কৰ্কট ৰোগৰ চিকিৎসা: অসমত স্থাপন হ’ব দেশৰ তৃতীয়টো প্ৰ’টন থেৰাপী কেন্দ্ৰ

গুৱাহাটী: কৰ্কট ৰোগৰ চিকিৎসাক নতুন দিশ দিবলৈ অসম চৰকাৰে গুৱাহাটীৰ ৰাজ্যিক কৰ্কট প্ৰতিষ্ঠানত প্ৰ’টন থেৰাপী কেন্দ্ৰ স্থাপনৰ প্ৰস্তাৱ আগবঢ়াইছে ।

২০২৫-২৬ বিত্তীয় বৰ্ষৰ ৰাজ্যিক বাজেট দাখিল কৰি সোমবাৰে বাজেট ভাষণ পাঠ কৰি বিত্তমন্ত্ৰী অজন্তা নেওগে এই তথ্য সদৰী কৰে । বিত্তমন্ত্ৰীয়ে কয়, "এইটোৱেই হ’ব পূব ভাৰতৰ প্ৰথম আৰু ভাৰতৰ তৃতীয়টো এনে সুবিধা, যিয়ে অঞ্চলটোৰ বাবে উন্নত কেন্সাৰ চিকিৎসাৰ ক্ষেত্ৰত এক উল্লেখযোগ্য মাইলৰ খুঁটি হিচাপে চিহ্নিত কৰিব ।

উল্লেখ্য যে, প্ৰ’টন থেৰাপী কেন্দ্ৰসমূহে কৰ্কট ৰোগৰ চিকিৎসাৰ বাবে প্ৰ’টন ৰশ্মি ব্যৱহাৰ কৰে, যাৰ ফলত ৰেডিঅ’থেৰাপীৰ এক অতি নিখুঁত ৰূপ প্ৰদান কৰা হয় যিয়ে সুস্থ টিছুসমূহৰ নূন্যতম ক্ষতি কৰে ।

নেওগে কয়, "প্ৰ’টন থেৰাপি চেণ্টাৰ স্থাপনৰ ফলত কৰ্কট ৰোগী বিশেষকৈ শিশুসকলৰ বাবে অত্যাধুনিক কৰ্কট ৰোগৰ চিকিৎসাৰ সুবিধা লাভ কৰিব পৰা যাব ।

এয়া পূব ভাৰতৰ প্ৰথম আৰু ভাৰতৰ তৃতীয়টো এনে সুবিধা হ’ব, যিয়ে অঞ্চলটোৰ বাবে উন্নত কৰ্কট চিকিৎসাৰ ক্ষেত্ৰত এক উল্লেখযোগ্য মাইলৰ খুঁটি হিচাপে চিহ্নিত কৰিব । এই মেচিনটোৰ দাম হ’ব প্ৰায় ৫৫০ কোটি টকা । এই প্ৰকল্পৰ বাবে চৰকাৰে চি এছ আৰ পুঁজিও সংগ্ৰহ কৰিব । স্বাস্থ্যসেৱাৰ ক্ষেত্ৰত দ্ৰুত আন্তঃগাঁথনি উন্নয়নৰ লগে লগে অসম চিকিৎসা ক্ষেত্ৰৰ কেন্দ্ৰবিন্দু হ’বলৈ সাজু হৈছে । আমি ৰেহাইমূলক হাৰত মাটি আৰু অন্যান্য প্ৰৰোচনা দি আগশাৰীৰ চিকিৎসালয়সমূহক অসমত তেওঁলোকৰ প্ৰতিষ্ঠান মুকলি কৰাৰ বাবে আমন্ত্ৰিত কৰিছো ।" মন্ত্ৰীগৰাকীয়ে কয় ।

অসম তথা ভাৰতৰ উত্তৰ-পূৰ্বাঞ্চলৰ ৰাজ্যসমূহত কৰ্কট ৰোগৰ প্ৰাদুৰ্ভাৱৰ হাৰ অতি বেছি ৷ বছৰি প্ৰায় ৫০,০০০ নতুন ৰোগীৰ সংক্ৰমণ ঘটে, যিটো ৰাষ্ট্ৰীয় গড়তকৈ অধিক । অসম চৰকাৰৰ ওচৰত উপলব্ধ পৰিসংখ্যা অনুসৰি অসমত কৰ্কট ৰোগৰ প্ৰাদুৰ্ভাৱ প্ৰতি এক লাখ জনসংখ্যাৰ বিপৰীতে ১১৪ জন, ৰাষ্ট্ৰীয় গড় ৯৭ জন । চৰকাৰী তথ্যত উল্লেখ কৰা অনুসৰি অসমত মহিলাৰ স্তন আৰু ডিম্বাশয় আৰু পুৰুষৰ মুখ আৰু হাওঁফাওঁত কৰ্কট ৰোগত আক্ৰান্ত লোকৰ সংখ্যা সৰ্বাধিক ।

মন্ত্ৰীগৰাকীয়ে আৰু কয় যে চৰকাৰে পদোন্নতিৰ বাবে ৰাষ্ট্ৰীয় চিকিৎসা আয়োগৰ মাপকাঠী পূৰণ কৰাৰ অধীনত ডাইনামিক এশ্বুৰেড কেৰিয়াৰ প্ৰগ্ৰেছন আঁচনিৰ অধীনত চিকিৎসা মহাবিদ্যালয়ৰ অনুষদকো সামৰি লোৱাৰ সিদ্ধান্ত লৈছে । মন্ত্ৰী নেওগে আৰু কয়, "চৰকাৰে বছৰি দুখনকৈ ৰাষ্ট্ৰীয় সন্মিলন, এছিয়াৰ দেশসমূহৰ বাবে প্ৰতি দুবছৰৰ মূৰে মূৰে এখন আন্তঃৰাষ্ট্ৰীয় সন্মিলন আৰু এছিয়ান দেশৰ বাহিৰে আন দেশৰ বাবে প্ৰতি চাৰি বছৰৰ মূৰে মূৰে এখন সন্মিলন পৃষ্ঠপোষকতা কৰিব । চৰকাৰে নতুনকৈ নিযুক্তি পোৱা মেডিকেল কলেজৰ অধ্যাপকসকলক বাহন ক্ৰয়ৰ বাবেও সুতমুক্ত ঋণ প্ৰদান কৰিব । ইয়াৰ উপৰিও আমি অতি সোনকালে তেওঁলোকৰ বাবে এক সহজ গৃহঋণ আঁচনি আৰম্ভ কৰিম ।" ৰাজ্যত চিকিৎসা মহাবিদ্যালয়ৰ সংখ্যা বৃদ্ধি পাইছে যদিও যুৱ প্ৰতিভাক আকৰ্ষণ কৰা আৰু অধ্যাপক পৰিচালনা কৰাটো চৰকাৰৰ বাবে এক ডাঙৰ প্ৰত্যাহ্বান হৈ পৰিছে বুলি তেওঁ উদ্বেগ প্ৰকাশ কৰে ।