয়াবৰৰ অতিকৈ ভিতৰুৱা অঞ্চল বিশেষকৈ চাহ জনগোষ্ঠী, বড়ো, মিছিং, কাৰ্বিৰ লগতে ইছলাম ধৰ্মাৱলম্বী শিক্ষাৰ্থীক সত্ৰীয়া নৃত্যৰ এনে বিনামূলীয়া প্ৰশিক্ষণ দিয়াৰ ব্যৱস্থা কৰিছে দীপশিখাই ।
অলপতে সামাজিক সাংস্কৃতিক অনুষ্ঠান সাৰথি আৰু 'শংমাক' এক সংস্কৃতি প্ৰবাহ'ৰ যৌথ উদ্যোগত বামুণীত ৬ দিনীয়া এক কাৰ্যসূচীত বিনামূলীয়াকৈ সত্ৰীয়া নৃত্যৰ প্ৰশিক্ষণ দিয়ে দীপশিখাই । জনগোষ্ঠীয়সকলৰ মাজত সত্ৰীয়া নৃত্যৰ প্ৰচাৰ-প্ৰসাৰ তথা সত্ৰীয়া নৃত্যৰ গুৰুত্ব অনুধাৱন কৰাবৰ বাবে কলিয়াবৰৰ দীপশিখা ভূঞাই লৈছে এই প্ৰশংসনীয় বিশেষ পদক্ষেপ । কলিয়াবৰৰ শ্ৰীশ্ৰীভোলাগুৰি সত্ৰৰ নিৱাসী প্ৰয়াত দিপক ভূঞা আৰু শিক্ষয়িত্ৰী ৰাণু নেওগৰ কন্যা দীপশিখা ভূঞাই এক 'চি চি আৰ টি'ৰ পৰা জুনিয়ৰ ফেল'শ্বিপ লাভ কৰা সংবাদে আনন্দিত কৰিছে কলিয়াবৰবাসীক ।
ইফালে এই ফেল'শ্বিপ লাভ কৰি নৃত্যশিল্পীগৰাকীয়ে কয়,"সত্ৰীয়া নৃত্যত মহিলাৰ কিদৰে প্ৰৱেশ হ'ল আৰু কিদৰে এতিয়া সত্ৰীয়া নৃত্য ৰাষ্ট্ৰীয়-আন্তঃৰাষ্ট্ৰীয় প্ৰেক্ষাপটত জিলিকি উঠাত মহিলাসকলৰ কিনো অবদান আছে ? কেনেদৰে আমাৰ সমাজ ব্যৱস্থাৰ পৰা মহিলাসকল এই সত্ৰীয়া নৃত্যৰ পৰা ওলাই গৈছিল আৰু কেনেদৰে আকৌ এই ৭০-৮০ বছৰৰ ভিতৰত আকৌ মহিলাসকলৰ পুনৰ প্ৰৱেশ হ'ল ? এই বিষয়েই মোৰ চি চি আৰ টিৰ জুনিয়ৰ ফেল'শ্বিপৰ প্ৰজেক্টো হৈছে । এই বছৰ মই তাৰ ওপৰত ফেল'শ্বিপ লাভ কৰিবলৈ সক্ষম হৈছো ।"
