টোলকৰৰ বৃদ্ধিৰ প্ৰসংগত ক্ষোভ উজাৰিলে স্বয়ং বিজেপি নেতাই; সামাজিক মাধ্যমত ভিডিঅ’ ভাইৰেল - TOLL TAX HIKE IN ASSAM

তেজপুৰ, 14 জুন : শাসকীয় দল ভাৰতীয় জনতা পাৰ্টীৰ চৰকাৰৰ কাম-কাজত ক্ষুব্ধ একাংশ দলীয় কৰ্মী । শাসকীয় দলৰ বিধায়কৰ পিছত এইবাৰ বিজেপিৰ যুৱ মৰ্চাৰ কৰ্মীয়ে সামাজিক মাধ্যমযোগে ক্ষোভ উজাৰিলে গেৰুৱা দলটোৰ বিৰুদ্ধে । সম্প্ৰতি সামাজিক মাধ্যমত তোলপাৰ হোৱা এটি ভিডিঅ’ৱে তীব্ৰ প্ৰতিক্ৰিয়া সৃষ্টি কৰিছে সাধাৰণ লোকৰ মাজত ৷

ঘটনাৰ বিৱৰণী অনুসৰি, শোণিতপুৰ জিলাৰ বিজেপিৰ যুৱ মৰ্চাৰ প্ৰাক্তন সভাপতি তথা ৰাজ্যিক সদস্য ৰাকেশ দাসে দলৰ বিৰুদ্ধে ক্ষোভিত হৈ প্ৰকাশ কৰা কিছু মন্তব্যৰ ভিডিঅ’ ভাইৰেল হৈ পৰিছে সামাজিক মাধ্যমত ৷ নেতাগৰাকীয়ে ভিডিঅ’টোত প্ৰকাশ কৰিছে এনেদৰে, "আমি ভাগৰি পৰিছো, আমাৰ হাতত পৰ্যাপ্ত ধন নাই" ৷

লগতে পঢ়ক: Toll gates in Assam: এবছৰত টোলগেটৰ যোগেদি অসমৰ পৰা সংগ্ৰহ ৪৬৬ কোটি টকা

যুৱনেতাগৰাকীয়ে ৰহা টোলগেটত টোলকৰ দিব নোৱাৰাৰ বাবে তাৰ কৰ্মচাৰীয়ে দুৰ্ব্যৱহাৰ কৰে ৷ যাৰ বাবে সামাজিক মাধ্যমত চৰকাৰত তীব্ৰ সমালোচনা কৰে যুৱনেতা দাসে ৷ তেওঁ আক্ষেপেৰে কয় যে যুৱ মৰ্চাৰ বা সাধাৰণ কাৰ্যকৰ্তাই এতিয়া চৰকাৰৰ তৰফৰ পৰা নাপায় কোনো সঁহাৰি । নিৰ্বাচনৰ সময়ত দিনে-ৰাতি ভোট সংগ্ৰহৰ স্বাৰ্থত প্ৰচাৰকাৰ্যত নমা কাৰ্যকৰ্তাসকলক দলটোৰ জ্যেষ্ঠ নেতৃত্বই চিনি নোপোৱাৰ অভিযোগ উত্থাপন কৰে বিজেপিৰ যুৱনেতা ৰাকেশ দাসে ৷

লগতে পঢ়ক: Toll gates in Assam: ফুৰিব নে ৰাজহৰ ধন দিব চৰকাৰক ?

উল্লেখ্য যে, টোলগেটত মাথো দলৰ একাংশ জ্যেষ্ঠ নেতাকহে টোলকৰ ৰেহাই দিয়া হয় ৷ তাৰ পৰিৱৰ্তে সাধাৰণ নেতা-পালিনেতাই তেনে সুবিধা লাভ নকৰে ৷ ইতিমধ্যে এই বিষয়ে বিজেপিৰ ৰাজ্যিক সভাপতি ভৱেশ কলিতাক অৱগত কৰাৰ কথা প্ৰকাশ কৰে ৰাকেশ দাসে ।

উল্লেখ্য যে, এই ঘটনাৰ মাথো এদিন পূৰ্বে বিজেপি বিধায়ক মৃণাল শইকীয়াই টোলকৰৰ সন্দৰ্ভত কেন্দ্ৰীয় লোক নিৰ্মাণ বিভাগৰ মন্ত্ৰী নীতিন গাডকাৰীলৈ প্ৰেৰণ কৰিছে এক পত্ৰ । মুঠৰ ওপৰত স্বয়ং দলীয় কৰ্মীয়ে এতিয়া বিষোদগাৰ প্ৰকাশ কৰিছে গেৰুৱা দলটোৰ বিৰুদ্ধে ৷

লগতে পঢ়ক: ৰহা টোলগেটৰ টোল সংগ্ৰহ বাতিল কৰক: কেন্দ্ৰীয় মন্ত্ৰী গাডকাৰীলৈ আহ্বান বিজেপি বিধায়কৰ - MLA Mrinal Saikia