গুৱাহাটী: অসমৰ পৰ্যটন ক্ষেত্ৰত নতুন সংযোজন । এতিয়াৰ পৰা আপুনিও কৰিব পাৰিব CARA ভেনত অৱসৰ বিনোদন । অত্যাধুনিক সকলো সা-সুবিধা থাকিব এই CARA ভেনত । CARA ভেনখনত উপলব্ধ থকা-খোৱা, অনাময়ৰ সু-ব্যৱস্থা । বাহনখনত আছে পাকঘৰ, বাথৰূমকে ধৰি পৰ্যাপ্ত সা-সুবিধা ।
মঙলবাৰে মহানগৰীৰ পল্টনবজাৰস্থিত অসম পৰ্যটন নিগমৰ কাৰ্যালয়ৰ বাহিৰত এই CARA ভেন কেইখন প্ৰদৰ্শন কৰা হয় ।
- CARA ভেনখনৰ ভিতৰত কি কি সুবিধা থাকিব:
এডভাণ্টেজ আসাম ২.০ সময়ত অসমৰ পৰ্যটন নিগম আৰু ভাৰত CARA ভানৰ মাজত বুজাবুজি চুক্তি স্বাক্ষৰ হৈছিল । তাৰ অংশ হিচাপে তিনিখন CARA ভান অনা হৈছে । এই ভান কেইখন ভাৰত CARA ভানে পৰিচালনা কৰিব ।
এই ভানৰ জৰিয়তে পৰ্যটক সকলে অৱসৰ বিনোদনত সুকীয়া সোৱাদ লাভ কৰিব পাৰিব । হোটেলত থকা সকলো সুবিধায়ে থাকিব আৰু হোটেলতকৈ ভাল পৰিৱেশ পাব ।
বাহনখনত পাকঘৰ, বাথৰূমকে, বিছনা, টেবুল, টিভি, ফ্ৰীজকে ধৰি প্ৰয়োজনীয় সকলো সা-সুবিধা লাভ কৰিব বুলি জনাই অসমৰ পৰ্যটন উন্নয়ন নিগমৰ অধ্যক্ষ ঋতুপৰ্ণ বৰুৱাই ।
- অসমত CARA ভানৰ ট্ৰেণ্ড আহিছে:
এই সন্দৰ্ভত অধ্যক্ষগৰাকীয়ে কয়, "অসমত পৰ্যটন ক্ষেত্ৰত নতুন সংযোজন CARA ভান । CARA ভান বৰ্তমান ট্ৰেণ্ডত আছে । CARA ভানত থাকি পৰ্যটকসকলে বেলেগ ধৰণৰ সুখ অনুভৱ কৰে । সেয়েহে এতিয়াৰ কাজিৰঙা, মানস, শিৱসাগৰ, চৰাইদেউ আদিৰ লগতে অসমৰ অন্যান্য পৰ্যটন ক্ষেত্ৰলৈ যাব পাৰিব । CARA ভানত পৰ্যটকসকলে নতুন সোৱাদ পাব ।"
তেওঁ লগতে কয়, "বিশ্বৰ বিভিন্ন প্ৰান্তৰ পৰ্যটকসকলে CARA ভানৰ সুবিধা বিচাৰে । CARA ভানৰ জৰিয়তে অনাগত দিনত পৰ্যটনত নতুন গতি লাভ কৰিব । নিশা প্ৰাকৃতিক পৰিৱেশৰ মাজত থাকিব পাৰিব । পৰ্যটকৰ লগতে আন বহু ব্যক্তিয়ে এনেবোৰ সুবিধা বিচাৰে । ৰাজনৈতিক দলবোৰেও বিচাৰে ।"
"আগন্তুক পঞ্চায়ত, বিধানসভা নিৰ্বাচনত তেওঁলোকে ইয়াৰ সুবিধা ল'ব পাৰিব । CARA ভানৰ ইতিমধ্যে বুকিং আৰম্ভ হৈছে । এই তিনিখনৰ ব্যৱসায়িক লাভালাভ চাই আৰু বাহনৰ সংখ্যা বঢ়োৱাৰ চিন্তা চৰ্চা কৰা হ'ব ।" অধ্যক্ষগৰাকীয়ে কয় ।
- প্ৰতি নিশা কটাবলৈ কিমান টকা খৰচ কৰিব লাগিব CARA ভানত ?
ভাৰত CARA ভানৰ মেনেজাৰ ৰাজু শীলে কয়, "তিনিখন CARA ভানৰ ভিতৰত এখনত দুজন লোক আৰু দুটা শিশু থাকিব পৰা ব্যৱস্থা আছে । আন এখনত চাৰিজন লোক আৰু দুজন শিশু কটাব পৰা ব্যৱস্থা আছে আৰু একেবাৰে ডাঙৰখনত ৬ জন লোক আৰু দুজন শিশুৱে কটাব পৰা ব্যৱস্থা আছে । প্ৰতিখনৰে ভাৰা বেলেগ বেলেখ হয় । বাহনত এদিন কটোৱাৰ বাবত ১৫ পৰা ৩৫ হাজাৰ টকা ভাৰা দিব লাগিব ।"
